الذين رفضوا الاساءة للمريخ ما عندهم مشكلة في حالة الاساءة للوطن
صابنها
محمد عبد الماجد
الذين رفضوا الاساءة للمريخ ما عندهم مشكلة في حالة الاساءة للوطن
• في كتّاب في المريخ بركبوا الموجة …وبعملوا فيها هم حرّاس للمريخ وما بقبلوا فيه أي حاجة ..رغم انهم هم اكثر من يخصم من المريخ.
• في كتّاب بيستجيبوا لهوى مواقع التواصل الاجتماعي ..يقوموا يشوفها (شايتة) وين ؟ يقوموا يشوتوا معاها.
• جماعة ما يطلبه المستمعون.
• ونحن.
• ونحن.
• والله لو ما كهربتنا بتقطع كنا حررنا الاراضي العربية المحتلة.
• وكنا رجعنا الاندلس ذاتها.
• خاصة لو كانت هناك تعليقات تاتي على هذه الشاكلة (انتوا الزول دا ما قادرين عليه؟)…(انتوا الزول دا ما في واحد فيكم قادر يثبتو؟)…(وكيف الزول دا يقول هذا الكلام عن المريخ؟).
• الجماعة يقوموا يصدقوا انفسهم …ويقوموا يتنفخوا ليك في (العمود).
• ويفجروا نفسهم ..في موضوع ما بستاهل.
• ولا عندو قيمة.
• شيء صريخ.
• وشيء عويل وشيء عنتريات.
• ما في زول بشكروا بالإساءة للآخرين.
• وما في عنترية في التهجم على الغير.
• الموضوع دا انتهى زمان.
• الموضوع دا ما فيه (فرّاسة).
• ولا عاوز ليه درس عصر.
• الهلال والمريخ (ملك عام).
• ميزة الهلال والمريخ في ذلك.
• الهلال والمريخ ما ملكية زول.
• ابعدوا نظراتكم الضيقة عن الهلال والمريخ.
• اتعلموا احترام الاخر من خلال الهلال والمريخ.
• احترموا الرأي الاخر.
• وخلونا نتفق او نختلف اخوان.
• ما في مشكلة.
• ما في زول مشى من المريخ – المريخ نقص (طوبة).
• ولا في زول شال ليه من الهلال (سيخة).
• الهلال راسخ.
• والمريخ راسخ.
• نمشي كلنا.
• ويقعد الهلال والمريخ.
• نحن في هذه المساحة …ضد الذي جاء به حسن برقو – جادا كان او مازحا.. وهو امر مرفوض وغير مقبول.
• ولا عندو مبرر.
• ولا في ليه منطق.
• (هلال مريخ) ما بتستحمل ليها استخفاف من (مسؤول) يفترض ان يكون في خانة (الحياد).
• الجمهور ممكن يحصل بينهم مزاح.
• الاعلام.
• ممكن.
• لكن المسؤول …والشخصيات العامة يجب ان يبعدوا عن هذه المنطقة …وان يمنحوا الهلال والمريخ كل الاحترام والتقدير.
• الموضوع دا ما فيه ظرافة.
• ولا بستحمل ليه رشاقة.
• لا يمكن ان ندافع عن حسن برقو عشان هو (هلالابي)..او عشان استخف بالمريخ.
• المريخ عندنا (كبير) – هذا امر لا يمنحه احد للمريخ ولا يتفضل به احد عليه.
• في نفس الوقت ما في زول عاوز يتملق جمهور المنافس ولا عاوز يعمل فيها بطل لجمهور الفريق الذي ينتمى اليه.
• لا دا.
• لا دا.
• ما تفوه به حسن برقو ..عندنا مرفوض …وهو امر يجب ان يخدع للمحاسبة والتحقيق من قبل الاتحاد العام.
• لقد انتقدنا امس في هذه المساحة الدكتور حسن برقو في جانب لا علاقة له بما بدر منه اخيرا.
• انتقدنا حسن برقو ..رغم حديثهم عن هلاليته ..ورغم قولهم ان المنتخب الوطني اصبح هو فريق الهلال.
• لقد كنا نرفض بقوة تعدي معتصم جعفر واسامة عطا المنان بمريخيتهم على الهلال ..ونحن الآن نرفض نفس الشيء من حسن برقو ..ولا نرحب بمن يعتدي على المريخ وهو في منصب قومي.
• اعرف ان برقو وقع في هذا الخطأ بعفوية وتلقائية وهى محاولة منه للاستظراف ..لكن كل هذه المبررات لا تحلل او تجيز ما تفوه به.
• هذا عن برقو.
• حالة (التنمر) التى اتبعها اعلام المريخ استجابة لمواقع التواصل والإساءة لبرقو والاستخفاف به بصورة غير كريمة ايضا امر مرفوض عندنا.
• ما تصفوا حساباتكم من خلال هذا الموقف.
• ما تستفرغوا كراهيتكم استغلالا لهذا الوضع الذي يرفضه الجميع.
• التسابق من اجل ان اكون الاعنف والأقسى في الرد من بين كل الكتّاب …امر تكشفه الكتابات عندما تكون بهذه السطحية.
• الذين رفضوا الاساءة للمريخ …ما عندهم أي مانع لو قدمت الاساءة في حق الوطن.
• رغم اننا دائما نقول ان الاساءة للهلال او المريخ اساءة للوطن.
• الهلال هو السودان.
• والمريخ كذلك.
• اعلام المريخ يتحدث عن المنتخب القومي باستخفاف يرفضونه على المريخ.
• مصلحة الوطن ..واستقرار المنتخب الوطني امر كان يفترض من القنصل حازم ان يسعى من اجله ..خاصة وان حازم ذهب من اجل دعم المنتخب ومساندته.
• لو كان حازم يريد فعلا ان يدعم المنتخب لجعل مثل هذا الامر يمر – في هذا التوقيت.
• اذا اخطأ برقو ..كان يفترض ان تكونوا اوعى منه وأكثر حرصا على المنتخب الوطني.
• برقو غلط ..تقوموا تغلطوا كلكم.
• متين الشطارة بقت في الغلط؟
• متين الصاح بقى مشكلة؟
• مثل هذه الامور يجب ان لا تظهر في السطح ويفترض ان لا يعلن عنها للإعلام.
• الناس الكبيرة بتسكت وتمرر ..لكن فيما يبدو ان القنصل حازم صغير.
• على الاقل كان يفترض ان يسكت حتى يتجاوز المنتخب مباراة المغرب بسلام.
• انتوا اصلو الوطن دا ما بهمكم في حاجة.
• لا قبل الثورة.
• لا بعدها يا كافي البلاء.
• اعجب من ان الذين رفضوا الاساءة للمريخ من حسن برقو استخفوا بالمنتخب بهذه الصورة.
• طيب فرقكم من برقو شنو؟
• على الاقل برقو قالها وهو يمزح ..لكن انتم تقلونها بكل كراهية.
• لماذا كل هذا الغل؟
• مالكم انتوا؟
• الحاصل عليكم شنو؟
• صوروا المنتخب الوطني على انه (الهلال).
• قصدوا ان يفصلوا المشاعر الوطنية من جمهور المريخ بشحنه بهذه المرارات التى يعيشوا فيها ويحسوا بها.
• بل ذهبوا ابعد من ذلك وتمنوا الخسارة الكبيرة للمنتخب في المغرب حتى يحمّلوا برقو المسؤولية كلها.
• وحتى يقولوا للناس ان منتخب الهلال خسر امام المغرب خسارة ثقيلة.
• هل يمكن ان يكون هناك (وطني) حقيقي يتمنى خسارة المنتخب من المغرب؟ وان تكون الخسارة كبيرة.
• اذا كانت هذه هي مشاعركم نحو المنتخب ..لماذا ترفضون تعليق حسن برقو؟
• العيب ليس في المريخ ..هذا امر مفروغ منه.
• العيب في هذا الشعور الذي ينتاب المريخاب نحو المنتخب.
• العيب ان تتمنى خسارة المنتخب السوداني.
• هذا هو العيب.
• وهذا امر مرفوض جاء من المريخاب او جاء من الهلالاب.
• المنتخب اولا.
• والمنتخب اخيرا.
• خاصة عندما يلعب المنتخب.
• لقد اساء بعضهم للمنتخب وللوطن ..ويمكن ان نخرج لهم ذلك من ارشيفهم الذي اضحوا يخجلون منه.
• لهذا لا تدعوا لنا الفضيلة في هذا المقام.
• ما تعملوا فيها (كرام) وما بتقبلوا الاساءة …وانتوا تسيئوا للآخرين.
• ما تدثروا بالمريخ ..وتصفوا حساباتكم عن طريق المريخ الكبير.
• ابعدوا جمهور المريخ …من اجندتكم الخاصة.
• خوضوا معارككم وحققوا نجاحاتكم بعيدا عن التحدث باسم الجماهير.
• لا جمهور الهلال.
• ولا جمهور المريخ.
• يمكن لاحد ان يتحدث باسمهم.
• الهلال والمريخ للجميع.
• لا تجعلوهم حدائق مغلقة.
• …………………
متاريس
• بكرة ان شاءالله سوف اتحدث عن فريق المتمة والظلم الذي تعرض له الفريق من الاتحاد العام.
• بكرة نرجع للمتمة ..ونتحدث.
• البلد دي لسه.
• فيها مشاكل كتيرة.
• وفي بلاوي تحت الدواهي.
• وربكم يستر.
• الهلال والمريخ اى واحد منهم سوف يلعب 7 مباريات خلال 18 يوم.
• الكلام دا من غير مباريات المنتخب الوطني.
• الله يكون في العون.
• ويا هلال دوري وكاس.
• اللهم الدوري والكاس.
• مباراة التتويج باللقب سوف تكون ان شاءالله يوم 22 سبتمبر امام الامل عطبرة.
• شفتوا الصدفة…الاحتفال باللقب ان شاءالله سوف يكون امام فريق الامل.
• عودة اللقب سوف يكون بعد الانتصار على الامل ان شاءالله.
• ………..
• ترس اخير : تاني ح تنقط …وتنقط ..قبل مباراة القمة.
الاستاذ المحترم كلامك جميل ومنطقي بس اسالك سوال من هم اللعيبة الاساسين في وصول المنتخب الي ما هو عليه الان نتمنا منك الحيادية وقول الحق وتكتب مقال في التشكيلة الاساسية كان من ابوعشرين وتيري والتش وضياء وعجب وغربال محترف من المريخ في ذالك والوقت وضياء وووووووووووو الي ان حصل الحصل للغربال وابوعشرين وغيروا يعني اصلا كانوا متواجدين في المنتخب ولَك الودc
أوفيت وكفيت يا ود عبد الماجد ياكبير، مقال يستحق أن يدرس في الوطنية !!
بس ربائب المؤتمر البطني ما تتوقع منهم الوطنية، وعيال وصبيان الكاهن الأعظم أليخماو الفكاهم في مواقع التواصل ديل هم وكاهنهم وطنيتهم في ملي بطنهم من مال السحت !!
أردم العبوب ردمهم المررررض !!