الجمهور المريخي الفضل محتاج لجرعة آمل حسوا بينا ورجعوا لينا البطل،،،
تغريدة واتساب
معاذ ابومؤيد
الجمهور المريخي الفضل
محتاج لجرعة آمل
حسوا بينا ورجعوا لينا البطل،،،
انتهي يوم من التسجيلات ونحن خارجها؟؟
وتبقت تسعة ايام
لختامها!!!!!!!!
وللان الليل طفل يحبو ،،،،
نشبهها ليكم بعرس جيرانكم بس ماعارف عندهم حفلة ولاعرسهم تغداء واتخارج!!
نحن اسه ماعارفين نحن عندنا حفلة ولانتخارج!!!
غايتو ربنا يصبر جماهيرنا علي ماأصابها ،،،
المريخ يعاني كل يوم اكتر من اليوم القبلو
والجمهور ماقادر يتحمل الالم
عندي اكثر من ثلاثه وثمانين قروب وكلها متفقه علي حاجه واحدة
المريخ بيضيع بسبب لجنة التدمير !!
اتفاق تاااام
الا القلة القليلة تصفق علي استحياء بكلمات،،
••••••••••••••••••••••••••
تبقت خمسة عشر يوم للجمعية المعلنة من اللجنة ومافي بوادر لقيامها من المفترض اليوم او غدا تنشر كشوفات العضوية علي النادي وفتح باب الطعون فيها ثم قفل بابها بعد 48 او 72ساعة ثم نشر الكشوفات النهائية بعد الفصل في الطعون
وعلي ماعتقد حتكون الطعون بكثرة ومتنوعة محتاجه لزمن للفصل !!!!
وفتح باب الترشيح وقفل باب الترشيح وفتح الطعون فيها والفصل في الطعون من ثم اعلان اسماء المرشحين للانتخابات وحتى الان لاتوجد بوادر لترشح احد غير محمد سيداحمد الجاكومي،،،
بعد جنازة البحر التركتها التدمير
الكل مهرول بعيد خاصة منصب الرئيس بالزات لانو محتاج للضحاكات!!!
وبعد دا كلو تحديد موعد الااقتراع الكلام دا كلو حياخد زمن والمتبقي فقط خمسة عشر يوم فقط لاغير ومتخللها تسعة ايام تسجيلات وسفرية للمغرب خمسة ايام !!!! السؤال لماذا لم تبدأ الاجراءات حتي الان؟؟؟؟؟؟؟!!!
علما بان جميع هذه الاجراءات من اختصاص المفوضية بعد رفع كشوفات العضوية لها من الادارة منذ اسبوع!!!!
يعني لا علاقة لادارة النادي بأجراءات الجمعية العمومية إذا لا مبرر للتأخير !!!
الا اذا كان هناك توصية من الادارة بعدم البدء في الاجراءات
طاساتنا الضائعة كترت والشغل التحت تحت اكتر
وعندنا الف خط تحت الحاصل الان !!!
حنتابع وشغلنا الساعة الزمنية لضبط التوقيت للملفين تسحيلات وانتخابات !!!!
وعدادنا شغال?▶
وكل يوم حنسأل كم تبقي من الوقت
لانو نحن فعلا في امتحان عسير !!!
••••••••••••••••••••••••••
غرفة تسجيلات القروبات شغالة علي قدم وساق وغرفتنا نايمة وفي غيبوبة!!
ياخي في قروبات جابت لاعبين من الولايات وتفتش في ارقام ادارين عشان يسلموهم اللاعبين !!
وفي قروبات رشحت المغادرين والمطلقي السراح،،،
وادارتنا اخر من يعلم!!!
عرفتو قيمة مدير الكرة
عرفتوا الفرقة بتاعتو كيف؟؟
اتحدى انو في بعض اعضاء من اللجنة المحترمين ماعارفين اسماء بعض اللاعبين وماعارفين كم لاعب في الكشوفات!!!
وباقية المناشط اصلا خلاص تم التشييع الي مثواها الاخير !!
غايتو كيان ضايع والكل يتفرج
اشك انو في اداريين كل معرفتهم للنادي والكيان في تشكيلة المباراة والمدرب
حتي الاحتياطي ممكن لم يدخل اللاعب يقول ليك دا منو!!!!!
ويجيك واحد ناطي يقول ليك ديل اتصدوا للمهمة؟؟
مهمة اية اللي جاي تقول علية انت واياه !!!
خليهم يعرفوا لينا الكشف فيه كم لاعب وكم اعمارهم وخاناتهم شنو!!
بعدين تعالو ومعك اخرون للتصفيق للسادة المدمرين !!
••••••••••••••••••••••••••
مسك الختام
مامحتاجين لي اجتماعاتكم ولا محتاجين لبدلاتكم
محتاجين فقط تسلمونا الكيان كما كان ،،،
بس صورة الاجتماع قبل وبعد نفرة القصر فيها ملاحظات في عدد الحضور!!!
••••••••••••••••••••••••••
ونحن علي المدرج ندعم ونشجع ونتفرج
بس دعمنا دا عايزين نعمل بيه كشك ليمون ونتعاقد مع السنوسي بتاع الليمون الفي السوق العربي
عشان بطن المدرج طامه وخايفين عليهم من الهبوط والضغط والسكر!!
قلنا نعمل احتياطتنا بكشك ليمون ،،،
السنوسي انشاء الله تكون من الصفوة وتعمل لينا الكشك دعما للجماهير الغلبانة !!
غايتو جنس طمام والنفس مسدودة !!
ربنا يعين المدرج ويديكم صبر لوك ايمال،،،
••••••••••••••••••••••••••
همسة اخيرة
الكيان في الضياع والصحفين في صراعات !!
وينكم من الدمار الشامل الحاصل
لاوقت بلاغات ولاوقت نكاية في العرضة شمال!!
معقولة عندنا حفلة وعرس وماشين ننصب صيوان للجيران!!
لو ماوقفتوا الان حتقيفوا بتين !!
محتاجين لكل كلمة ومحتاجين لكل حرف ممكن يعمل لينا انعاش لجسد المريخ ،،،
الاعلام امانة تحملوها وحتسألون عنها ،،،
••••••••••••••••••••••••••
خارج النص
اتمنى من رجال اعمال المريخ دعم التسجيل حتى ننقذ مايمكن انقاذه
واتمنى من قدامى الادارين في النادي خاصة الاشرفوا علي التسجيلات ودائرة الكرة مد يد العون عشان موسمنا مايتنسف !!
عاينو للجماهير والنجمة ،،
المريخ وجماهيره لاتقابلونهم بالعقاب،،،
ارحموا الجماهير يرحمكم من في السماء،،
معظم جماهير النادي عيونهم وارمة من السهر والقهر والالم
محتاجين تتاكدو ادخلوا القروبات وشوفوا المعاناة والالم وطمام البطن !!!
الدعوة موجهة لكل ادارات ولاعبين ومدربين ومحبين المريخ السابقين ندعوكم لقروباتنا حتى تحسوا بمعانتنا،،،
والدعوة ايضا للتسيراب ادخلوا القروبات عشان تعرفوا اراء الناس فيكم وتعرفوا قيمتكم في نفوس المريخاب!!!
من الحب ماقتل
ومن الحب ماخلانا نتكلم برانا ….
بالمناسبة الدراما الحصلت في لجنة التسجيلات اليوم لناس العرضة شمال تنفع مسلسل لرمضان لكن حالنا لايتيح لينا النظر خارج اطار منظومة الكيان،،،
••••••••••••••••••••••••••
صديقي واخي قائدي السيارات
سنواصل نصائحنا ليكم
جايكم رمضان صوموا وسط اولادكم وتناسوا موبايلاتكم
اتصالك وواتسابك مهم لكن حياتك اهم ،،،،
لاتكتب نهاية حياتك او حياة غيرك بكلمة،،،
كل الاتصالات والواتساب ملحوق والله اصل مكانك وتم ونساتك،،،
••••••••••••••••••••••••••
