صحيفة كورة سودانية الإلكترونية

ابدية الشهداء 

24

في السلك

بابكر سلك

ابدية الشهداء

*انطلقت مواكب شباب الثورة بالامس تخلع القبعات لشهداء الثورة في اربعينية فض الاعتصام

*وماراجع انا ليا مطالب

*هكذا كان الهتاف الاكثر ترديدا

*ارواح الشباب كانت تعانق ارواح اخوتهم التي صعدت الي السماء وهم ينفعلون للذكري التي لم تبارحهم ويتفاعلون مع ثورة صنعوها بعنفوانهم الذي ادهش العالم

*انها ثورة علي الاخلاق

*ولازال اصحاب الركشات يمارسون فوضي القيادة وانانية استخدام الطريق

*انها ثورة علي الاخلاق

*ولازال التجار يمارسون قرصنة لاتقل بشاعة عن بشاعة قناصة فض الاعتصام

*انها ثورة لاجل العدالة

*ومازال بعضنا يمارس الانانية القبيحة تجاه بعضنا الآخر

*انها ثورة للحرية

*ولا يدرك غالبيتنا ان الحرية الشخصية تنتهي عندما خط حقوق الآخر

*انها ثورة لبناء وطن اعياه النفاق وسرقة المال العام

*ولازال بعضنا علي المستوي الرسمي يمارس النفاق ولازال بعضنا من خلال تلك الشاشة الغشاشة القبيحة يقوم بتكسير التلج ووأد الحقائق وتزييفها

*ولا نأخذ علي رضا اغفاله احداث الممتاز من خلال برنامجة الذي نفترض فيه القومية يوم الجمعة

*لان تلك الشاشة لايشاهدها الا جهاز بثها

*فهي في رموتات الناس قد سكنها العنكبوت

*اذن مشوار الثورة لسه طويل طالما سلوك العهد البائد لازال يمارس من بعضنا

*المهم

*اعتماد الاندية الكبيرة علي جيوب الافراد استنكرناه

*طالبنا بخلق الاستثمارات التي تعين الاندية في الاعتماد علي نفسها وفي تطويرها

*ولكن بعضنا رأي خلاف ذلك

*بل واسس لسيطرة جيوب الافراد علي الاندية

*لذا اضحي موقف الاندية مرتبطا بتلك الجيوب

*ان انتفخت ازدهرت الاندية

*وان شقت الجيوب لطمت الاندية الخدود وتباكت علي لبن الجيوب المسكوب

*ولعل اعتماد الاندية علي جماهيرها قد حقق نجاحات كبيرة بنادي المريخ في عهد ونسي

*حيث تفاعلت قروبات الجماهير ونفرت داعمه الكيان فسيرته خير تسيير

*وجاء عهد المجلس الحالي

*اعادة تأهيل الاستاد قامت بها مبادرة الجار

*وصرفت مليارات

*نفرة التسجيلات

*ثم دعومات حل ديون الفيفا المصحوبة بالعقوبات

*حوافز تسجيل بعض اللاعبين

*علاج اللاعبين بتبرع كريم من رابطة الامارات

*كلها وغيرها تمت بدعومات جماهيرية ووقفات للاقطاب

*ما انجز في عهد المجلس الحالي لا اعتقد ان المجلس تحمل منه عشرة بالمائة من مجمل الكلفة

*حدث ذلك لان الناس تفرق بين الولاء للكيان وموقفها من المجالس

*كان علي مجلسنا استثمار ذلك في ايجاد استثمارات تعين النادي

*ولكنه لم يفعل

*اعتمد علي ولاء الشعب والاقطاب وتمسكوا بالكراسي طالما الامر ماشي

*كان الناس امام هذا المجلس منذ توليه الامور تلاته اقسام

*قسم معارض وبشدة

*لو المريخ شال كأس العالم للاندية في عهد هذا المجلس لايعترفون بالانجاز

*قسم مؤيد المجلس علي الاطلاق

*وديل لو المريخ نزل الاولي يبقي مكتوب و قضاء وقدر و المجلس عندهم ماقصر

*وقسم يقف بين هذا وذاك وينشد رفعة الكيان

*القسم الاخير ده المجلس خسرو كلو بالتصرفات الغريبة التي يأتيها

*بدءا من مؤتمر كأس السد

*ومرورا بالتعليق علي سداد الوالي لقسط شكوي وارغو

*ثم تصريح مادبو حول جماعة ود الشيخ وموقفه منها

*ثم كانت الطامة الكبري عند غياب المجلس بكامل هيئته عن الاحتفال الذي اقامه القنصل حازم بمنتجع البرير تكريما وتحفيزا للاعبين لنيلهم بطولة ممتاز الحرية والسلام والعدالة

*كنت اتوقع حضور المجلس بكامل هيئته واستغلال الحدث بتكريم القنصل حازم الذي طالت اياديه دعم النادي في عهد هذا المجلس في الصغيرة والكبيرة

*للرجل اياد لانعددها لاننا لن نحصيها اذا فعلنا

*وتكريم حازم ماكان بكلف المجلس شئ

*نجمة من الذهب ندقها عند صياغ امدرمان وشهادة شكر وعرفان

*التكلفة مافايته عشرة الف جنيه

*ولكن قيمتها المعنوية والادبية تسوي مليارات الدولارات

*ولكن المجلس كعادته غاب

*لانه ادمن الغياب عن المشهد

*مجلس لم يكتمل الا بمعسكر الامارات في سنوية زايد

*للاسف اثناء الاحتفال والناس تبحث عن المجلس

*كان السيد اسد

*يلاعب السيد شمس الدين الضمنة بنادي المريخ

*شيش بيش

*ومجلسكم قاعد علي البلاطة

*والغريبة انتوا قاعدين

*والاغرب انكم بتبحثوا عن اضافات تدخل المجلس وتدفع ليكم للتسيير

*واسد يصرح

*كلو تماااام التماااااااام ومافي عوجة

*هذا المجلس ذكرني الزول المشي لي عمو وطلب يد بتو

*الزول عاطل التكتح ماعندو

*عمو عارفو طبعا

*قام قال ليهو والعرس متين ياولدي؟

*زولنا قال انا جااااهز

*عمو قال ليهو شيلتك جاهزة؟

*زولنا قال عصام اخوي قال جايبها لي من ابوظبي

*عمو قال ليهو وسد المال؟

*زولنا قال احمد اخوي برسلو لي من كندا

*عمو قال ليهو وشهر العسل؟

*زولنا قال صاحبي متبرع لي اسبوعين بي شقة وبملي لي التلاجة

*عمو قال ليهو وبتسكن بعد شهر العسل وين؟

*زولنا قال ابوي داير يبني لي اوضة في البيت

*عمو قال ليهو يعني اسي انت جاهز؟

*زولنا قال جاااااااهز موية ونور

*عمو قال كلام كده انا ماسمعتو عشان موكب اربعينية الشهداء في اللحظة دي جا

*قلت لي جااااهزين موية ونور يا اسد وحردانين تكريم حازم؟؟؟

*ده نموذج من الحركات الاجبرت القسم المحايد من الناس علي عداء المجلس يا اسد ورفاقه

*الزول مفروض هنا يكون حلو

*المهم

*كعادة التسجيلات

*الزناطير اعلاميا دوروا

*اللاعب العربي

*الاحسن من سومانا

*قلب الدفاع الكاميروني

* برشلونة تعض بنان الندم علي خطف الهلال لاسكندر

*ميسي يقول لو لقيت اسكندر مكان سواريز لنلنا كل البطولات لبرشلونة

*لاحديث للفنيين في نهائيات افريقيا الا عن اسكندر الرهيب

*شركة بوما وشركة اديداس تتنافسان علي موافقة الهلال لتصنيع حذاء لاسكندر

*مندوب بوما قال اديداس لن تستطيع صنع حذاء للاعب مهول مثل اسكندر كرعينو الاتنين شمال

*ده كلو

*وامبومبو داير حقو

*وفي آخر الموسم

*نقطة صفر جديد

*كاس ماجابو النقر مابجيبو اسكندر

*قطركم صفر

*هو جنس صفر

*ايها الناس

*ان تنصروا الله ينصركم

*اها

*نجي لي شمارات والي الخرتوم

*والينا

*شمارنا الليلة لمعتمدا لينا

*هو واحد من ابناء المدينة

*معتمد امدرمان ياوالينا

*في شارع العرضة يوجد مصرف مبني ومسقوف للامطار علي جانبي الشارع معمول لينا

*الكافتريات موصله فيهو العفن شاقينا

*والاقبح من كدة حتي الصرف والسابتك تانك موصل فيهو وبأذينا

*عفنه شديدة

*وموية طافحة

*قبل الثورة شكينا واشتكينا

*ومافي زول اشغل بينا

*اظن القصة فيها نفع واستنفع

*ونحنا الباعوض والعفن مارضنا ومورمنا وشاقينا

*الموقع غرب جامع فيصل ولحدي بداية الاحفاد ياوالينا

*شمال الشارع دي المنطقة البتعنينا

*نأمل فيك يامعتمدنا

*ولا نطربقها برانا

*ولا نرجي المدنياااااو؟،،

سلك كهربا

ننساك كيف والكلب قال العفن كتيييييير شيلوا الصبر

والي لقاء

سلك

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد