< وتاني قامت كتاحة الديون
< سلمون جابسون
< ساكي حقو لي يوم الليلة
< نيف وخمسون الف دولار
< حصل اتفاق تسوية اختصر القصة في تلتين الف دولار
< وما اتنفذ
< والقصة دورت من جديد
< ام ضبيبينة الديون دي ارهقتنا وقللت نومنا
< وده باب رافض يتقفل
< شغال معانا سهر الجداد ولا نومو
< حقو الناس تكون امينة مع نفسها وتعترف بان جل اشكالات المريخ هي تلك الديون الخرافية
< ما بقول المجلس ده قفل اطناشر باب من ابواب جهنم الديون
< ولكن بقول شعب المريخ ومجلسه قفلوا اطناشر باب من تلك الابواب
< لأنو اسهامات الاقطاب وقدامى الاداريين والمحبين كانت حاضرة
< وعشان نقفل الموضوع ده
< نشتغل مع الديون بنظرية كتلوك ولا جوك جوك
< نسكها نحنا بدل تسكنا هي
< ونحصرها
< الباقي غرزه وولدو وهاي وكونلي
< نعمل قروب للغرض ده
< او نترك الامر لي شفوت قروب الكرامة ان تبقى بجعبتهم شيء
< ونصل مع الدائنين لتسويات
< نغريهم بالتنفيذ الفوري
< ونكون انجزنا
< وارتحنا من هجم النمر هجم النمر
< بس الخوف البنغالة بتاعين النضافة ديك يجونا ناطين كمان
< يقطع الدين ويقطع سنينو
< المهم
< شفت دق صدرو لموضوع جابسون
< حايقرض المجلس التلتين الف دولار حلاً للمشكلة
< على أن يعيدها له المجلس من استحقاق البطولة العربية
< وده في حد ذاتو خير وعمل مقدر من ذلك الشفت
< بعد داك
< نقبل على الديون الداخلية
< دعاوى امام المحاكم
< تنفيذات مصرحة
< احكام شايلنها الناس
< ونزاعات امام هيئات التحكيم المختلفة والمنتشرة
< انكار الديون والهروب منها كواقع مع فرقعات فشل المجلس المفلس في حلها
< لاتخدم قضية
< الحل ندفع بس
< نعترف بها
< نحصرها
< نسددها
< الجدل البيزنطي حول مقدارها
< واسبابها
< ومتين تحملتها ذمة المريخ المالية
< كلو كلام والسلام
< جدل لايخدم القضية
< غير كده حانقعد كده
< المهم
< بعض الاخوة ومن ضمنهم الاخ مزمل شايلين من عمودي بتاع سفرة جابت نفرة ودفرة
< تناقشنا من خلال قروب يجمعنا
< وأوضحت لهم مقصدي
< بل أرسلت لهم نموذج من رسائل من أعنيهم في ذلك العمود
< ولولا تمسكي الشديد بعدم المساس بأسماء ورد ذكرها في رسائل من أعني المتبادلة بينهم
< لقمت بنشر كل تلك الحوارات التي تتحدث عن نفرة إعادة قيد الغربال
< وتهدف لأهداف أخرى شرحتها للجماعة
< وأنا لسه مصر على ما ورد بذلك العمود
< ولكل حدث حديث
< بالتأكيد سيأتي الوقت المناسب لكل شيء
< أما الإخوة في قروب الكرامة
< ما كان عندي معلومة عن مساهمتهم في إعادة قيد الغربال إلا بعد ذلك الحوار الذي دار بيني وبينهم والأخ مزمل
< اشدت بهم ليس نفاقاً ولا محاباة
< ووصفتهم بالشفوت
< وهي رتبة مريخية أطلقتها من خلال عمودي على جماهير المريخ أيام يانتشفتن يانتبشتن
< وأحمد الله إنها أصبحت وصفاً مريخياً مشرفاً نتبادله فيما بيننا في القروبات والصحف وجميع ملماتنا
< ما علينا
< أشدت بنفرة رسوم الشكوى
< برغم ما أحمله من رأي قانوني مخالف
< واحتفظت بذلك الرأي حتى لا يأخذ به الاتحاد في دفوعه أمام كاس
< ويمكنني أن أفصح عنه بعد تقديم الاتحاد لمذكرته وحجز الأمر للقرار وقبل القرار
< فقضية المريخ تهمنا جميعاً
< وهي قضية موضوعية للمريخ حق فيها
< ولكن للتقاضي شكلين
< ولكل شكل أثر
< أكتر من كده ما بقدر أقول
< ما بقدر أصرح
< يمكن شيء يفوح والناس ما بتريح
< أيها الناس
< إن تنصروا الله ينصركم
< آها
< ما نجي لي أي شيء
سلك كهربا
ننساك كيف والكلب قال معقولة بس!!!!
والي لقاء
سلك