بالعربي الكسيح
محمد الطيب الأمين
العريس (ثائر) والعروس (مدنية) !!
* إبتسامة رئيس وزراء إثيوبيا لخصت بهجة أفريقيا بما تحقق ..
* وكلمة الأصم اراحت شهداء الثورة في قبورهم ..
* فكان العنوان الاوضح العريس (ثائر) والعروس (مدنية) ..
* إنتهى عهد (الفول والبلح) وبدأ عهد (الصلاح والفلاح) ..
* والحمدلله رب العالمين ..
* طبخت لنا (الشطة) طبيخ ماهر مقتدر ، فشبعنا (عدس) أول أيام عيد (اللحم) وحمدنا الله علي نعمة (اليد العملت الشطة) .
* وعلي فكرة .. هنالك علاقة (لحم ودم) بين النساء الجميلات والشطة الحارة .
* معظم الجميلات يحبن الشطة الحارة جدا و(الملح البارد جدا) .
* وأنا ما بفسر وأنت ما تقصر .
* السودان بالأمس (لبس النيل كرفتة) ، وظهر في كامل اناقته في يوم زفافه .
* الوطن عريس بعد أن كان (بائر) لثلاثين سنة .
* اتفكت (البورة) يا وطني العزيز ، و(إن شاء الله نغلبك بالعدل وتغلبنا بالرخاء) .
* طوى السودان حقبة سوداء مزقت جسده وزرعت الحقد والكراهية والظلم والقبلية ..
* حقبة فاسدة اغتالت الشخصية السودانية وباعت الوطن الغالي بالرخيص جدا ..
* (مدنية) في سبيلها بذلت كثير من الأرواح والدماء .
* (عزاز علينا) كانوا وقود كل المواكب والحراك فقدناهم ونحن نحتفل بالمدنية ..
* هم حق منا بحضور هذا اليوم العظيم ..
* هم أشجع منا وأقوى وأفضل ..
* اختارهم الله لجواره ولم يعيشوا معنا لحظات ميلاد السودان الجديد ..
* بعد (9) شهور من الشد والجذب والدم والدمع خرج السودان الجديد ..
* خرج السودان الذي كان يحلم به كل شهيد وكل جريح وكل مفقود ..
* وليس هنالك مفقود أعز وأغلى من هذا الوطن ..
* يعود الآن السودان تدريجيا لسكة العافية .
* عافية طال انتظارها ولكنها تدب الآن في جسد الغالي جدا السودان ..
* نسأل الله أن يحفظ وطننا الحبيب وأن نعود لقيادة أفريقيا والعالم مجددا ..
* مبرووووووك ..
* في العيد .
* من شفت ناس حلتنا جدعوا (جلود الخرفان) في الكوشة اتأكدت إنو الحكومة سقطت جد جد .
* زمان الجلد بشيلوا ناس الدفاع الشعبي عن طريق ناس المحلية .
* أي (جلد) شالوا مننا ناس المحلية ما عافينو ليهم .
* (جلودنا) بنلقاها قدام .
* و (جلودنا) زمان وصونا علي (اللحم) .
* الشيخ عبد الحي يوسف يبكي علي الدين والشريعة وكأن الدقير والاصم هما من كفار قريش .
* نقول لمولانا : (الدين في العهد الجديد سيعيد سيرته الأولي لأننا سنوقف التجارة واللعب والسرقة باسم الله) .
* كلو بالقانون يا مولانا .
* صدح عثمان مصطفى بصوته السعيد مغنيا : (الرمال الناعمة مشتاقة لمشيك) ، وغنى التاج مكي بصوته الفاخر : (على الرمال أثارك طرتني ليلة عيد) .
* وأنا وأنت حقو نغني (الطين في الرجلين ببقى نعلين) .
* غايتو الخرطوم تاني مطرة واحدة وتبقي ما في خرطوم .
* تألقت إسراء عادل بثوبها الأبيض الأنيق في تقديم فقرات حفل التوقيع ..
* حضور إسراء كان عاليا ومقبولا غير أننا كنا نطمع في ظهور سعد الدين حسن ..
* سعد من الثوار ولو رافق إسراء في التقديم لنا أفضل لهم ولنا ..
* عموما إسراء ما قصرت ..
* فقط نلوم القائمين علي أمر التنظيم الذي كان سيئا جدا ..
* هرجلة لا تليق بالسودان الجديد ولكن سنغفر لهم لأن الفرحة أكبر من العتاب .
* ده السودان وديل شبابو والقادم أجمل إن شاء الله ..
* ونركب صافنات ونجيبة (سودانية) واصلو الزول بيموت والذكرى تفضل حية .
* و..و..
* ويا أستاذة : بعد شربت شربوتكم إلا سألت ناس حلتنا من وصف (بيتنا) ، وبرضو وصفوا لي غلط !!!
* عليك الله افصلي (الشر) من (البوت) .
* و…و….
* والكنت قايلو فات زمان رجعتو بي …..(نص كباية شربوت) .
