بابكر سلك
*شعبي الكريم
*هل كانت ثورتنا من اجل الاطاحة بالبشير والاربعين حرامي ؟
*بالطبع لا
*فقد ثار شعبي لا ليغير رئيس وكم وزير
*بل ثار ليغير دولة
*ومن يريد ان يغير دولة
*لابد وان يهتم بتغيير السلوك السالب الي سلوك ايجابي
*ايها الناس
*ثرنا لاجل الخدمة المدنية
*المساواة في نيل الوظيفة والمعيار الكفاءة
*ثم التفاني في العمل بعد نيل الوظيفة
*تاني مادايرين نشوف موظف مشي الفطور من عشرة لي اطناشر
*ومشي الصلاة من اطناشر وكبرها للترحيل
*مادايرين تعال بكرة
*وثرنا
*لاجل السوق وجشع التجار
*الطمع الذي ساعد في تدهور القيمة الشرائية لعملتنا
*والذي ساهم في عدم استقرار حياتنا
*وثرنا لاجل السوق الربوي
*بالكاش سعر
*بالشيك سعر
*بالدين ربا عديل كده
*ثرنا عشان المواطن يبقي رقيب علي السوق
*مافي زول يشتري بأزيد من السعر ولو يترك السلعة
*السوق يحتاج تنظيم وادب وتغيير سلوك
*لانه تربي في عهد بيع فيه الوطن علنا للراجحي والصينيين
*زمن بيعت فيه مواني الوطن للشركات الفلبينية بايدي للاسف سودانية
*دايرين نغير كل السلوك في السوق
*حتي الوسخ وجديع الكراتين والاكياس لازم نخليهوا
*ننضف ونتهذب شوية
*الفارشين في نص شوارع السوق علي الارض بتصاديق المحليات
*انتهي زمن شراء الفوضي بتصديق
*ايها الناس
*دايرين طبيب في عيادتو يهتم بالكيف لا بالكم
*ماممكن الكشف مليون وكرسي الانتظار مقطع وحمام العيادة مقرف
*لايحتاج للافته
*الريحة براها بتقول ليك(الادبخانة)بي جاي
*دايرين دكتور يهتم بالمريض وياخد زمنو
*موش دكتور بكتب في الروشته قبل مايقول ليك اسمك منو
*دايرين نغير سلوكنا كلو
*النفاق
*ديدن العهد الفات
*ده كمان بوظ الاخلاق والبلد والقيم واهدر الكرامة
*ده داير اجتثاث من الجذور وحرق البذور
*دايرين نثور
*نثور علي اشياء كثيرة
*سلوكنا الهمجي في الشارع العام
*وقوف الحافلات والبصات نص الزلط
*فوضي الركشات
*السواقة ام عضل عديمة الذوق
*والنور الطويل البعبر عن عدم احساس مستخدمه بالآخرين
*عرفنا زول مواجهك يضايقك بالنور
*معقولة زول ماشي وراك يضايقك بالنور
*المرايات كلها تجيبو ليك جوه عيونك
*ايها الناس
*ثورتنا كانت لاجل سلوك يطور الوطن
*تنضف شوارعنا
*تدور مصانعنا
*تخضر مزارعنا
*ونخفف ضرائبنا واتاواتنا مساهمة في رفع المعاناة عن كاهل الناس
*ثورتنا كانت لاجل التعليم
*نهتم به حتي يعود للتعليم الحكومي القه
*فالمدارس الخاصة اضحت اكتر من البقالات
*وهي لاتحترم حتي المعلم فيها
*كيف تحترمه والسواد الاعظم منها يوقف مرتبات معلميها في الاجازات
*معلم باليومية كيف يكون محترم
*ثرنا لاجل محاربة الرشوة والمحسوبية
*ماتقول لي نحنا مامرتشين
*مرتشين لدرجة بقينا مابنخجل من الرشوة
*نطالب بها علنا
*ونحتج علي انها شوية اذا قدمت لنا
*وسميناها حق
*تخيل موظف يقول ليك حقي
*ثرنا عشان نغير سلوك كتير للاسف اصبح سمه لينا
*ثرنا
*لنستفيد من طاقات شباب الثورة في نظافة الشوارع وتشجيرها وتزيينها والاهتمام بها
*ثرنا
*وكانت ثورتنا ايقونة الثورات في العالم
*لذا لابد ان تكون نتائج تغيير السلوك بعد الثورة نتائج مدهشة يصفق لها العالم كما صفق للثورة
*وثرنا
*لنعيد للوطن حقه المسلوب من الحرامية
*ثرنا لاجل تذويب القبلية البغيضة والجهوية القاتلة في اجمل عبارة في التاريخ
*سوداني
*وما احلي الواحد فينا لماتقول ليهو جنسك شنو يقول ليك سوداني
*ثرنا لاجل اهداف نبيلة وكثيرة
*كلو يوم نتناول منها بعضها
*ايها الناس
*ان تنصروا الله ينصر ثورتكم
*اها
*نجي لي شمارات والي الخرتوم
*تعرف ياوالينا
*ثرنا لتعود الخرطوم مثلا تتمني ابو ظبي ان تصبح مثلها
سلك كهربا
ننساك كيف والكلب قال تاني النشوف لي كلب رافع كراعو في عمود
والي لقاء
سلك
