البختك محل (راحتو) ما تبقى ليهو (تعب) !!

قزاز ورذاذ

محمد الطيب الأمين

البختك محل (راحتو) ما تبقى ليهو (تعب) !!

* في حياتنا في ناس بالنسبة لينا (راحة) .
* ناس لما نكون تعبانين وزهجانين بنمشي ليهم عشان نرتاح .
* هم ملاذ وأمان وإطمئنان .
* زول بيكون (بندول حياتك) .
* وفي البكون (صداع في دنياك) .
* الذكي هو الذي يحافظ على (قِيمتو جواك) .
* (البِختك محل راحتو ما تبقى ليهو تعب) .
* و(البفتش فيك ضحكتو ما تديهو وجع) .
* وبما أن ذلك كذلك فأن الهلال في حياتنا هو (راحة) .
* نحن شايلين الهلال (راحة) في حياتنا ولهذا نرفض أن يبقى لينا (تعب) .
* هو ضحكتنا ومصدر الأمان الأكبر.
* لو لم يكن للهلال دور في الحياة السودانية خلاف دوره في إسعاد الناس لكفاه ذلك .
* في الوقت الراهن ليس هناك (حدث قومي) يدخل البهجة في نفوس (٨٠%) من الشعب السوداني غير إنتصار الهلال .
* ولذلك الهلال هو (حياة بالنسبة للناس) .
* هذه القيمة الإجتماعية والرياضية يجب أن تكون محل تقدير من نجوم الفريق .
* لابد أن يعرفوا مدى تأثير الفوز عند الناس وما هو أثر الهزيمة .
* عندما ينظر لك الشعب باعتبارك (فارس رهان) يجب أن لا تخيب ظنهم .
* خليك زي ما الناس شايفاك.
* خليك ضحكة عشان أنت اصلاً ضحكتنا .
* بالتركيز والإجتهاد يستطيع صاحب المقام الرفيع أن يحقق نتيجة تنقله لمجموعات الأبطال.
* المباراة لن تكون سهلة نظراً لدوافع الخصم وطموحه المشروع .
* الاشانتي كتاب مفتوح بالنسبة للهلال والعكس صحيح .
* لا تتوقع أن (يدافع) الاشانتي فهو لا يملك ما يدفعه للدفاع.
* كل إستراتيجية الاشانتي قائمة على (معادلة) نتيجة الذهاب كخطوة أولى.
* سيكون الهم عندهم تسجيل هدف مبكر في شبكة الهلال يعادل النتيجة و(يصفر العداد) ومن بعد ذلك (الحشاش يملأ شبكتو) .
* هكذا يفكر مدربهم وهكذا يفهم كل من له دراية بكرة القدم .
* لا أظن أن الهلال سيكتفى بصد الهجمات الغانية .
* الهلال سيدافع عن نفسه بالهجوم على الغاني وهذا هو السلاح الأكثر خطورة .
* ابني حساباتك بشكل يربك حسابات خصمك.
* حسابتهم واضحة ونحن حساباتنا أوضح.
* المجموعات يعني المجموعات .
* الروح والتركيز والرغبة في التسجيل أهم حاجة .
* تضيع الفرصة الأولى والثانية والثالثة ولكن الرابعة والخامسة بتدخل .
* ما فيش يأس.
* ولا تراخي .
* ألعبوا بنفس واحد (من الصفارة للصفارة) .
* حتى لو لا قدر الله وسجل الاشانتي هدفاً علينا أن نتماسك وستكون الكلمة لنا .
* نحن الهلال .. هم منو ؟
* الهلال (حوت) أفريقيا الذي ابتلع كبار القارة .
* ننتظر أداء مسوؤل من نجوم الهلال.
* ننتظر النتيجة والعرض والشخصية والحضور .
* لو ظهر الأزرق بالمستوى الذي ظهر به أمام الاشانتي في لقاء الذهاب سنحسم الأمور مبكراً إن شاء الله .
* الأجواء بشكل عام مثالية .
* والمغريات كبيرة .
* حافز المستشار (٢٢) مليار دافع كبير للأبطال.
* المباراة في ملعب اللاعبين .
* أي حداشر هم محل ثقة .
* لو لعب محمد أحمد سندعمه ولو لعب بوي سنسانده.
* نثق في مؤيد ولا نشك في السموأل ، نرحب بنزار حامد ومرحبتين بروفا.
* اهلاً ببشة الصغير ومليون مرحب بجيسي .
* فيني ولا الغربال ولا عيد ولا الشعلة ولا الضي كلو تمام.
* فارس واوتارا والشغيل ومجاهد فاروق وبوغبا .. ما في مشاكل .
* أما أبو عاقلة فهو أبو عاقلة .
* وأبو عشرين يكفي أن نقول هو (لون الدم) .
* نسأل الله أن يوفق الهلال ويكتب له النصر المبين .
* لا المجموعات غريبة على الهلال ولا الهلال غريب على المجموعات.
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* والله في .