الزنبقة الدخانية

نبض الصفوة
امير عوض

قال ليك واحد أول مرة يشوف ليهو عربية.

مطير عويناتو فيها لما العربية اتقلبت.

العربية بعد اتقلبت لساتكها لسه كانوا لافات.

صاحبنا جري يعاين للساتك.

البوليس جاهو قال ليهو الحاصل شنو هنا؟

قال للبوليس و هو بأشر علي اللساتك اللافه (بالله عليك شوف مراق الروح ده في الحديد حار كيفن).

أمس زنبوقنا روحوا مرقت من العفص.

86 دقيقة لساتكو لافات لما فاض بيهم.

المريخ قلبهم و الونش بتاع الاهلي المصري منتظرهم.

الناس دي أمس روحها ساكت حرقتها.

الواحد بجي ناطي من المدرجات يطقش السياج و لا بشعر.

كسروا السياج و عفصوا بعضهم.

اشتغلوا فليق في لعيبتهم قبل الحكم.

هيثم مصطفي ولدنا جاهم و عمل ليهم حركة الهنود بتاعت الاعتذارات.

الجماعة فايض بيهم شبكوهو (نهي نهي يا سيدا).

(نهي تاني ما بتتلعب لانها لو واصلت لساتكنا دي حتكون لافه بنمرة خمسة).

انت يا هيثم ذاتك بقيت مريخابي و ما مننا.

زح جيب لينا صلاح.

تهي.. تهي.

صلاح ذاتو ما دقاها في الهلال.

خلاص جيب لينا السادة.

لا لا.. ما تجيب السادة لانو قبل كده في قناة الملاعب قال المريخ بمتلك شخصية البطل.

استغفر الله العظيم من كل ذنبٍ عظيم.

المعفصة العملوها المريخاب أمس دي أصلاً ما طبيعية.

وسط صراعاتنا دي كلها نملطش الهلال قدر ده؟

أظن نحن اخدنا منشطات!

منشطات تلطيش.

العجب ده ما ياهو العجب.

تحس بيهو كده عايز يكفت جضوم الهلالاب ديل لانهم قالوا عايزنو.

مجرد الامنيات دي هيجت العجب.

اداهم كفين لما عاليها بقي واطيها.

خلي الهلالابي راسو لافي ما عارف الباب بي وين.

انتو قايلين الكسروا السياج ديل بتاعين الشغب؟

أبداً..

ديل ضحايا كفوف العجب.

العوينات زغللت و الراس كبس.

الكف ده حار ياخ.

بتحس بعيونك ولعوا.

برق بس.

قال ليك أمس ترامب اتعشي و ماشي ينوم.

العجب لما جاب القون التاني مرتو جات جاريه و قالت ليهو اصحي يا راجل الثورة قامت في السودان.

ترامب نطّ من السرير شعيراتو منكشات و جري علي التلفزيون.

أول صورة شافها هيثم قابض ليهو واحد و الشرطة جنبهم؟!!

ترامب عاين شاف ليهو الوان بيضاء في الشاشة.

كورك في المره يا وليه لحقيني النضارة البلد دي كتمت.

لبس نضارتو و بعدها عرف النور الابيض ده بمبان.

حاول يفهم كلام شمس الدين الامين ما عرف حاجة.

قناة الملاعب دي مفروض تعمل شريط ترجمة و كده.

المهم ترامب شاف عمر النقي مكشر وشو و صاري.

عرف انو الزول ده من المضطهدين في السودان.

ترامب ضرب للنائب بتاعو و قال ليهو (انت الاضطهاد ده تاني دور في السودان؟ انا موش كلمت حمدوك يقول للمريخاب حرام عليكم المرمطة دي؟).

النائب قال ليهو (يا ريس المعفصة دي مدورة من سنة 1932.. يعني بقت عادات و تقاليد و نحن ما بنقدر نقول للمريخاب أرفعوا رجلكم من الجاز)!!

ترامب قال ليهو طيب خليهم يقابلوني لو رفعت اسمهم من قائمة الارهاب.. علي الطلاق انا كردنة ده ما زولي و لا بعرفو لكن الحق حق.. المريخاب ديل ذاتهم ما براعوا لظروف الزنطور الوطنية ليه؟ موش عارفين الاهلي المصري في مجموعة الزنطور؟!! انا بكلم الامين العام للامم المتحدة عشان بكرة يعبّر عن قلقه.

دي النشرة العالمية.. خلونا نخش علي الاخبار المحلية.

فطومة طبعا تلطيش العجب ده خلاها فقدت التركيز.

اساساً المعارضة الهلالية موقفه نبضها.. كمان جاها تلطيش عجبكو.

فطومة استغربت لكمية البمبان.

تهي.. تهي..

قالت ليه كتير كده؟

لشنو البزار ده؟

فطومة ذكرتني قصة واحدة جايه جديدة من البلد و أول مرة تسمع كلمة (فجأة).

قال ليك الزولة دي عايزه تدخل الكلمة دي في أي جملة ما لاقيه طريقة.

يوم فاض بيها و قررت تستخدم الكلمة.

قامت نادت جارتها بتول و قالت ليها: (عليك الله يا بتول أديني حبل الغسيل بتاعكم و فجأة كدي أديني حبة ملح).

حالة فطومة زي حالة اختنا دي.

الناس في الغلب و المهرسة و هي مطيرة عيونها في البمبان.

قلت لي البمبان كتير؟

البمبان ده وقت كان بضرب الثوار انت ما كتبتي فيهو حرف هسه جايه تقولي كتير؟

كنت وين ساعة ليل نهار البمبان كان فوق الثوار؟

كمان قالت بمبان؟ بمبان بالباء؟

بمبان المدنية ده دخانو ذاتو كتير.

تحس بالبمبانه كده نفسها مفتوحة و عايزة تتمغي.

ريحة البمبان وصلت الكلاكلة من شدة الانبساط.

المريخاب ما شعروا بالبمبان.

كان عليهم برداً و سلاماً.

شفاتة ثورة معروفين.

لكن جماعة الرقيص مع المخلوع ضاقوا المُرّة.

الليل كلو مخنوقين.

مدعوم الانقاذ من زمن الوزير سليمان محمد سليمان ما بقدر علي شغل الثورات.

و الحمدلله المباراة كانت في استاد الخرطوم.

لو ما كده ناس قريعتي راحت كان طلعوا عقدهم كلها في استادنا.

الناس ديل تاني مبارياتنا معاهم حتكون في جبال المرخيات بس.

نختهم في الدروة و نقول للعجب أبدأ اللطش.

تاني في مقترح نوديهم وادي الحمار.

منها يتذكروا الحمار الكان مدفون في استادهم.. و منها الاخبار ما تصل ترامب.

المعفصة التأريخية دي لازم تتواصل.

و لا بنجامل فيها.

الأمم المتحدة رضت واللا أبت الزنطور ده نحن بنلطشو.

152 دقة تأريخية حتي الآن.

طلاق ترامب ده و لا بخوفنا.

يقبض الكاردينال واللا يفكو.. نحن الناس ديل ما بنخليهم.

لعيبة المريخ ديل من يجيبوا هدفين في الهلال بتحصل مصيبة.

ميدو قبل كده جاب التجميد.

و العجب جاب البمبان و هرّد المصران.

الغريبة الهلالاب ديل ما بتحملوا الدرش ده.

حاجة عجيبة!!

مع انهم طيش أفريقيا الثابت.

و ما حصل شالو بطولة طول عمرهم.

البشوف هيجتهم يقول هم الهلال السعودي.

هايجين في الهواء.

طيش و اتلطش.. موضوع اكتر من عادي.

صفر و اتعفص.. شنو يعني.

ربنا يصبرنا عليكم.

نحن بنحن عليكم و نقول عليكم ندنا.

مع انو ماف ندية و لا غيرو.

ما تخلونا نندم علي مجاملتنا ليكم.

حاولوا اتعلموا مننا.

أخدوا نقلة.

احتمال بعد 100 سنة ربنا يديكم كأس خارجي.

كردنة أمس الليل كلو ما نام.

يهضرب الليل كلو.

حلمان ساكيهو تور هايج.

مسكين.

من العليهو.

الاولتراس شالوا حالوا في التلفزيون و الوطن العربي.

و العجب وصل قضيتو الأمم المتحدة و ترامب.

في البطولة العربية جمهور الهلال برضو عمل شغب.

الجائزة كلها راحت في الغرامة!!

كردنة طلعت معاهو خسرانه.

المشاركة دخلت عليهو بالساحق و الماحق بسبب شغب الجمهور.

منظمات حروق الانسان قلبها مع جمهور الهلال.

بيت البكاء الأزرق تاني اتفتح.

عندي اقتراح الناس ما تفك الصيوان.

مباراة الأهلي المصري قريبة.

خلو الصيوان مدقوق.

السنة دي راجيكم بكاء كتير.

كلمو الفرحان يجيب صبارات زيادة و كم دستة كبابي.

السنة دي ما سنة بيانات.

بيانكم النكرتوا فيهو جمهوركم ده ما بقسم معانا.

تقولوا ديل ما ناسنا?

انتو ما بتعرفوا تختلقوا الاعذار حتي?

قاعدين في السهلة يعني?

بقيتو زي مدير المدرسة.

ده كمان قالوا مدير جاهو استاذ منقول من البندر.

قال للاستاذ ادخل سنة رابعة اديهم حصة فقه.

قالوا الاستاذ خش الفصل و حب يشوف معلومات الطلبه.

قال ليهم: (يا ابنائي من الذي قتل حمزة بن عبدالمطلب)?

الفصل كلو ساكت.

الاستاذ تاني كرر السؤال (يا اولادي من الذي قتل حمزة?) .

الاولاد تقول كبيت فيهم مويه.

صانين صنة عجيبة.

الاستاذ قوم اول واحد.

الولد قال ليهو (اعدم أمي و أبوي ما قتلتو).

قوم التاني.. و الولد ردّ (انا كنت عيان و غايب و ما حضرت قتلت حمزة).

الاستاذ دمو فار.. رسل نادي المدير.. و المدير جاء يبرطع.

المعلم قال للمدير (اولادك ديل ما عارفين القتل حمزة منو).

المدير دنقر علي الاستاذ و وسوس ليهو براحة (انت متأكد القتل حمزة ده من مدرستنا)!!

ادارة الهلال طلعت بيان زي قتلت حمزة.

كلام لا معني له و لا طعم.

تلطيش العجب ده عمل ليهم ربكة مخية.

ادارة الهلال ما عارفه من الذي قتل حمزة.

جابين ليهم بيان قالوا الشغب أتي من جماهير غريبة عليهم.

الزنبقة دي وصلت للمجلس.

جمهور الهلال ادارتو نكرتو حطب.

قالوا لا شوفناهم لا بنعرفهم.

86 دقيقة يشجعوا فيهم و في الآخر نكروهم.

ادارة الهلال حذرت الاتحاد من اتخاذ أي عقوبات!!

نعفيكم المرة دي يعني?

نديكم فترة سماح طيب?

طيب من الذي قتل حمزة?

بالله شوف ديل.

ليهم حق الاولتراس يشيلوا حالكم.

بالله ده بيان تكتبوهو.

دي خطواتكم التصحيحية يعني?

كمان قال بنحذر.

تحذروا منو?

و بشنو?

ياها فرمالتكم الانسحاب ده?

انسحبوا طيب.

والله المشاركة الافريقية تاني الا تشوفوها في اسبيس تون.

بيانكم ده تبلوهو بموية صحة.

و تشيلوا معاهو كيكة.

و تجونا بدري في الدورة التانية.

و برضو ما بنرحمكم.

لأنو الحل في البل.

فالناس تركز علي البكاء.

البكاء بحرروهو أهلوا.

الحمدلله الخريف انتهي.

ممكن تتزنبقوا في الخيران و تملوها دموع.

زنبقة أفريقيا علي الأبواب.

قلبي مع معتمد أم درمان.

حيشوف خريفين السنة دي.

خريف المطر الفات و خريف الدموع الجاي.

الله غالب.

المدنية كراعها خضراء لنادي الثورة.

مدعوم الانقاذ تعيش انت.

ابو شنب شال حالهم قبل كم يوم.

فضحهم فضيحة العدو.

الهلال ده بدون وزراء و حكومة و دعم لوجستي ما بقدر يكون ندّ لينا.

الا تدعموا الحكومة و لجان الاتحاد و الحكام و عيسي حياتو و جماعتو.

غير كده ببقي نادي عادي و السلام.

ندية معدومة و مزعومة.

المريخ في أضعف حالاته بسبب الصراعات و الزنطور برضو مقبور.

الجماعة قالوا ميدو ماف و نحن حنسرح و نمرح.

ما عارفين العجب موجود.

ذكروني قصة سيد الدكان البخيل.

ده قال ليك ما بقفل الدكان نهائي.

لا بقفل في عيد.. لا بقفل في عزاء و لا أي ظرف.

ناس الحلة أقنعوهو يعرس.

صاحبنا عرس و بعد العقد جاء فتح الدكان.

واحد من الجيران قال ليه الكلام ده غلط ياخ.. لازم تمشي شهر عسل و تفرح و لو مرة في حياتك.

صاحبنا اقتنع.

دخل بيتو و جاء طالع شايل شنطتو.

زولنا قال ليهو وين المدام طيب؟

قال ليهو (مسكتها الدكان).

نحن بالفي و بالمافي دائما ماسكين الدكان.

قصدي ضاربين الهلال.

المريخ بمن حضر.

ببكري و ميدو أو بالعجب و تيري.

كل الطرق تؤدي الي روما.

ضرب بس.