*وتمضي خطي المريخ نحو مشنقة الفيفا بثبات ينم علي شجاعة المحكوم عليه بالاعدام
*واولياء الدم غرزة وانطونيو بحسب الاعلام الشرعي المودع لدي الفيفا يصرون علي القصاص
*لان اهل المحكوم عليه لم يعرضوا الدية من اصلو
*فلقد رأوا ان مبلغ الدية لاقبل لهم به
*لذا تجاهلوا موضوع الدية وتركوا القصاص لاولو الالباب
*ان شاء الله ربنا يفتح علي اولي الالباب ويقنعم بان ان تعفوا فهو خير لكم لو كنتم تعلمون
*مجلس المريخ منتظر وان تعفوا دي
*والمريخ ياحبة عيني يرتدي احمر الاعدام وينتظر ان يهدي الله اولياء الدم لان تعفوا
*المريخ يمضي للمشنقة بثبات
*وبعضنا يتحامر
*وبعضنا يتآمر
*وبعضنا خصص كل جهده لدفع المسؤولية عن نفسه
*وكأنه يريد ان يقول ان موت المريخ لم يكن بسببه هو
*كل المهم عندهم تبرئة انفسهم والبحث عن اسباب يدينون بها الغير في جريمة قتل المريخ العظيم
*وهاهي المواقف تشير للاسف الي حقيقة ان معتركاتنا والانتصار لذواتنا اهم من المريخ عندنا
*ودي احدي افرازات اعتناق العقيدة بواسطة الشيوخ والمشايخ
*فيصبح الولاء للشيخ والمحبه اعمق من الانتماء للعقيدة ذات نفسها
*نسأل الله ان يهدينا جميعا
*برغم اننا انصار سنة في عشق المريخ
*لا ندين له بواسطة شيخ
*من القلب ولي الله طوالي
*ولك الله يامريخ
*واظنك لازلت موفور القيم
*المهم
*في مليونية اسقاط كردنة
*كان الناس الصابنها يتفرجون بدهشة علي النادي الذي اعاد كردنة تأهيله بتلك الروعة التي ادهشت خصومه
*لكن كمان كردنة حقو يواكب شوية
*فلقد انتهي العهد الشمولي وعهد القرارات الفردية الفوقية
*وعلي كردنة السماح لفراجة مجلسه بالعمل والتحدث والمشاركة في القرارات وادارة شئون النادي
*لانو ماممكن يدفع براهو
*ويقرر براهو
*يسجل براهو غير آدم مافي زول معاهو
*ويشطب بدون حتي آدم المعاهو
*ابو الهل يحتاج حكومة مدنياااااو
*عشان كده خليك حمدوك واشرك الكفاءات الهلالية
*حمدوك ولا جوك جوك ياكردنة
*ايها الناس
*عرفتوا ليه تلتين سنة بننبح اخرجوا الاندية من جيوب الافراد!
*ياعيني ياعينيه
*يابتاعت الاعتماد علي الجيوب الفردية
*امرقي
*امرقي من رياضتنا
*امرقي من انديتنا
*امرقي من جميع مناشطنا
*امرقي
*عين الجكس تفور الببس
*وعين الصبي شرا غبي
*وعين الفتاه
*حوصاء وشتراء تقد الواطة
*امرقي
* لازم تمرقي ونحن نستبشر خيرا بولاء البوشي وعهدها شبابا ورياضة
*وياعيني ياعينيا
*يا الامانة الشبابية
*امرقي مرقت روحك
*ايها الناس
*الغلاء كتلنا
*الثورة سلوك
*ولكن الجشع يعشعش في السلوك القديم الغير قويم
*فتفشي الغلاء بدون اسباب
*حملة مقاطعة اللحوم تدعونا لمقاطعة اللحوم
*وهي لاتدري باننا مقاطعنها من بدري
*حتي في الضحية قاطعنا اللحوم
*لاقبل لنا بها
*وكي تنجح هذه الحملة الحل وحيد وساهل
*اوقفوا تصدير اللحوم السودانيه حيه ونيه
*وتنزل الاسعار بسهولة وسرعة
*فالتصدير العشوائي احد اهم اسباب غلاء اللحوم
*ولتلك الشركة الامنية التي تصدر لحومنا يوميا لمصر
*يعود السبب في الغلاء الفاحش
*وهناك شركات كبري
*تريد ان تخرج ريعها من السودان
*تساهم بقدر كبير في شراء الدولار من السوق مما يخلق رواجا يمرمط جنيهنا اكتر من كدة
*ونفس تلك الشركات تقوم بشراء الماشية من اسواقنا المحليه وتصديرها في عملية احتياليه لاخراج نقودهم خارج البلد
*لذا تجد الخروف السوداني في السعودية ارخص من سعره في السودان
*تلك الشركات تبيع خرافنا في السعودية بالخسارة
*ومكسبها انها اخرجت نقودها من السودان
*وليحرق السودان
*اوقفوا تصدير الماشية حتي ترتيب الامر
*تعود كثير من الامور الي نصابها
*دي اللحمة
*طيب الخضار اسعارو فاحشة ليييه؟
*اوريكم
*في ناس اسمهم السبابه
*لابزرعوا
*لابحصدوا
*لابرحلوا
*لابفرشوا الخضار
*كل عملهم هو التسبب في رفع سعر الخضار الي اسعار جنونية ويطلعوا منها بمال ياكلوهوا
*تاكلوا السم يا السبابه
*وبقليل من الرقابة ياحمدوك يموت السبابه جوعا لو ماشافوا ليهم شغله زي الرجال
*فالمجاعة بسبب الغلاء السبابه هم احد اهم اسبابها
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*يا الاسواق تظبطوها لينا
*يابنخش السوق شايلين سكينه
سلك كهربا
ننساك كيف والكلب قال بلد كلها سماسرة عمرها ماتنتج
والي لقاء
سلك
