• قبل سنوات طويلة كان العزاء في البيوت السودانية يستمر لاسابيع .. ثم تقلص الامر لاسبوع قبل ان يستقر لفترة طويلة في ثلاثة ايام ثم قرر السودانيون بالاجماع الاكتفاء بيوم واحد للعزاء !! ولكن يبدو ان اهل (المسالمة) يريدون ان يعودوا بمراسم العزاء لاسابيع واكثر .. فبيت العزاء مازال مفتوحا منذ اعلان وفاة حلم الدوري الممتاز بفاشر السلطان عبر رصاصتي منتصر ! منذ ذلك التاريخ وبيت العزاء في المريخ مفتوح علي طريقة (فتح البكاء) مع كل حدث جديد .. الشكوي جددوا لها العزاء .. رفض الشكوي جددوا له العزاء .. الاستئناف علموا ليهو عزاء برا .. رفض الاستئناف ذكرونا بالجنازة الجديدة !! السودان كلوا بتكلم مع اهل (العزاء) استغفروا الله يا جماعة .. حال الدنيا يا اخوانا .. مافي زول خالد فيها يا جماعة .. كدي قولوا بسم الله .. الجماعة صبروا شوية وفجاة كده البكاء انفتح من جديد وبعنف شديد .. خير ان شاء الله في شنو .. في دوري تاني طار !! قالوا لا ده جمال !! بكاء بكاء بكاء .. دموع مطر .. البلد يا دوبا نشفت من الخريف .. مجاري طفحت !! جمال سافر .. جمال ما رجع .. جمال وقع للهلال .. لا حولة ولا قوة الا بالله .. جمال مفكوك .. جمال مربوط .. جمال عندو عقد .. جمال عندو خطوبة .. يا جمال يا جمال يا جمال تعال !! بيت البكاء انفتح تاني والناس تصبًر .. يا اخوانا .. اي زول بفارق كدي روقوا .. ربنا بعوضكم .. والعوض قالوا في البرازيليين .. برازيلي جا وجاب اخوهو معا .. قريش يبكي ومحمد الشيخ يكتب وعدار ظهر تاااااني .. عايز عقد جديد .. والجديد شديد .. يا جماعة انتو ممنوعين .. نحن ممنوعييين ؟ والبكاء انفتح تاني .. يا اخوانا ديل البسكتهم شنو .. نحن ماشين الفيفا .. نحن استفسرنا الفيفا .. عندنا خطاب من الفيفا .. وانا اعيييط .. ومازن رسل لي الفيفا .. يا مازن كتبت شنو للفيفا .. مازن قال كتبت القالوا لي ! وقالوا ليك شنو يا مازن .. قالوا البرازيليين مسجلين من زماااان .. من قبل حادث فاشر السلطان .. وانت يا مازن صدقت وطوالي كتبت ! والله اخير عصام شعبان .. ويا حليل عصام شعبان وفلان وعلان .. والذكريات اشجان والجماعة بكوا شدييييد .. يا حليل زمان وسنين زماااان .. واحمد المصطفي وخالد النعسان .. مافي مشكلة ديل بخطاب بتسجلوا .. الحمد لله .. والبرازيلييين .. وانا اعيط .. ونحن ماشين لوزان وانا اعييط .. والدولار راح شمار في مرقة راح .. لا برازيلي ولا دولار ولا جمال .. القال بيت العزاء اتقفل منو .. لسه .. انتو شفتو حاجه .. وبيت العزاء عامل كيف؟ السالم فشفاشو وارم !!
• يا بخت هلال الابيض ..
• بعيدا عن بيت العزاء فان اهلنا في كردفان في قمة الفرح والترتيب والنظام .. هلال الابيض الذي استفاد من اعارة الشغيل يريد تكرار التجربة في (كابو) لاعب صغير السن في خانة يعاني منها هلال الابيض .. نجح الشغيل واعتقد ان كابو سيكرر التجربة ويا بخت هلال الابيض بخالد بخيت مدرب شاطر ومحترم وقمة في الاخلاص والانضباط .. هلال الابيض سجل عبد الرؤوف نجم الشرطة القضارف احد ابرز المهاجمين في الدوري الممتاز .. هلال الابيض اعلن مبكرا رغبته في منافسة الموردة بعنف علي المركز الثاني !!
