إتحاد (الجاكومي) ومريخ (معتصم عبدالسلام) ..!!

صابنها
محمد عبد الماجد
إتحاد (الجاكومي) ومريخ (معتصم عبدالسلام) ..!!

• الوضعية الحقيقية لتوصيف الاشياء هو ان نقول اتحاد (الجاكومي) ومريخ (متعصب) عبدالسلام .. لأن الجاكومي هو من يدير الاتحاد العام حسب قوله … والاتحاد العام يعمل من اجل المريخ.
• نحن بقينا ما عارفين نفرق بين المريخ والاتحاد.
• الاتحاد من المريخ ما بتقدر تفرز.
• الجاكومي شغال بنظام زيتنا في اتحادنا… او مريخنا في اتحادنا.
• ما يقوم به (متصعب) عبدالسلام في الاتحاد من اجل المريخ .. اعضاء المريخ في المجلس ما قاعدين يقوموا به.
• نصيحة لمحمد سيد احمد الجاكومي تاني لو عندك (كلام) اطلع قوله في التلفزيون والإذاعة في شكل (تصريحات) رسمية ، عشان الكلام دا ما يطلع في شكل (تسريبات)… وتجيب الكلام للمريخ.
• كلامك البتقول فيه دا نحن عارفينه .. بس عشان انت بتقول فيه في شكل (تسريبات) بعمل كل هذه الردود.
• طبعا الجاكومي عاوز يكون دائما هو في الصورة .. ولو كان ذلك على حساب المريخ.
• ما فارقة معاه … حتى لو اتعرض للنقد … والهجوم … البحث عن الاضواء يمكن ان يجعلك تفعل اكثر من ذلك.
• اتكلم الجاكومي في السر عن (تواطؤ) المريخ والأهلي المصري … الكلام طلع تاني يوم في تسريبات على مقاطع فيديو.
• السر انتشر اكتر من الجهر.
• الموضوع عادي عند المريخ .. لكن كلام الجاكومي جاب الكلام للأهلي شندي.
• اتكلم الجاكومي في السر عن (تواطؤ) المريخ والاتحاد العام .. برضو الكلام طلع تاني يوم في تسريبات على مقاطع صوتية.
• البلد كلها اتكلمت عن هذه المؤامرة.
• تسريبات الجاكومي انتشرت اكتر من شريط ودي (المرسال) في التسعينات.
• والجاكومي أي مقارنة مع وردي مكسب ليه.
• عاوز يشتهر بس.
• ما فارقة معاه في شيء.
• العيب والما عيب عندو واحد.
• اعمل حسابك يا الجاكومي.. ناس الهلال ديل ما في حاجة بتندس عليهم… طبعا الجاكومي لو تسريباته في السياسة بتطلع للناس كان الشعب السوداني كشف حجم المؤامرة التى تمت بين العسكر والانقلابيين المدنيين الذين انقلبوا على حكومة حمدوك.
• الرياضة طبعا فيها شفافية ووضوح اكتر.
• عاوزين لينا هلالاب في الحرية والتغيير يطلعوا لينا تسريبات الجاكومي (السياسية) مع العسكر.
• عاوزين نعرف (المؤامرات) التى تتم على السلطة المدنية في الغرف المغلقة.
• المهم ما في حاجة بتفوت على الهلالاب …الجاكومي لو اتكلم مع نفسه ..بلقى هذا الكلام في اليوم التاني في تسريبات (صوتية).
• اعمل حسابك … الهلال دا (الانجليز) ما قدروا عليه.
• الجاكومي مشكور بعد تسريباته الصوتية كشف لنا المؤامرات التى تتم بين المريخ والاتحاد ضد الهلال.
• تلك التسريبات سوف تجعل الهلالاب احرص على مصالحهم .. وعلى عدم منح المريخ والاتحاد أي فرصة للنيل من الهلال.
• اعملوا حسابكم.
• وشددوا الخناق على اتحاد (اللقيمات).
• الثقة اصبحت مفقودة في اتحاد معتصم جعفر وأسامة عطا المنان وسيف الكاملين ومتعصب عبدالسلام ومعتز الشاعر ومحمد حلفا …رابطة مشجعي المريخ في الاتحاد العام .. الذين يمكن ان نضيف لهم برهان تية ومحسن سيد وبقية شلة (الميز).
• الجماعة ديل في الضلمة بحدروا للهلال.
• الجماعة ديل ما عندهم أي فرق من الجاكومي.
• كلهم الجاكومي.
• اذا نظرنا الى الاعمال التى قام بها الاتحاد العام في الفترة الماضية لصالح المريخ سوف تظهر لنا حقيقة (تسريبات) الجاكومي.
• بدأ ذلك منذ ان سمحت لجنة (متعصب) عبدالسلام ان يلعب المريخ الدورة الاولى كلها بكشف فيه (41) لاعبا.
• فريق بيلعب مبارياته بكشف فيه (41) لاعبا امام اندية كشوفاتها فيها (32) لاعبا فقط.
• عدالة المنافسة هنا اختفت وين؟
• الاتحاد العام سمح للمريخ في الدورة الثانية بان يجعلوا مشاطيب المريخ الذين تم الاستغناء عنهم (معلقين) في الاتحاد.
• اقصد معلقين في السيستم.
• محمد المصطفى ومحمد موسى وطبنجة ومنجد النيل ديل كلهم (معلقين).
• الاتحاد العام من اجل المريخ قام باستخراج جواز سوداني للاعب احمد بيتر الذي ضماه برهان تية ومحسن سيد للمنتخب الوطني من اجل ان يحلوا مشكلته حتى يصبح مؤهل للمشاركة مع المريخ ، وقد تحدث الجاكومي صراحة عن ذلك في تسريباته الاخيرة.
• الاتحاد العام قام بتأجيل الدوري الممتاز ثلاثة اسابيع من اجل استعدادات المريخ بعد ان تعثر المريخ في ثلاث مباريات في الدوري وفشل في تحقيق الفوز .. وحتى يتيح الفرصة للمريخ بعد التعاقد مع مدرب جديد .. كان يمكن ان يكتفي الاتحاد بتأجيل الدوري الممتاز لمدة 10 ايام فقط.
• في داعي يعني يلعب المنتخب الوطني السوداني مع منتخب جنوب السودان.
• عاوزين محمد الرشيد والسماني الصاوي والجزولي نوح يرجعوا من الاصابات التى ابعدتهم من المشاركة مع المريخ في الفترة الاخيرة.
• الاتحاد العام غير الدور الذي لعبه مع مجلس حازم مصطفى ضد مجلس ادم سوداكال قام ايضا بحل مشاكل المريخ مع الفيفا.
• حتى مجدي شمس الدين (الهلالابي) ركب الموجة مع المريخاب .. وقام بحل مشكلة المريخ مع محترفه اديلي.
• (تحصل سبورتاق، على “ايميل” بعث به الأمين العام للإتحاد السوداني لكرة القدم “مجدي شمس الدين”، للجنة الانضباط بالإتحاد الدولي لكرة القدم “فيفا” وذلك بشأن أزمة نادي المريخ واللاعب النيجيري “أديلي” بشأن جواز سفره وذلك بعد أن ارسلت لجنة الانضباط “ايميل” لنادي المريخ لتسليم اللاعب جوازه خلال “24 ساعة”. وبحسب ما تحصل عليه “سبورتاق”، فإن الأمين العام للإتحاد السوداني طلب من لجنة الإنضباط بالفيفا، مهلة لمدة خمس ساعات لتسليم اللاعب جواز سفره برفقة تأشيرة الخروج النهائية وتذكرة سفر ليغادر إلى بلاده اليوم مع الإلتزام أن يقوم الإتحاد بمتابعة هذه الاجراءات والاشراف عليها مع نادي المريخ لحين مغادرة اللاعب لبلاده اليوم).
• انت مال اهلك؟
• تتخيلوا الحكاية دي.
• الاتحاد العام قام باستخراج جواز لحارس المريخ احمد بيتر .. وقام كمان بتسليم المحترف اديلي جواز سفره المحجوز بواسطة المريخ حتى لا يقع المريخ في ازمة ويتعرض لعقوبة من الاتحاد الدولي.
• الاتحاد شغال (جوازات).. بقى محل تقديم الخدمات للمريخ.
• الاتحاد العام اصبح يقوم بما تقوم به وزارة الداخلية … يستخرج الجوازات ويسلمها من اجل مصلحة المريخ.
• هذه الاشياء قام بها الاتحاد العام من اجل المريخ … هذا واقع وليس (تسريبات) للجاكومي.
• يعني نحن بدل ما نطعن في الجاكومي (الضل) احسن نطعن في (الفيل) الاتحاد العام.
• بدل ما نطعن في (التسريبات) احسن نطعن في الواقع الذي نراه الآن.
• الكلام دا ظاهر وواضح … ما عاوز ليه أي تسريبات .. او تلميحات.
• الاتحاد العام لم يكتف بكل هذه الخدمات التى قدمها للمريخ … الاتحاد عاوز يتآمر كمان على لجنة تطبيع الهلال.
• لا الجاكومي.
• ولا متعصب عبدالسلام.
• ولا الف جاكومي … وطن متعصب عبدالسلام ممكن يقدروا يعملوا حاجة في الهلال.
• على الهلال الانتباه لما يمكن ان يخطط ضد الهلال في الفترة القادمة.
• كمان فكروا ينقلوا مباريات الهلال من ملعبه.
• عندنا الجوهرة الزرقاء ونلعب في جبل اولياء.
• والله دي الدعم السريع ما يعملها.
• وزي ما بقول استاذنا صلاح مليشيا – إلّا الهلال.
• العبوا بعيد.
• …………..
متاريس
• لو في زول عندو مشكلة في جواز سفر .. يمشي على الاتحاد العام.
• الاتحاد أي مشكلة في الاتحاد بحلها.
• متصعب عبدالسلام الظاهر قنع من احمد بيتر .. لذلك تغزل في محمد المصطفى.
• نفس هذا الكلام كان بقولوه عن منجد النيل.
• لجنة تطبيع الهلال شغالة صاح.
• بعد اجازة النظام الاساسي … حلوا مشكلة المياه في استاد الهلال.
• مياه الهلال بقت عذبة.
• بعد اجازة النظام الاساسي … المياه عادت في النادي والاستاد الى مجراها الطبيعي.
• ….
• ترس اخير : ولا بهزوا شعرة في الهلال