اعلام المريخ و(الزرارة) السادسة

صابنها
محمد عبد الماجد
اعلام المريخ و(الزرارة) السادسة

عندي صاحبي مريخابي …اجتهدت كثيرا على ان اقنعه بعدم ضرورية (الزرارة) السادسة في القميص.
كل محاولاتي في ذلك باءت بالفشل.
متل زيادة الضلع.
ترسل الولد عشان يجيب ليكم زيادة ضلع .. يجي شايلك صحن (قرع).
قرع المناسبات طبعا بكون قطعة قرعة واحدة وصفيحة موية.
ما عارف بعملوا كدا ليه؟
القرعة عائمة في الصحن متل (الوتد).
زي المركب في البحر.
المهم هسع دا ما موضوعنا.
ما تنظر لينا.
موضوع (القرع) دا عاوز ليه عمود براهو.
عمود ما صحن!!
نرجع للزرارة السادسة.
موش في ناس كتيرة في الحياة دي بفتكروا اهم شيء في القميص (الزرارة السادسة).
الله يطراهم بالخير.
ما عارف انا؟ – لكن زمان كانت في موضة بهذا الشكل.
الموضوع دا كان ثقافة عديل كدا.
قميص ما فيه ست زرارات ما تلبسو..ولا تمشي عليه. وان مشيت عليه ألبسو من غير مكوة.
نظام ما شغال بالموضوع.
زمان كانت في ثقافة كدا.
صاحبي المريخابي كان (متكرّس) في الحتة دي.
اهم شيء عندو في القميص الزرارة السادسة.
قبل الماركة واللون والخامة بعاين في الزرارة السادسة.
زولنا دا شال هذا الهاجس سنوات عديدة.
بقول ليك شخصية الزول بعرفها من الزرارة السادسة.
والقميص الما فيه ست زرارات في الغالب الزول البكون لابسو زول ما عندو شخصية.
حاولت اقنعوا ان هذا الكلام لا اساس له من الصحة.
قدر ما شرحت ليه …ما نفع.
قلت ليه انا قريت لي شوية حاجات في (الفلسفة)…وحتى (الروس) ديل وصلتهم ..اصلو كلامك دا ما قابلني في حتة.
موضوع الزرارة السادسة دي ما سمعت بيه إلّا عندك.
الافلام الهندية دي ما خليت لي فيلم.
المسرح اليوناني.
الاغريق.
المغامرون الخمسة.
الشياطين الـ 13.
اصلو نوع كلامك دا ما لاقني في حتة.
وزولكم مصّر على موضوع الزرارة السادسة.
كرهني عيشتي.
واقف لي في حلقي.
أي كلمة اقولها ..ينط لي متل دو الاسود.
وقت يشوف ليه زول لابس ليه قميص فيه ست زرارات بقول ليك الزول دا (مسؤول)!!
او الزول دا (فاهم)!!
من غير ما يقول أي حاجة.
الفهم عندو في الزرارة السادسة.
قلت ليه يا ود الناس الموضوع دا ما عندو علاقة بالفهم او الفلسفة.
ما تقعدوا تشرّعوا لينا حاجات من رأسكم.
والله نحن عندنا ناس في الحلة …كانوا موظفين كبار الى ان نزلوا معاش ما عارفين القميص فيه كم (زرارة)؟
ما بيشتغلوا بالموضوع دا.
الكلام دا عندهم حاجة ثانوية ساكت.
ولا عندها قيمة.
ولا بفكروا فيها.
لكن انا اعمل شنو مع المريخابي الملاني فقر دا؟
زولكم معلق في الزرارة السادسة.
تقول عاوز يقرأ طب.
نفس الزول المريخابي دا.
وبي نفس الفهم.
ح اقيف ليكم عندو.
نفس المنطق.
المريخاب ديل .. هاجموا ابوعشرين …عشان الكورة سقطت منو؟ تقول سقط النظام.
ما خلوا ليه حاجة.
قالوا كيف ابوعشرين يبعد الكورة بهذه الصورة؟
انتوا مالكم؟؟
الجماعة (متوكين) شوية من ابوعشرين.
متألمين.
لغاية الآن انتقال ابوعشرين بلاوز بيهم.
انا ما عارف الزعل في شنو؟
سكتنا.
قبّلوا على محمد عبدالرحمن الغربال …اكتر لاعب (محترم) في الكورة السودانية.
ما عارف قايمين على الغربال في شنو؟
زول سجل في مرماهم في اخر مباراة …وسجل في مرماهم قبل هذه المباراة.
ح تقولوا عنو شنو؟؟
زعلانين عشان الغربال سجل بـ (حرقة).
يركب (ركشة) يقولوا ما صاح.
يشيل الكورة بعد الهدف ..يقولوا كدا غلط.
الغربال يعمل ليكم شنو؟
فكوا الغربال ..قاموا في بوجبا ..قالوا لاعب (متفلسف).
لكن هو متفلسف من فراغ؟
أي لاعب في الهلال مفروض يكون (متفلسف).
عادي.
هو بلعب في فريق ساهل.
هاجموا بوجبا.
انتقدوا صلاح عادل.
ما خلوا ليه شيء.
عملوا كل هذه الاشياء.
استهدفوا الافضل في الهلال.
وعاوزين بعد كل هذه الاشياء … الفالحين بتاعين الزرارة السادسة …ما نهاجم ليهم صلاح قوش.
موضوع صلاح قوش عندهم عادي.
لكن الغربال لا.
ابوعشرين كيف يعمل كدا؟
بوجبا متفلسف.
صلاح عادل…اعترض على الحكم.
يهاجموا في لاعبي الهلال على كيفهم ..وقت تهبش ليهم صلاح قوش يقعدوا يكوركوا.
اها اقول ليكم.
لا صلاح قوش.
ولا حازم مصطفى.
الاتنين ما بقدروا يحضروا مباراة ام درمان.
ولا بقدروا يدخلوا البلد من الاساس.
عشان كدا ركزوا في الغربال.
واصلوا في حملتكم.
انتوا ما قالوا ليكم الغربال دا كل ما يهاجموه ..برد بالقون.
بالبوز.
قون زي دا انا ما شفتو.
بالبوز يا حبيبي بالبوز.
قالوا شنو؟
قالوا كيف اعلام الهلال يتكلم عن زيارة صلاح قوش لبعثة المريخ في القاهرة – في نفس الوقت عندهم موضوع انهم يهاجموا الغربال وابوعشرين وصلاح عادل وبوجبا عادي.
زول ما عندو علاقة بالكورة.
ومتهم هارب.
وتسبب في مجازر دموية في السودان.
ومطلوب بالانتربول.
وقت يكتبوا عنو وينتقدوه يعترضوا على ذلك بتزعلو ليه؟
وناس الكورة واللاعبين يمارسوا عليهم حملة صحفية وما يخلوا ليهم حاجة.
نوع دا قابلكم في حتة؟
نحن موضوع صلاح قوش دا ما بنخيله.
كل يوم بنكتب عنو.
انتوا اكتبوا عن الغربال.
ابوعشرين.
بوجبا.
صلاح عادل.
ونحن بنكتب عن صلاح قوش.
لمن نعرف القتل دكتور بابكر عبدالحميد منو؟
……..
متاريس
في خبر انو الاتحاد الافريقي عيّن رضوان جيد لمباراة الهلال والمريخ في ام درمان.
رضوان جيد دا بقى ثابت في تشكيلة الهلال اكتر من الغربال.
الاتحاد الافريقي يقصد ان يستفز الهلال.
الناس ديل عاوزين من العلال شنو؟
مرة يحرموه من جمهوره.
ومرة يجيبوا لينا رضوان جيد.
حتى لو اختيار جيد كان خبر صحيح؟
اقول ليكم ما تركزوا في الموضوع.
ما تشتتوا تفكيركم في هذا الموضوع الذي لا قيمة له.
ركزوا في المباراة.
ما تشحنوا روحكم ضد الحكم.
ح نغلب المريخ والحكم ان شاءالله.
ما تعطوا رضوان جيد اكثر مما يستحق.
بي رضوان او من غير رضوان الهلال لا بد ان يغلب.
واصلا حكام الاتحاد الافريقي كلهم شبه بعض.
رضوان او ما رضوان واحد.
ركزوا في الكورة.
مباراة الهلال امام الاهلي المصري …الهلال ركز مع الجمهور.
هسع عاوزننا نركز مع رضوان جيد.
اصلو ما عندنا عذر.
وما بنعمل لينا شماعة.
بي رضوان.
بدون رضوان.
بي جمهور.
بدون جمهور.
لازم نغلب المريخ.
لو جابوا لينا ابوجريشة حكم للمباراة لا بد ان ينتصر الهلال ان شاءالله.
مباراة بكرة امام الاهلي الخرطوم يجب ان ينتبه لها الهلال جيدا.
الاهلي الخرطوم متصدر للممتاز.
الهلال في كل مبارياته المحلية والقارية عندما يواجه أي فريق يواجهه وهو في افضل حالاته.
ما تفقدوا نقاط في الدوري الممتاز بسهولة.
الهلال دائما بضيّع نقاط كتيرة في البداية.
عاوزين الحسم من البدايات.
ركزوا الآن في كرة الاهلي الخرطوم.
الدوري الممتاز بطولة الهلال المحببة.
الحفاظ على اللقب …امر مفروغ منه ان شاءالله.
…..
ترس اخير : في زرارة ناقصة!!