• زمان حاجة (النزيهة بنت كلوة) وقت تنزنق ليها في حاجة، بتشيل ليها حبات (بيض) من (قفص الجداد( وتمشي تبيعهم في السوق.
• في سوق التلاتاء.
• تحرم عيالها.
• وحاجة النزيهة بنت كلوة كانت وقت زنقتها تكون شديدة ، والموضوع كبير، بتقبض (الديك) ذاتو من (قفص الجداد) وتمشي تبيعو في سوق التلاتاء.
• زمان (الديك) كان بفك ليها حيرتها…وبقضي ليها غرضها.
• الديك كان عندو وزن في السوق.
• وعندو قيمة.
• وشنة ورنة.
• الموضوع تطور شوية، وبقى الزول من تشوفو شايل (انبوبة الغاز) وعارضها للبيع ..تعرفو طوالي الزول دا في ورطة.
• حاجة تخليك تعصر على (انبوبة الغاز) دي ما حاجة ساهلة.
• إلّا الشديد القوي.
• تفك الخرطوش ..وتبيعها بي (غازها).
• وفي ناس ما بعرفو يتصرفو ..بيقلو (التلاجة)…وبيعرضوها في السوق.
• ومرات بشيلوا (التلفزيون).
• أي زول بتصرف حسب امكانياته.
• ناس الزمن دا.. الواحد وقت يحصل ليه (ظرف) بيعرض (موبايله).
• المعنى:
• بفك الموبايل.
• دي كلها حلول ممكن تفك ليك حيرتك.
• وعشان ادخل ليكم في الموضوع طوالي ..واقصو ليكم.
• والله أنا الحلول دي قاصد اقدمها (خدمة) لي ناس المريخ…ناس مامون ابوشيبة بلا الحكام ما عندهم شغلة.
• النقة البعملوها في الحكام ..لو عملوها في السوق …نادي المريخ كان هسع ح يكون أغنى نادي في المنطقة.
• الجماعة ديل لا بد يشوفوا ليهم حل.
• الزول وقت يكون مديون بيعمل أي حاجة.
• بيبيع التلاجة.
• بفك التلفزيون.
• الموبايل.
• دهب المدام.
• يشيل ليه (ضلفة) من الدولاب يبيعها.
• ان شاءالله يبيعها (حطب).
• ناس المريخ موضوع (الدهب) دا جربوه.
• ما غريب عليهم.
• بعتوا كاس الدهب.
• تنططوا في عيونكم متل كرسي الخيرزان.
• جمال الوالي زول زكي.
• ملأ المريخ (ديون).
• وقبل ما يمشي باع كاس الدهب.
• يعني ما عندكم حل.
• تشوفوا ليكم (تلاجة).
• تلفزيون.
• ديك.
• دستة بيض.
• طبق كامل.
• اتصرفوا.
• ان شاء الله تفكوا ليكم (مروحة) تفك ليكم حيرتكم.
• بتصرفكم.
• لكن (المروحة) ما بتجيب ليكم أورنيك لاعب هاوي.
• الليلة أنا ح أمشي دلالات الجمعة في العاصمة القومية.
• بمشي اتلبد.
• ويتلبد يعاين لي.
• أي زول بلقاه شايل ليه (انبوبة غاز) بيعرض فيها ..بعرفو ليكم طوالي.
• بعرفو ليكم (مريخابي).
• قالوا ناس المريخ قروش (قصاري) بلموا فيها بالموبايلات.
• أي واحد عندو موبايل عارضو للبيع.
• نادي بدون رئيس.
• وبدون نائب رئيس.
• نحن سوداكال عذرناه.
• سوداكال معذور عليه (9) طعون والمفوضية رفضت فوزه.
• قريش نائب الرئيس مالو؟.
• الزول دا وين؟.
• يا قريش هسع لو كان مشيت الاتحاد وبقيت نائب رئيس لكمال شداد ما كان أحسن ليك من الجهجة دي.
• مالك ومال وجع الرأس.
• قريش قفل موبايلو.
• نقة التسجيلات كتيرة.
• ناس المريخ السنة دي ورقهم كعب.
• النزول ما تموه.
• حق الحكومة.
• ناس المريخ لغاية الآن سجلوا ليهم لاعب واحد.
• وهم لا دوري.
• ولا كاس.
• ولا رئيس.
• ولا نائب رئيس.
• لو الاتحاد السابق كان موجود الى وقتنا هذا ..كان ناس معتصم جعفر واسامة عطا المنان شافوا ليهم (حلول) للمريخ.
• ما كان بتحيروا.
• تذكروا ناس معتصم جعفر …وقت المريخ يكون عاوز ليه لاعبين مفكوكين ..بقوم يعمل نظام (الاقرارات) قبل بداية التسجيلات.
• ولمن الهلال يكون في ايدو في اكتر من لاعب مفكوك ..وعمل معاه اقرار ..ناس معتصم جعفر بقوموا يلغوا (الاقرارات).
• تذكروا حكاية منتصر فرج الله.
• منتصر فرج الله عمل اقرار مع الهلال ومشى وقع في النيل الحصاحيصا الذي كان يرعاه معتصم جعفر.
• هسع لا منتصر فرج الله موجود.
• ولا النيل الحصاحيصا.
• ولا دكتور معتصم جعفر.
• قلنا ليكم الهلال لحمو مر.
• ما بتبلع.
• قعدتوا تغالطوا.
• اتخيلت ناس معتصم جعفر واسامة عطا المنان يكونوا قاعدين في الاتحاد في أيامنا دي.
• أكيد كانوا شافوا ليهم طريقة للمريخ.
• اول حاجة كان اورنيك تسجيل اللاعبين بكون مجاني.
• ما بشيلو فيه قرش.
• تاني حاجة ..التسجيلات ذاتها بتكون بالفاتحة والبلح.
• ما أكتر من كدا.
• يعني ناس المريخ يمشوا لناس الشرطة القضارف يشربوا معاهم الشاي.
• يقوموا يقولوا ليهم والله نحن عاوزين ولدكم (حسين افول).
• ناس الشرطة القضارف يقولوا ليهم: اول نحن حسين افول جايبنو من وين؟…حسين افول ولدكم ..وجبناه (اعارة) من شبابكم.
• طوالي يرجع ليكم.
• ولا عاوزين فيه قرش.
• جيب (البلح) داك يا ولد.
• يوزعوا البلح ..وييجبوا حسين افول معاهم …والموضوع انتهى.
• تاني يوم ناس مزمل ابوالقاسم ومعاوية الجاك ح يطلعوا يتكلموا عن قانونية التسجيل بالبلح.
• ح يقولوا التسجيل قانوني.
• ما فيه أي كلمة.
• والمادة 29 من قانون النظام الأساسي لاتحاد كرة القدم ..بتقول (البلح) يكون (بركاوي).
• غير كدا ..التسجيل ما صحيح.
• واللاعب لو في الرديف ..البلح يكون (عجوة).
• الله أكبر.
• مبروك أفول للمريخ.
• لو ناس معتصم جعفر في الاتحاد الآن ..ناس المريخ كانوا ح يمشوا لناس النسور ..يقولوا ليهم نحن عاوزين ولدكم (كولا).
• يجيبوا الكولا يشربوها ..والموضوع ينتهي على كدا.
• لو ناس معتصم وأسامة في الاتحاد …ناس المريخ كانوا بسجلوا (دراج) بالفاتحة.
• ما بدفعوا فيه (قرش).
• التسجيل بالفاتحة مالو؟.
• ما حلال.
• الفاتحة يا شباب.
• غايتو يا ناس المريخ ظروفكم الايامات دي (نار).
• حالتكم صعبة.
• وضعكم محرج شديد.
• لا دوري.
• لا كاس.
• لا رئيس.
• ولا نائب رئيس.
• قروشهم كلها كبوها في (التش) وقعدوا يتلفتوا.
• يتلفتوا متل (حنة العروس).
• قالوا ليك قروش ضياءالدين لاعب الامل الذي سجله المريخ تموها ليهو بي عمودين من مزمل ابوالقاسم.
• مجلس المريخ قال ليه ما عندنا فكة بنتمها ليكم بي عمودين من (كبد الحقيقة).
• واعمدة سلك بلملموا فيها لي قصاري.
• طبعا ناس المريخ قالوا جابوا ليهم لاعب خطير في الغرفة.
• اللاعب اول ما دخل الغرفة ..قال ليهم اسمعوا انا حكاية (نهواه في كل الظروف) و (أي دمعة حزن لا لا) ما بتنفع معاي.
• انا عاوز قروش.
• أي دمعة حزن لا لا تقولها لي ناس موسى الزومة وبلة جابر.
• انا لاعب محترف.
• المريخ عندو مشكلة في الدفاع وبسجل في الوسط.
• والمريخ عندو مشكلة في الهجوم.
• وبرضو بيسجل في لاعبي الوسط.
• عارفين ليه؟.
• عشان لاعبي الوسط سعرهم (رخيص).
• وعارفين ناس المريخ سجلوا لاعب اسمه ضياءالدين محجوب ليه؟.
• عشان ما عندهم (كهربة).
• فاكرين ضياءالدين بحلها ليهم.
• ……………
• ملحوظة: غايتو ناس المريخ لو لقوا والي شمال كردفان بحلها ليهم.
هوامش
• هلال الابيض حقق مكاسب كبيرة في هذه التسجيلات.
• سجلوا محمد عباس مهاجم أم بدة الممتاز.
• وسجلوا مؤيد عابدين الطرف الايمن المتميز.
• وعباس ومؤيد تمنيناهم في الهلال.
• ان شاءالله يتألقوا وينتقلوا للهلال في الفترات القادمة.
• الهلال الآن ليس أمامه غير سيف تيري.
• سيف تيري المهاجم الأفضل في الساحة.
• وناس الهلال مفروض يحسمو أمره قبل ان يحسم أمره فريق الخرطوم الوطني.
• الخرطوم الوطني أعاد قيد حمزة داوود.
• وكدا الحكاية بقت على سيف تيري.
• وافتكر الموضوع ما صعب على الهلال.
• الهلال حتى الآن سجل 5 لاعبين.
• محمد المعتصم ومتوكل كولا للدفاع …وحسين افول للطرف اليمين ودراج للوسط ومحمد موسى للهجوم.
• ووسط الهلال وهجومه يجب ان يكون فيه اضافات.
• اضافة للطرف الشمال.
• الهلال لا يحتاج لأكثر من محترف.
• او بالكتير محترفين.
• ما تسجلوا ساكت.
• والقروش التي تدفعوها في 3 محترفين.. أحسن تدفعوها في واحد.
• بعدين الهلال أصلاً ما فيه خانات فاضية.
• لذلك اذا سجل الهلال سيف تيري ..يمكن ان يسجل مهاجم.
• الى جانب صانع العاب.
• لأن صناعة الالعاب في الهلال الى الآن فيها مشكلة.
• مع تميز صهيب الثعلب ومؤيد الصيني.
• كثيرون تحدثوا عن موهبة التاج يعقوب لاعب الأهلي عطبرة.
• ويمكن ان يكون التاج يعقوب اضافة للهلال.
• محترف برازيلي نجاحه في الهلال ضعيف.
• ما تنظروا لينا ساكت.
• وما تجاملوا فارياس وتجيبوا ليكم محترف برازيلي.
• فارياس سوف يتكون طاقمه من 5 برازيليين.
• ووجود لاعب برازيلي مع هذا الكم سوف يجعل هناك (تفرقة) من الجهاز الفني للاعبين.
• المحترف الافريقي هو الأفضل.
• وهو الحل.
• هناك اسماء مطروحة في مواقع التواصل الاجتماعي للمحترفين القادمين للهلال.
• ونخشى ان ترتفع طموحات الجماهير ..وفي النهاية الموضوع لا يتجاوز حدود (تيتيه).
• دفاع الهلال بعد متوكل كولا ومحمد المعتصم في وجود اوتارا وعمار الدمازين وحسين الجريف لا يحتاج للاعب محترف.
• وهناك عماد الصيني وسفاري.
• والكثير من الاسماء في الرديف والشباب.
• اضافة أي محترف لهذا الخط سوف تكون خسارة للهلال.
• الهلال أمس ضم المتميز متوكل كولا …وهو من دون شك اضافة كبيرة للهلال.
• المفاوضات مع نادي النسور استمرت اكثر من اسبوع.
• وانتهت في النهاية بنصر كبير للهلال.
• بعد التسجيلات ننتظر معسكراً نموذجياً للهلال.
• وافتتاح الجوهرة سوف يكون حدثاً فريداً.
• وابقوا على سفر.
• ……………
• عاجل : المريخ بفتش ليه في محترف (متطوع). .يعني بيلعب الكورة (تطوع).
بعد صفقات قارون وضحكات هارون المريخ بعبع حامبكم النوم الواحد دا وما تفرح يا باشا وباكر الغربال والتش والتكت والرشيد وبيبو وضياء البدر والصاوي وراجي وضفر بملاون الميادين فنا وغدا لناظره قريب والمؤامرة اصلا محبوكة والدكتور الفاتح تجاوز عن ادانة كردنة الصريحة ونفذ رغبة الزرق الحاقدين وعامل فيها زكي لكن الايام ستريه ما قام به وشعب المريخ لن يغفر له ما قام به وباكر حايشوف … افرح بكولا ودراج والمعتصم ونسيت ابداع التش والغربال وخمسة اهلي عطبرة في وجود المعتصم ودراج اما كولا فهي جاهزة للغربال واصحابه للتبريد في الصيف مثلما فيتا شرب كولا الهلال سابقا ههههههه
بعد صفقات قارون وضحكات هارون المريخ بعبع حامبكم النوم الواحد دا وما تفرح يا باشا وباكر الغربال والتش والتكت والرشيد وبيبو وضياء البدر والصاوي وراجي وضفر بملاون الميادين فنا وغدا لناظره قريب والمؤامرة اصلا محبوكة والدكتور الفاتح تجاوز عن ادانة كردنة الصريحة ونفذ رغبة الزرق الحاقدين وعامل فيها زكي لكن الايام ستريه ما قام به وشعب المريخ لن يغفر له ما قام به وباكر حايشوف … افرح بكولا ودراج والمعتصم ونسيت ابداع التش والغربال وخمسة اهلي عطبرة في وجود المعتصم ودراج اما كولا فهي جاهزة للغربال واصحابه للتبريد في الصيف مثلما فيتا شرب كولا الهلال سابقا ههههههه