صحيفة كورة سودانية الإلكترونية

الاستئنافات ظلمت الهلال وقوميز انصفه!!

2٬209

صابنها

محمد عبدالماجد

الاستئنافات ظلمت الهلال وقوميز انصفه!!

• هل كانت لجنة الاستئنافات في اتحاد كرة القدم السوداني تحتاج لكل هذا الوقت لكي تصدر قرارها هذا في قضية ثلاثي الهلال رمضان عجب ومحمد الرشيد وبخيت خميس والتى ايدت فيه قرار لجنة اوضاع اللاعبين والتى تقوم مقام لجنة فض النزاعات.
• انهم يفسرون الماء بعد الجهد بالماء.
• الموضوع لو كان فيه (دم) ما كان تفرّق بين كل هذه (اللجان).
• رمضان عجب اوشك ان يصبح (مساعد مدرب) والاتحاد ولجانه لم تصدر قرارا في قضيته إلا بعد حول.
• هذا القرار كان يفترض ان تكلف به لجنة نبيل اديب (لجنة التحقيق في مجزرة فض الاعتصام) حتى تتم الناقصة.
• على العموم ما كان قرار هذه اللجان المعيب يحتاج لكل هذا (اللت والعجن) – كان يمكن ان يصدر هذا القرار في خلال اسبوع.
• هذا القرار كان يمكن ان يصدر من (لجنة شعبية).
• او كان يمكن ان يصدر من مجلس الاباء في مدرسة مرحلة اساس.
• كان يمكن ان تكلف به لجنة صيد الاسماك عن طريق (القصة القصيرة).
• الروس بصيدوا (الاسماك) عن طريق (القصة القصيرة).
• لم يكن الموضوع يحتاج لكل هذا الزمن.
• تأجيل.
• ومرض.
• وتحويل.
• وتكليف.
• العقوبات الامريكية على السودان لم تستغرق كل هذا الوقت – مع مراعاة فروق الوقت.
• والقضية.
• عشان ما تقعدوا تحسبوها لي.
• ولكن لأن كل شيء في السودان يمر بهذه السلسلة العظيمة من اللجان والأجزاء وكأننا في انتظار الجزء التاسع من (ليالي الحلمية).
• انتوا عارفين اسامة انور عكاشة ما استغرقت ليالي الحلمية والشهد والدموع منه كل هذا الوقت.
• هذا هو السودان.
• على ما يبدو ان (التهديدات) التى تعرض لها رئيس اللجنة واعضاء لجنة الاستئنافات عملت شغل.
• عموما نحن ذاتو لم نكن ننتظر منكم اكثر من القرار
• بيدرو جاهز.
• ومنتظر القرار – وكل ما كان القرار معيبا كان كسبه اسهل.
• براكم بتجيبوا الكلام لي روحكم.
• قرأت تغطية لمؤتمر قوميز مدرب المريخ السابق ومدرب سيمبا الجديد تصريحات غطتها المواقع على هذا النحو.
• ننقلها لكم كما وجدناها – والعهدة على المواقع الالكترونية.
• غوميز : انا سعيد جدا في تنزانيا واكبر فريق في تنزانيا.
• زول ينتقل من المريخ الى سيبما طبيعي يقول مثل هذا الكلا.
• غوميز : لقد اتفقت مع المريخ على عدة صفقات قبل نزولي للسودان ولكن دايما تتماطل الاداره في الامور وتخرج بدون فائده.
• ناس المريخ مفروض ما يزعلوا من سوداكال – نحن الكاردينال عمل فينا نفس العملية ، وتسبب في هروب حمادة صدقي بعد ان عجز المجلس من تلبية طلباته.
• واخشى ما اخشى ان تسير (لجنة التطبيع) على هذا المنوال.
• نحن الآن بنسمع عن اسماء (كبيرة) وما في حاجة.
• والتسجيلات تنتهي في نهاية شهر يناير.
• نرجع للمؤتمر.
• غوميز : كنت مصممآ للخروج من السودان لان الفريق بلا طموح وبلا فعاليه ويمكن ان تحدث اشياء في قادم الايام.
• فريق بدون طموح عرفناه.
• بدون فعالية – ما في زول قال حاجة.
• هذه الامور نحن متفقين فيها.
• ما فيها غلاط.
• لكن حكاية (ويمكن ان تحدث اشياء في قادم الايام) – هذا الكلام ما وقع لينا.
• يا ربي قوميز قاصد شنو؟
• قاصد الاهلي المصري؟.
• ام قاصد مباراة القمة بين الهلال والمريخ.
• والله (ويمكن ان تحدث اشياء في قادم الايام) مفروض ناس المريخ ما يرموها واطة.
• الكلام دا صعب.
• ونحن الكلام البنقوله ليكم في (وشكم) بتسمعوه من ناس تانية في (ضهركم).
• احسن نقوله ليكم في (وشكم).
• غوميز : الدوري السوداني صعب جدآ واداء الفريق لم يكن ثابت لان اللاعبين جلهم كبار في السن.
• حكاية اللاعبين جلهم كبار في السن دي جديدة.
• الزول دا انتهي منكم.
• وناس المريخ فرحانين بالجزولي نوح.
• لا اعرف ماذا كان سوف يقول قوميز لو انه درب رمضان عجب.
• اكيد قوميز قاصد بكري المدينة.
• والاكيد ان قوميز سوف يلعب على هذا (العامل) عندما يواجه سيمبا فريق المريخ.
• غوميز : كل الفرق تلعب على نادي واحد يتبع للهلال وهناك هلاك واضح على ارضية الملعب والمريخ ليس له ملعب خاص.
• كلام جميل.
• وعين العقل.
• وما بتغالطوا فيه اتنين.
• غوميز : احببت السودان جدآ وتعرفت على لاعبين وهناك فريق واحد سوف يصل للعالميه وسيواجهنا هنا في ودية سيمبا علينا ان نستفيد منه كثيرا.
• امك.
• قوميز جاب اخرو.
• الزول دا مكتول في (الجوهرة الزرقاء).
• ناس رمضان عجب ومحمد الرشيد ما سمعوا الكلام دا.
• نادي واحد سوف يصل للعالمية.
• الكلام دا ما كلامنا – دا كلام قوميز.
• يا رمضان عجب اذا قوميز الفرنسي وصل لهذه العلومة انتوا الجابركم على (التلتلة) دي شنو؟
• غوميز : قد تركت المريخ في اصعب احوال ولكن لا جدوى من وجودي هناك قد تحدث مفاجآت قادم الايام.
• الزول دا برضو مصر على حكاية فاجآت قادم الايام..
• انتوا في شنو؟
• قوميز قاصد شنو؟
• غوميز : اذا طلب مني الهلال التدريب لم ارفض او افكر لانه يلعب كره حديثه وبه لاعبين مكتملين وبه ثلاثه فرق سيقدمون نفس المستوى.
• قوميز قال كدا.
• الزول دا (هلالابي) اكتر من (زوران).
• معقولة قوميز معجب بالهلال لهذا الحد.
• قوميز انصف الهلال اكتر من لجنة الاستئنافات.
• والله يا قوميز قبل ما كان تمشي كان تدي رمضان عجب ومحمد الرشيد رأسهم.
• الحمدلله – قوميز ما قال مشى من السودان عشان ازمة البنزين.
• الحمدلله – قوميز ما جاب سيرة (الرغيف).
• الزول دا لو جاب سيرة الرغيف كان فضحنا فضيحة.
• …………
متاريس
• والله يا جماعة الكهربة كانت قاطعة.
• وبكتب بالرقراق.
• الغريبة اني بكتب في جهاز (لاب توب) فيه مشكلة في حرف (الميم).
• يعني قدر ما اضغط حرف الميم ما بتكتب لي في الكلمة.
• عشان كدا ممكن تلقوا ليكم كلمة (ناقصة) ميم.
• تتخيلوا مرات بعمل استنساخ لحرف (الميم) من كلمة فيها (ميم) عشان انسخها في الكلمة التى اريد ان اكتبها.
• ووقت اكتب لي سطر ما فيه (ميم) بشعر بسعادة كبيرة.
• وكل ذلك وسكرتارية (ريمونتادا) في الانتظار.
• والساعة وصلت حداشر.
• عشان كدا ممكن يجيكم العمود الليلة ناقص.
• الزول وقت يكون مستعجل لازم تحصل ليه مثل هذه العوارض.
• وكورة اتلتيكو شغالة …وما شفت فيها أي حاجة.
• الله يجازي ناس الكهربة.
• من فوائد رفع عدد اللاعبين الى 32 لاعبا – ان الهلال سوف يسافر الى تنزانيا لمواجهة سيمبا ومازيمبي وهناك 10 عناصر من الهلال تم اختيارها للمنتخب.
• تتخيلوا كيف كان سوف يكون الوضع لو ان الكشف كان فيه 25 لاعبا فقط.
• ان شاءالله شداد يكون اقتنع
• قوميز قالوا عاوز حافز الصعود لمرحلة المجموعات.
• رسلوا ليه حقو.
• حافز التازي.
• مباراة الهلال بعد العودة امام الخرطوم الوطني.
• ومن هسع اعملوا حسابكم على كدا.
• ابراهومة بكون (لابد).
• والشيخ لا بعرف ليكم جمال سالم ولا بعرف ابوعشرين.
• والله يا جماعة بكتب لي في عمود (الميم) عذبتني فيه عذاب.
• غايتو بس.
• الله يسهل
• قوميز دا برجع ليه.
• ……
• ترس اخير : الحمدلله انتهيت.

قد يعجبك أيضا
4 تعليقات
  1. جلابي الدوحه يقول

    اديك حرف الميم… م..ميؤس منك
    م ….ماقادر تملي عامودك غير عن المريخ
    م….مىيخنا وعاجبنا فتس هلالك
    م…مبروك عليك قوميز
    م…..مالك بترجف في الكتابه
    م….ما ممكن تكون بتحب المريه للدرجه دي
    م. ما وقته الكلام الفعل جاي
    م…. ما تتوقع تمشو لقدام ابقو في صفركم
    .م…مع السلامه اخوي نلقاك ميم ميم

  2. صلاح يقول

    ههههه ياخ جننت الجماعة جن يا ود عبد الماجد وكرهتهم المجموعات ذاته وندمتهم على اليوم الإتجرأوا فيه على مقارعة كبار القارة الأفريقية ناس الهلال سيد البلد أبزرد والأهلي المصري ومازيمبي الكنغولي !!
    الخواجة قنقليز مسح بالمرخرخين الواطه وجاب سيرة الكوامر كبار السن 😆😆😆
    غايتو الزول ده عرفها من بدري وقام صوف، لأنو عارف الشغلانة ماشة على بلاوي متلتلة، وليهو حق مدام ولدنا صبي الكاهن الأعظم أليخماو العجوز أبو المستعار المندلاوي ذااااته بطنه كلمة والفار بقي يلعب في عبه !!
    قلت لي قال ليهم جل اللاعبين من كبار السن، والله ده كتلهم كتل 😄😄😄
    قوميز طلع طابور هلالابي، وما بعيد يكون جابه سوبطة عشان يدمر المرخرخ 😝😝😝

  3. روجر ميلا يقول

    32 لاعب دي شنو ؟ ما يا 30 او 35. الاتحاد السوداني ده ليه دايما شغال غلط و واقف في طريق مصلحة الاندية؟
    الكاف قال 40 لاعب والاتحاد يقوم يفص 8 لعيبة!!

  4. احمد التجاني يقول

    اقول لجلابي الدوحة الحاقد , وانتو عندكم شغلة غير الهلال؟ الكلام القالو غوميز كلام خطير لكن انتوا بتكابروا وخليكم وراء اليخماو وابو دليبة وعمك تنقو. ديل اللي حيطيحوا بالمريخ في الهاوية.

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد