(الربيع العربي) أزرق .. سوداني وتونسي وجزائري ويمني في تشكيلة الهلال

وان طال السفر

محمد عبدالماجد
حكايات الساعة واحدة ظهرا
(الربيع العربي) أزرق .. سوداني وتونسي وجزائري ويمني في تشكيلة الهلال

• اتخيلوا مباراة القمة القادمة بين الهلال والمريخ.
• الهلال سوف يدخل بتشكيلة فيها (التونسي) شهاب بن فرج والجزائري (محمد الهادي بولوعيدات و(اليمني) جمال سالم…طبعا حارس الهلال عندو (3) جنسيات، الى جانب السوداني عمار (الدمازين) وسليم (عطبرة) ووليد (الشعلة) وصهيب الثعلب (بري).
• دي ثورة عديل كدا.
• تشكيلة الهلال بقت (ثورة الربيع العربي).
• ثورة الربيع العربي ون.
• وثورة الربيع العربي تو.
• كل الثورات مجتمعة في الهلال.
• ناس المريخ على كدا إلّا يجوكم بـ (التاتشرات) و (البمبان) ، وقانون الطواريء.
• بمناسبة (الربيع العربي) الذي اصبح في الهلال أمس الحبيب مامون ابوشيبة عمل ليه (مناحة) في المريخ.
• انا قلت الحاصل شنو؟.
• يمكن اكون ما متابع.
• وما عارف الحاصل.
• الزول دا مالو؟.
• المريخ حاصل فيه شنو؟.
• ابوشيبة كتب 🙁 24 ساعة ويقفل باب التسجيلات الرئيسية وهي أقصر فترة تسجيلات رئيسية في تاريخ الكرة السودانية. على جماهير المريخ أن تربط الأحزمة استعداداً لهبوط طائرة المريخ بعد عشرات العقود من التحليق في سماء الكرة السودانية والأفريقية والعربية.. الموسم الجديد يمكن أن يطلق عليه موسم الكوارث المريخي على مستوى فريق الكرة وعلى المستوى الإداري.. فريق الكرة بدأ في الاحتضار بعد أن فقد مهاجميه الثلاثة الأساسيين.. الغربال بإصابة الرباط الصليبي.. سيف تيري المعتقل .. بكري المدينة بمؤامرة من اتحاد مشجعي الهلال..).
• طبعا هذه التسجيلات ما فيها حكومة.
• وما في أي دعم للمريخ.
• ناس المريخ كانوا عايشين بـ (الحكومات).
• قلنا ليكم انتوا الثورة دي ما بتقدروا عليها.
• والثورة دي بتكشف حساباتكم.
• زمان ناس المريخ كان بتسجل ليهم الحكومة المركزية.
• وارغو ..والحضري…والنفطي والنونو وعلاء الزهرة.
• والجنسية تمنح للاعب قبل ما يصل الخرطوم.
• هسع وين المريخ.
• ووين نهواه في كل الظروف.
• واي دمعة حزن لا لا.
• النظام سقط …وحالكم اتكشف.
• وقت الحكومة المركزية يكون ما عندها قروش …حكومة الولاية كانت بتتولى تسجيلات المريخ.
• المريخ كان بيسجل ليهم عبدالرحيم محمد حسين.
• اسألوا ناس الخرطوم الوطني الذي كان تحت رعاية جهاز الامن والمخابرات قولوا ليهم كيف أتتهم الأوامر بطلاق سراح سيف تيري وحمزة داؤود للمريخ.
• وقولوا لتيري وحمزة داؤود والخرطوم الوطني من اين استلموا مقابل الصفقة؟.
• هسع الكلام دا مافي.
• لا فوق التربيزة.
• ولا تحت التربيزة.
• عشان كان الأوضاع اتكشفت في المريخ.
• اليوم والتاني يصدر أمر قبض على رئيس المريخ.
• (أوامر) القبض التي صدرت ضد محمد الشيخ مدني وهو رئيس نادي المريخ …اكتر من من (كوامر) الجيش السوداني في التمانيات.
• المريخ هسع ما قادر يسجل.
• بيسجلوا في محمود ام بدة ..ونيلسون.
• نيلسون دا لعب في الأهلي الخرطوم.
• ولعب في الهلال.
• ولعب في هلال الابيض.
• وأخيرا حل بالمريخ في محطته الأخيرة.
• وكل دا ليه؟ ..عشان ما في قروش.
• يقول ابوشيبة عن حالة المريخ : (نادي المريخ يعيش حالة افلاس تام بعد أن تبخر حافز البطولة العربية وحافز المجلس العسكري للمشاركة في دورة شداد المهزلة (500 ألف جنيه).. المباريات التي خاضها المريخ في النخبة كشفت عن عقم هجومي مريع.. وفقد الفريق هيبته في مواجهة القمة الأخيرة حيث لم يشكل هجوم المريخ أي خطورة على جبهة الهلال الذي لازمه سوء الطالع في العديد من الفرص المؤكدة بجانب تألق الحارس أبوعشرين.. وبالعافية نجح الفريق في الخروج بالتعادل السلبي ونيل البطولة).
• بقيتوا تفتشوا في حافز الدوري يا ابوشيبة – والله حالتكم بقت صعبة ..يعني البشوفكم رجعتوا لتحويل الرصيد ودعم (الزعيم) ما كضب.
• شكلكم ح ترجعوا للتسجيل بالاتوس.
• انتوا يا ابوشيبة عندكم تجربة سابقة في التسجيل بالاتوس ..لماذا لم تستفيدوا من هذه الخبرات.
• المرة دي لا في صلاح قوش.
• ولا في عبدالرحيم محمد حسين.
• لا عبدالباسط حمزة.
• ولا ودعة.
• ولا التركي اوكتاي.
• كلو مكتوب.
• كلو مكشوف.
• السنة دي تتصرفوا براكم.
• عاوزين الحكومة تسجل ليكم – وتقعدوا تتفاصحوا فينا.
• الشيء الما لقيت ليه منطق …وما وقع لي …ابوشيبة كتب : (على جماهير المريخ أن تتهيأ لأسوأ المواسم في تاريخ النادي ولا تصدموا إذا خرج المريخ من الدور التمهيدي للبطولة الأفريقية (كالعادة). وكذلك الخروج من أول مباراة عربية فالمريخ سيخوض البطولة العربية هذه المرة من دون خط هجوم بغياب الغربال وبكري وتيري أصحاب الدور الكبير في نجاحات المشاركة العربية السابقة.. بل لا تصدموا إذا جاء قرار من الفيفا بهبوط فريق المريخ للدرجة الثانية..).
• ابوشيبة بقول المريخ ممكن يطلع من التمهيدي (كالعادة)..وبعترض بعد ذلك وبقول لا تتفاجأوا.
• طيب وقت الخروج من (التمهيدي) عندكم (عادة) يا ابوشيبة …الاستغراب في شنو؟.
• والله الموضوع ما فيه أي (مفاجأة).
• خاصة في ظل الاوضاع التي يعيش فيها المريخ الآن.
• بس الخوف من (الدرجة الثانية).
• الموضوع دا نحن ما بنقبلو ليكم.
• كمان جابت ليها (درجة ثانية).
• لا …لا ..اعلنوا عن ارقام البنوك للتبرع للمريخ.
• كلو شيء …ولا الدرجة الثانية.
• يقول ابوشيبة في عموده امس : (مصيبة المريخ ليست في الفلس فحسب فهناك اتحاد مشجعي الهلال اللئام الذين يعملون كل مافي وسعهم لتدمير المريخ ومسحه بالأرض.. وما فعلوه ببكري المدينة إلا تأكيداً على خطر هؤلاء المشجعين اللئام الجبناء على الكيان المريخي).
• عليكم الله دخل الهلال في قضية بكري المدينة شنو؟.
• الزول دا براهو اشتبك مع الحكم.
• وبراهو قال ما بطلع.
• وتسبب في الغاء المباراة وفي اقتحام الجمهور للملعب.
• ابوشيبة ترك كل هذه الامور …واتجه نحو الاتحاد العام.
• بكري المدينة لم تكن هذه المخالفة هى الاولى له.
• الزول دا مخالفاته التي وقع فيها اكثر من 5 مخالفات.
• اقل مخالفة بي سنة.
• مع ذلك ناس اسامة عطا المنان …كانوا بيرفعوا الايقاف ..وبيسمحوا لبكري المدينة باللعب مع المريخ.
• ابوشيبة فات عليه ان الهلال كان الاكثر تضررا من الدوري الممتاز بهذه الطريقة.
• الاتحاد العام الذي يصفه ابوشيبة بالمشجعين لفريق الهلال هو الذي ألغى نتائج مباريات النخبة الاولى والتي كان المريخ سوف يفقد فيها نتيجة مباراته امام هلال الابيض بسبب عدم اكتمال المباراة واقتحام جمهور المريخ للملعب.
• يعني المريخ كان سوف يفقد (3) نقاط في ملعبه ..وهذا امر كان سوف يمنح الهلال الفرصة الاكبر للفوز.
• كما ان قيام مرحلة النخبة بنظام الذهاب والاياب كانت افضل للهلال وكان يمكن للازرق ان يجعل الفارق كبيرا بينه وبين المريخ.
• الاتحاد لعب مرحلة النخبة بما يتصالح ويتوافق مع المريخ.
• الاتحاد العام برمج مباراة الهلال الاولى مع فريق الخرطوم الوطني ليخسر الهلال نقطتين في الاسبوع الاول للمنافسة ..وكان يمكن ان يكسب الهلال نقاط الجولة الاولى لو البرمجة (المطبوخة) وضعته أمام احد اندية الولايات كما فعلت مع المريخ ووضعته أمام الشرطة القضارف الذي لم يحضر للمباراة.
• كل اندية الولايات لم تحضر في الاسبوع الاول..عدا هلال الابيض وأهلي شندي.
• الهلال فقد الدوري بالبرمجة …وقد شهد شاهد من المريخ – ابوشيبة نفسه وأكد ان الهلال كان الافضل والاقوى ..واضاع فرص عديدة في المباراة …ويمكن القول ان الحكم حرمه من ضربة جزاء لو تعاملنا بمنطق ابوشيبة.
• ابوشيبة يقول ان الهلال سبب في ايقاف بكري المدينة ..ونحن نسأل هل كان الهلال سببا في اصابة محمد عبدالرحمن بالرباط الصليبي..؟
• هل كان الهلال سبباً في اصابة ضياءالدين بالرباط الصليبي.
• وهل كان الهلال سببا في اعتقال تيري.
• وهل عاد سوماتا الى بلاده بسبب مجلس ادارة نادي الهلال الذي لم يجبر مجلس المريخ على ان يدفع لسوماتا مرتباته.
• عزيزي ابوشيبة ..بعض هذه الامور (قدرية)..وبعضها كان قصور من مجلس المريخ ..ومنها كان (رعونة) من بكري المدينة نفسه.
• كل هذه الاشياء الهلال ليس له فيها يد – إلّا اذا نظرنا الى الامر من خلال (البعبع) الذي يراه ابوشيبة في الهلال.
• عزيزي ابوشيبة ..لقد فاز المريخ مع كل هذه الظروف ببطولة الدوري الممتاز – وهذا اثبات آخر ان مثل هذه الامور يجب ان لا تكون عائقا لتحقيق البطولات.
• ابوشيبة حتى فترة التسجيلات التي استمرت لمدة اسبوعين يتعبرها قصيرة وهي مخطط من الهلال ويقول : (مشجعو الهلال في اتحاد تدمير المريخ لن يتوقفوا عن أعمالهم القذرة والخبيثة في دعم الهلال وتدمير المريخ.. فكانوا قد قرروا اختصار فترة التسجيلات (الرئيسية) على أسبوعين فقط لأنهم يعلمون ان الفترة القصيرة للتسجيلات لن تمكن نادي المريخ من تجاوز حالة الفلس والفراغ الإداري فتفشل تسجيلاته.. وقد نجحوا في هذا المخطط.).
• عليكم الله يا ابوشيبة هسع لو ادوكم 6 شهور للتسجيلات بتعملوا شنو؟.
• ح تسلجوا (كونتاك) يعني!!.
• اسبوعين انتوا قاعدين وين؟.
• سبق للمريخ ان حرمه الاتحاد الدولي من التسجيل ..فهل كان ذلك أيضاً بسبب الهلال.
• غايتو الما بريدك في (الاجازة) يحدر ليك.
• ويقول ابوشيبة وهو يرى الهلال بعين السخط : (كما قرروا أيضاً إلزامية اشراك لاعب تحت 21 سنة في التشكيلة الأساسية لفرق الممتاز في أي مباراة بالموسم الجديد ومن يخالف هذا القرار يفقد نقاط المباراة!! بالطبع هذا القرار استهدف فريق المريخ وجاء مفصلاً لصالح الهلال لأن المريخ قبل تصعيد كلاسيك لم يكن يملك أي لاعب تحت 21 سنة.. بينما يملك الهلال لاعبين أساسيين تحت 21 سنة مثل موفق صديق ومؤمن عصام واسكندر، وآخرين أعمارهم مزورة ومقيدون تحت السن مثل ثنائي الهجوم الأساسي وليد الشعلة والطفل المعجزة ولاء الدين والحارس ابوجا!!).
• يعني الهلال دا قبل 4 سنوات او 5 سنوات كان يعرف ان هذا القرار سوف يصدر من الاتحاد الآن ، عشان كدا ناس الهلال الشفوت كانوا بيشركوا هذه الاسماء عشان تكتسب الخبرة الكافية عندما يصدر اتحاد الكرة قراره هذا.
• يا ابوشيبة أخوي ..لو ناس الهلال بخططوا بهذه الصورة …كان كل سنة بتلقانا في بطولة كأس العالم للاندية.
• يا ابوشيبة أخوي ..نحن ما خطرين كدا.
• انت براك..بتشعر بالخوف وترتعش من الهلال.
• بالمناسبة ابوشيبة نسى الشيخ (شيخو) ومهاجم الشباب الفلتة على كولا والمدافع دوشكا ..وحشر وليد الشعلة ساكت ..لأن وليد الشعلة ليس ضمن هذه الاسماء التي يمكن ان تلعب تحت 21 سنة.
• الهلال بقى (الربيع العربي)…شيلوا شيلتكم ساكت يا ابوشيبة.
• واركز بس.
• الجقليب ..ما بحلك.
• وحرية ..سلام وهلال.
• …………
• ملحوظة : وخلاص.
هوامش
• هو أبوشيبة خلى لينا شيء للهوامش.
• قفلت.
• غلقت.
• وبكرة يوم آخر.
• والثورة مستمرة.
• والربيع العربي في الهلال.
• وابقوا على سفر.
• ……..
• عاجل : استاد المريخ لو غرقتو (المطرة)..ابوشيبة بقول ديل ناس الهلال!!.