الخرطوم قفلت ..الجوة جوة ..والبرة برة

صابنها 

محمد عبد الماجد

الخرطوم قفلت ..الجوة جوة ..والبرة برة

الحصة الصباحية
الناس فاهمة (حظر التجول) غلط – فاكرين القعّاد في البيت عيب – بقلل من شخصيتهم.
في واحد زعلان – انو قاعد في البيت – ضرب لي صاحبو الساعة 9 مساء – قال ليه اسمع (سلطة الاسود) بعملوها كيف؟.
صاحبو قال ليه : والله ما عارفها – لكن عامل لي (شوربة) عدس طاااعمة.
احسن ليك عدس مع اولادك في البيت – من سمك برة البيت تجيب بعدو (كورونا) لاولادك واسرتك في البيت.
………..
• زمان كان عندنا واحد صاحبنا اسمو (سلفقة) – سلفقة دي كان عايش على اسمو دا.
• عايش سلفقة بس.
• ما اكتر من كدا.
• سلفقة دا كان كل ما يكون عاوز يقشر – ويعمل فيها خطير – بقول لينا الاسبوع القادم انا مسافر الخرطوم.
• نقوم نحن على حس الخرطوم نكسر ليه فيه (التلج).
• رأسو يبقى قدر كدا.
• بقولوا ليك الزول وقت يشكوره رأسو بيبكر.
• ما عارف علاقة الشكر بالرأس الكبير شنو؟.
• الخرطوم كانت قشرة الوقت داك.
• شارع القصر اتجاهين.
• جامعة الخرطوم كانت حدث.
• عادي تلقى في الميدان الشرقي شغال ازهري محمد علي.
• ليالي الخرطوم كانت جميلة.
• شارع النيل ما بتمشي فيه إلّا في المناسبات الرسمية.
• ما في زول بمشي شارع النيل ساكت.
• زول ما عندو موضوع ما بتلقاه في شارع النيل.
• الناس كلها كانت مسؤولة.
• ما في زول فاضي.
• كلام زي دا اصلو ما في – كونك تمشي شارع النيل عشان تشرب ليك قهوة او كباية شاي.
• ابدا والله.
• شراب القهوة الشيء البنعرفو بكون عشان موضوع مهم – لكن حكاية ان يكون شراب القهوة ذاتو موضوع – دا ما شفناه إلّا الآن.
• ما في زول ذاتو كان فاضي للحاجات دي.
• أي زول كان مهم.
• انا ما عارف الناس ديل في زمنا دا بيجيبوا (المهلة) دي من وين؟.
• المهم….(ما عاوز ادخل ليكم في التفاصيل).
• واطول ليكم في الموضوع.
• المهم (سلفقة) دا كان وقت يقول لينا مسافر الخرطوم الاسبوع القادم – بنفتح فيه (طلبات).
• البقول ليه عاوز لي (كدارة).
• والبقول ليه عاوز لي (شنكار).
• والبقول ليه عاوز شريط حمد الريح الجديد.
• اشرطة حمد الريح بتاعة الكاست كانت حكاية.
• كانت في حد ذاتها (قشرة).
• يا زول يكون عندك شريط حمد الريح الجديد – تكون عاوز شنو اكتر من كدا.
• ما بتسأل في زول.
• طبعا زمان أي زول في الحلة يلبس ليه (شنكار) – بكون دعاية ساكت – وما عندو كورة في رأسو.
• كورتو في كراعو.
• في شنكارتو.
• الشيء البنعرفو (الشنكار) كان (دعاية) بس.
• بعدين أي زول كان بيلبس شنكار كان (كوز).
• الكيزان بجيبوا لاولادهم (الشنكارات).
• شنكارتها شكارتها.
• المهم….(ما عاوز ادخل ليكم في التفاصيل).
• واطول ليكم في الموضوع.
• سلفقة كان بفكها فينا – على اساس انو مسافر الخرطوم.
• عليك الله يا سلفقة جيب لي ديوان نزار قباني الجديد.
• يا سلفقة ما تنسى الحاجات الوصيتك عليها.
• الخرطوم زمان كانت متيقنة – ما كانت شفقانة زي هسع.
• الزول البيسافر الخرطوم بجيب ليك هدايا لي ناس الحلة كلها.
• أي زول موصيه على حاجة بجيبها ليه.
• هسع الزول لو جاء من السعودية او الامارات – (ابرة) ما يجيبها ليك.
• يعملها ليك كلها والله جيت فجأة.
• وراجع في نفس الاسبوع.
• وما عندي طريقة.
• المهم….(ما عاوز ادخل ليكم في التفاصيل).
• واطول ليكم في الموضوع.
• سلفقة كان زول بتاع (خرطوم).
• بحب القشرات.
• وعندو الخرطوم دي حاجة اساسية.
• ما بفوتها.
• لازم في كل شهر يجي الخرطوم ويرجع منها.
• ونحن على هذا الاساس كنا بنختو في مكانتو.
• اصلو ما بنلعب فيه.
• هسع الخرطوم اتراجعت.
• بقت ما زي زمان.
• الخرطوم بقت أي كلام.
• لو عاوز تدخل الخرطوم إلّا تشوف ليك (4) كمامات.
• يا زول قالوا ليك (الكورونا) دي عاوزة ليها سبب.
• عاوزة ليها زول ما لابس كمامات.
• لا بتعرف كبير.
• ولا صغير.
• لا وزير.
• ولا خفير.
• كلهم واحد عندها.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• اتذكر من قشرات الخرطوم – لازم وقت تجي الخرطوم وتصلها تدخل استاد الهلال.
• لازم تحضر ليك مباراة للهلال.
• دي حاجة اساسية.
• لمن ترجع من الخرطوم اول حاجة بيسألوك منها مباراة الهلال التى شاهدتها من الملعب.
• ولازم – ولا بد ..تحضر ليك حفلة لي عقد الجلاد.
• يا زول الخرطوم ما كانت ساهلة.
• ايام باسطة (سلا).
• تنزل مخصوص في شارع الحرية…عشان تشيل ليك ربع كيلو وتفوت.
• ما بتلعب في الحتة دي.
• اهم شيء (الصندوق).
• الخرطوم كانت فاضية – ما كانت زحمة زي هسع دي.
• العربات الفيها كلها ما بتفوت ليها 13 عربية ملاكي.
• عشان كدا أي زول بتعرفو في الدنيا دي بتلاقيه في البص السياحي.
• أي زول رايح منك.
• ليك منو سنة.
• كلهم بتلقاهم في البص السياحي.
• الخرطوم كانت ضيقة.
• ما كانت زي هسع مشرورة كدا.
• ممحوقة.
• هسع والله اخوك في البيت يمكن (6) شهور ما تشوفو.
• انت تدخل – هو يطلع.
• هو يدخل – انت تطلع.
• عشان كدا هسع (حظر التجوال) دا فرصة اننا نراجع حسابتنا.
• شاي المغرب.
• وصينية الغداء.
• والعشاء وقت يكون فطير بي لبن.
• عليكم الله في احلى من كدا.
• تعالوا نراجع حساباتنا.
• نرجع من جديد.
• الخرطوم ما تخرب طبعكم.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• اتذكرت (سلفقة) – وتجلياته الزمان وقت فرضوا حظر التجوال في السودان.
• احسن الناس تتلم من بدري.
• من تمغرب.
• زمان ذاتو ما في زول بدخل البيت بعد المغرب.
• ما كانت في حوامة بعد المغرب.
• مغربت – الناس كلها في البيت.
• السلطة فوق حظر التجوال – منعت دخول الباصات السفرية للخرطوم – امس كان اخر يوم.
• لا بص يدخل.
• لا بص يطلع.
• الى جانب ذلك العربات (الملاكي) ذاتو منعوا خروجها او دخولها للخرطوم.
• احسن شيء.
• اصلو المشاكل كلها بتجينا من العربات الملاكي.
• احسن الناس يتوحدوا.
• ملاكي وعمومي.
• ما في سفر.
• الجوة جوة.
• والبرة برة.
• المهم….(ما عاوز ادخل ليكم في التفاصيل).
• واطول ليكم في الموضوع.
• اضبطوا الخرطوم.
• الخرطوم عاوزة (ضبط) شوية.
• كورونا ما مرض والسلام.
• كورونا درس.
• مفروض نقيف مع انفسنا.
• مفروض نراجع حساباتنا.
• العالم دا (كضبة) كبيرة.
• امريكا زي الصومال.
• وارتيريا زي المانيا.
• يتفاصحوا ساكت.
• الناس ديل كلهم اتضح انهم ما عندهم حاجة.
• كلهم اتضح انهم زي (سلفقة).
• سلفقة ساكت.

صحيفة ريمونتادا الرياضية