صحيفة كورة سودانية الإلكترونية

الشعرة الما بتعرف الواجب بتقوم في الرقبة وتخلي الحاجب !!

716

بالعربي الكسيح
محمد الطيب الأمين

* من النعم الكبيرة (شعر الرأس) ..
* وشعر الرأس نعمة لا يعرف قدرها إلا (الأصلع) ..
* هذا بالنسبة للأصلع الذي لا يحب الصلعة ..
* في ناس عندهم شعر ومتمنيين الصلعة ..
* وفي ناس عندهم صلعة وبالقروش ما لاقين شعر ..
* والشعر ذاتو مرات عندو حركات ما لذيذة ..
* أهلنا بيقولوا : (الشعرة الما بتعرف الواجب بتقوم في الرقبة وبتخلي الحاجب) ..
* والله صحي ..
* تلقى زول عندو شعر في رقبتو بينما رأسه أصلع وكذلك حواجبه ..
* وبالمنطق كده .. الرقبة أصلاً ما محتاجة ليها لشعر ..
* الشعر بيخلي المحل المخصص ليهو وبيمشي يقوم في الرقبة التى هي ليس من إختصاصاته ..
* عشان كده بيقولوا ليك: (الشعرة الما بتعرف الواجب بتقوم في الرقبة وتخلي الحاجب) ..
* وبما أن ذلك كذلك فأن الأخ بكري المدينة هو من الذين لا يعرفون الواجب..
* الواجب كان يتطلب من بكري المدينة أن يسافر مع بعثة المنتخب ويتعالج على هامش المعسكر..
* ولكنه وعلى طريقة (الشعر الفي الرقبة) فضل بكري الهروب ..
* بكري ظهر أمس وهو يعتذر ..
* إعتذار بكري غير مقبول ويجب أن تتم معاقبته حتى يعرف أن المنتخب الوطني (خط أحمر) ..
* المنتخب (حاجب) والمريخ (رقبة) وبكري لازم يعرف الواجب..
* لو تم فتح باب الإعتذارات سيفعل كل لاعب ما فعله بكري ..
* تزوغ من المنتخب وتقفل تلفونك وبعد أسبوع تجي تعتذر..
* لو بطريقة بكري دي ما في لاعب بيلعب للمنتخب ..
* العقاب هو الحل الوحيد ..
* الغريبة بكري ماشي يتعالج والإعداد إنطلق ..
* المريخ الأيام دي.. تضحك بس..
* أي حاجة في المريخ الأيام دي مثيرة للضحك ..
* إعداد (المدفور) إنطلق بمشاركة (11) لاعب..
* والإعداد ذاتو شغال بدون مدرب ..
* المريخ هذه الأيام بدون مدرب وبدون رئيس نادي ..
* يبدو أن العدوى إنتقلت من (عدم وجود رئيس إلى عدم وجود مدرب) ..
* إتخيل فريق يبدأ الإعداد وما عندو مدرب ؟؟
* حتى محمد موسى قالوا ما عارفين أسباب غيابو ..
* يمة الليلة الزول مالو ما ورانا أسبابو ..
* المدرب غائب والإعداد شغال ..
* وفي حوالي خمسة لاعبين متواجدين في مستشفيات القاهرة يتعالجون ..
* وده كلو كوم وقصة ياسر قصاري كوم تاني ..
* ياسر قصاري الذي سجله المريخ من الأمل عطبرة هذا الموسم لم يتم إخطاره بموعد إنطلاقة الإعداد ..
* إتخيل لاعب بيلعب في المريخ يقوم الصباح يفتح الصحيفة يلقى خبر يقول: (المريخ يدشن إعداده أمس والجمهور يستقبل اللاعبين الجدد بحرارة) ..
* مسكين ما عارف ..
* ما عارف إنو الفريق البيلعب فيهو إعداده إنطلق ..
* قصاري بيكون إستغرب ..
* بيكون إندهش ..
* الإعداد بدأ وهو ما عارف ..
* المريخ الأيام دي عبارة عن (كوميديا) عديل ..
* تضحك بس ..
* وخليك من ده كلو ..
* الغريق قدام ..
* ورد في الصحف أمس وتحديداً في صحيفة (قوون) خبر يقول بالنص: (إكتشف الجهاز الطبي للمريخ إصابة مفاجئة للمهاجم السيراليوني فوفانا بعضلته تستدعي العلاج بحقنة معينة وتقرر أن يغادر اللاعب إلى القاهرة) ..
* ده الخبر ..
* ويمكننا أن (نفتت) الخبر ..
* أول حاجة المريخ قبل هذا الخبر إتمرن تمرينين اتنين ..
* في التمرين الأول صحف المريخ قالت إنو فوفانا ظهر بمستوى لافت ..
* وفي التمرين التاني قالوا حصلت الإصابة ..
* وإحنا ما عندنا مشكلة في الإصابات ..
* عادي الإصابات بتحصل ..
* لكن المشكلة قالوا إنو الجهاز الطبي إكتشف إصابة (مفاجئة) لفوفانا ؟؟
* إصابة هي ولا (ضب) أصلو ؟؟
* إصابة مفاجئة دي أنا ما فهمتها ..
* ما في حاجة إسمها إصابة مفاجئة ..
* الإصابة يا إما تكون إصابة تعرض لها اللاعب أثناء التدريب أو هي إصابة قديمة وإتجددت في ثاني تدريب ..
* ثم ثانياً.. في الخبر ورد أن الإصابة تحتاج لـ(حقنة معينة)..
* وحقنة معينة دي برضو أنا ما فهمتها ..
* كيف يعني حقنة معينة ؟؟
* حقنة شنو ؟؟
* ضغط وألا سكري وألا زهايمر وألا شلل أطفال ؟؟
* إصابة في العضلة ومحتاجة حقنة معينة.. كلام عجيب ..
* والحقنة وين ؟؟
* قالوا في القاهرة ..
* طيب الحقنة دي في السودان ما في ؟؟
* الزول ده لو عندو مرض ولا مصيبة كلمونا من هسه عشان ما يبقي لينا زي موضوع كونلي..
* لو الموضوع موضوع حقنة فأعتقد أن الحقنة ما دايرة ليها زول يسافر القاهرة ..
* القاهرة أو العلاج بالخارج الناس بتسافر ليهو بسبب الأمراض الكبيرة ..
* وإنتو قلتوا الزول ده عندو إصابة (مفاجئة في العضلة)..
* في العضلة.. يعني ما محتاجة عملية ..
* إصابة محتاجة حقنة ..
* يعني حقنة واحدة وببقى كويس ..
* طيب هي حقنة شنو ؟؟
* من حقنا نعرف ..
* كل شئ في المريخ بقى ما مفهوم ..
* لا رئيس لا مدرب ولا قصاري ولا حقنة معينة ..
* الأمور جايطة ..
* والحال مائل ..
* وتبكو بس .. عين قطرة وعين مس ..
* الدخلت في المريخ تاني ما بتمرق ..
* والطيران ح يكون من التمهيدي ..
* وبالمناسبة ..
* يوم (18) عازمنكم الإفتتاح ..
* عازمنكم لكن ما تجوا ..
* عازمنكم مشاهدة بس ..
* تفتحوا قناة الهلال وتستمتعوا ..
* وغايتو السنة دي بالذات يا متنا من الضحك ويا كمان الضحك كتلنا ..
* ونركب صافنات ونجيبة (برناوية) وأصلو الزول بيموت والذكرى تفضل حية..
* و..و..
* وتسيبني في عز الجمر وإنت من حولي….. بتأكل رغيفتين كاملات ؟؟

 

 

حمل تطبيق كورة سودانية لتصفح أسرع وأسهل

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملوh التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app

 

 

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد