الرز المفلفل ما بنجح الطالب البليد !!

بالعربي الكسيح
محمد الطيب الأمين
الرز المفلفل ما بنجح الطالب البليد !!

* إهتمام متعاظم يحظى به (ممتحن الشهادة السودانية) وسط أفراد أسرته .
* في وقت سابق لما يكون في زول ممتحن شهادة سودانية بتلقى البيت كلو (واقف برجل واحدة) .
* إهتمام وكبكبة .
* يغسلوا ليك ملابسك .
* العصير مدور (24) ساعة في اليوم.
* تخت كباية (شربات الليمون) يجيبوا ليك (جك شربات الكركدي) .
* رز مفلفل .
* مديدة بلح .
* شوربة .
* بلح .
* لو جاك صداع ساي يجروا بيك الدكتور .
* وأيام الإمتحانات هي أيام صعبة جدا لكل الطلاب ولكنها أصعب بشكل أكبر بالنسبة للطالب المهمل الذي لا (يذاكر) .
* طالب لا يذاكر ولا يهتم ويتفاجأ بالإمتحانات .
* يتفاجأ بالامتحانات رغم إنها معلومة التوقيت .
* زي ناس المحلية في عهد الكيزان ، السنة كلها يلهفوا في القروش ونايمين وبعد الامطار تهطل والسيل يجي حتى هم يفكروا في الخريف وشغل الخريف .
* والواحد فيهو تلقى (كرشو) مترين في مترين .
* اصلا أي كرش من مال الشعب بتكون مترين في مترين .
* ما أقل من كده .
* نحن الكرش بتاعت الموية الباردة بنعرفها والكرش بتاعت مال الشعب برضو بنعرفها .
* المهم .. الطالب المهمل غالبا بيبقى (ضعيييف) أيام الإمتحانات .
* رغم إهتمام الأسرة بتلقى صحتو نازلة من فرط الهم والخوف .
* وبما أن ذلك كذلك فنحن في الهلال تجد (صحتنا نازلة) مع كل فترة تسجيلات .
* أي هلالابي عاشق الهلال لما تجي التسجيلات بتلقاهو بقى (ضعييييف) من شدة الهم والخوف .
* بنخاف ونشيل هم لأن رئيس النادي الكاردينال (طالب مهمل جدا) .
* الكاردينال ما بذاكر (السنة كلها نايم) ويجي يتفاجأ بالتسجيلات .
* بقى لينا زي ناس المحلية أيام البشير .
* والله صحي .
* التسجيلات تاريخها معروف ولكن الكاردينال (المهمل) يتفاجأ بها كل سنة .
* يبدأ الكاردينال التفكير في التسجيلات بعد انطلاقة التسجيلات .
* يفكر في المحترفين بعد التسجيلات تبدأ .
* يفاوض اللاعبين المفكوكين بعد التسجيلات تبدأ .
* إهمال شديد .
* عشان كده الكاردينال لم ينجح في أي فترة تسجيلات منذ جلوسه على كرسي رئاسة الهلال .
* فشل .
* تخبط .
* تخدير .
* كضب .
* ومواسير .
* والمواسير بيجوا عن طريق السمسرة .
* الجو داخل نادي الهلال مشجع للسمسرة .
* الأجواء صالحة للسمسرة .
* لما تكون أنت مهمل وما عارف التسجيلات متين رغم تاريخها المعلوم ، ولما تكون ما عندك لجنة فنية ولا عندك زول بيرصد لما تكون سبهللي ساكت يبقى لازم السماسرة يتحركوا ويغشوك ويلعبوا بيك ويلعبوا بينا .
* كاد الهلال أن يخسر الثلاثي بوي وعمار وبشة الصغير .
* أتفق معهم الكاردينال على (حاجة معينة) وسافر ولما جوا يستلموا (الحاجة المعينة) لقوها ما ياها .
* نقصوا القيمة المتفق عليها وقالوا ليهم شيكات .
* شغل بتاع استهبال .
* وربك رب الخير الموضوع انتهت على خير .
* باقي ولاء وسموال .
* الله يستر من المماطلة والاستحقار والاستفزاز .
* قلنا الكاردينال أتعلم لكن الكلام ده طلع حسن ظن ساكت مننا .
* الثعلب (جاب لروحو اعارة) قاموا عملوا معاهو مخالصة .
* عملوا عقد جديد وقالوا العقد بيلزم اللاعب يرجع الهلال ولا يلعب لنادي خلاف الهلال .
* وده طبعا عبط ساي .
* الثعلب جاب إعارة وعقدو ساري مع الهلال (المخالصة لزومها شنو) ؟
* مدد ليهو عقدو وخلى يمشي الإعارة .
* نفس الغباء الحصل مع شيبوب مع إختلاف بسيط .
* اكمل شيبوب عقده مع الهلال وانتقل لسيمبا التنزاني (إنتقال حر) .
* في حين كان ممكن الهلال يجدد عقد شيبوب ويفكوا لسيمبا إعارة وفي الحالة دي شيبوب بيستفيد والهلال بيستفيد .
* غايتو (شيبوب وامبومبو والثعلب) أكدوا أن مجلس الكاردينال ما عندو علاقة بالشغلانية دي .
* وح يجي يوم ويندم الهلال على الثعلب .
* ما تقول لي بتاع خماسيات ولا بتاع بلي .
* الثعلب لعااااب ونجم متمكن .
* لو بتاع خماسيات ولا بقعد في شارع النيل ده ما عيب .
* وين دور الهلال في تربية المواهب ؟
* مش نحن التربية عندنا قبل الكورة ؟
* طيب كيف نفشل في تقويم شخصية الثعلب ؟
* لو أي موهوب بمشي شارع النيل بنشطبو يبقى ما ح نلقى زول .
* طيب قول الثعلب ما نافع معاك عديل .. تعمل مخالصة لشنو والعقد ساري ؟
* ياخ جدد ليهو أربعة سنين تاني وكل ما يجي من إعارة طلعوا إعارة تاني .
* ولما تحس إنو بقى ما بتاع خماسيات أوقف الاعارات وخليهو يستقر في الهلال .
* القضية ما قضية الثعلب .
* القضية قضية إنو الهلال بيفرط في المواهب بطريقة بايخة ورخيصة .
* القضية قضية عقليه إدارية .
* عموما .. نأمل في ضم المحترفين ، الوقت يمضي ومباراة النجم على الأبواب .
* الخماسي الذي إنتهت فترته مع الهلال توقف عن التدريبات ثلاثة أيام في حين أن مباراة النجم متبقى لها أسبوع .
* عليك الله دي إدارة بتفهم ؟
* كل ما يمشي الفريق خطوة للأمام يجوا ديل وبغباء يرجعونا ستين خطوة ورا .
* الله يصلح الحال بس .
* صحتنا نزلت .. الله ينهي التسجيلات على خير عشان تعود عافيتنا .
* و…و..
* والله في .