صحيفة كورة سودانية الإلكترونية

(العمود) ده سلموا لمحمد الرشيد في يدو وما في زول يقرأ !!

78

بالعربي الكسيح

محمد الطيب الأمين

(العمود) ده سلموا لمحمد الرشيد في يدو وما في زول يقرأ !!

 

* بعض الخطابات (سرية للغاية) لا يطلع عليها إلا (المرسل إليه) .
* وخطابات أخرى هي (سرية) ولكنها (للجميع فقط) .
* خطاب (سري) لكن مطالعته حق للجميع .
* واليوم أود أن أكتب خطاب (سري للغاية ولكنه للجميع فقط) .
* خطاب للاخ محمد الرشيد لاعب فريق المريخ .
* وأتمنى أن يصله هذا الخطاب ويجده في أحسن حال .
* أما بعد .
* تعلم أخي محمد الرشيد أن كرة القدم هي مثل (ضل الضحى) .
* وتعلم أن لاعب كرة القدم لا يرتاح له بال إلا عندما يصل القمة .
* وأنت بحمد الله وتوفيقه وصلت القمة .
* والقمة درجات وطوابق .
* زي العمارة .
* طابق تاني وتالت ورابع وخامس .
* مجموع هذه الطوابق يسمى (عمارة) ، وتبقى الميزة للطابق الأخير الذي يعقبه (سطوح) .
* انت حاليا في الطابق قبل الأخير وهو المريخ .
* والهلال هو الطابق الأعلى والاقيم والأهم في بنيان ترتيب الفرق في السودان .
* والحاجة دي ما دايرة ليها درس عصر ولا فيها غلاط .
* عقدك مع المريخ (منتهي) وامامك عرضين إثنين.
* عرض من المريخ الذي هو (النائب الأول للهلال) ، وعرض من الهلال الذي هو (الفريق أول كرة قدم في السودان) .
* إذا تساوى عرض الهلال وعرض المريخ عليك أن تختار الهلال .
* قول لي ليه ؟
* ليه ؟ لانو الهلال هو (الفريق أول كرة قدم) ، وكعبه الأعلى ، وهو الممثل الشرعي الأول للبلد .
* الهلال بيمثل البلد وبيختار معاهو المريخ (صحبة راكب) .
* اسألك سؤال يا محمد الرشيد ، سؤال بدون زعل .
* وجاوب بصراحة .
* الله يسألك من سجلت في كشوفات المريخ هل حصل اتجاوزت مرحلة التمهيدي في البطولة الأفريقية؟
* حصل ؟
* ما حصل ، عقدك مع المريخ بدأ وانتهى وانت ما لعبت غير التمهيدي .
* ودي بتذكرني قصة علاء الدين يوسف .
* تصدق يا أبو حميد علاء الدين يوسف لعب للمريخ وعقدو لحدي ما انتهى المريخ ما شال كأس الممتاز .
* علاء الدين جا شاف الألقاب والكاسات في الهلال .
* والله صحي .
* خليك من ده كلو ، المريخ بالنسبة لكل اللاعبين تقريبا هو (وسيلة) يصلون بها لغاية إسمها الهلال .
* ما تقول لي محمد عبد الرحمن خلاكم لشنو وبكري المدينة .
* محمد وبكري تركا الهلال نتيجة استفزاز من الزول الفاوضهما.
* ما في لاعب من الهلال مشى المريخ (حبا في المريخ) .
* اي لاعب مشى مننا مشى زعلان .
* لكن اللاعب من المريخ بيجي الهلال (حبا في الهلال) .
* عندك مثلا علاء الدين جا الهلال في (عز) قوة جمال الوالي المالية.
* يعني الموضوع ما قروش .
* فييرا جا الهلال بأقل من قروش المريخ .
* الشغلانية حب يا اخوي.
* المهم .
* انت مكانك الهلال ، لاعب متمكن وعندك شخصية واضحة في الملعب وتستطيع أن تفعل الكثير مع الهلال .
* سيتيح لك الهلال فرصة الوصول إلي المجموعات والأدوار المتقدمة في البطولة الأولى بأفريقيا.
* مجتمع الهلال وإعلام الهلال يا محمد الرشيد بيصنع النجم وبيقدمه في أبهى صورة .
* العملوا الهلال لعبد الروؤف في شهرين لم يفعله المريخ للتش في سنتين .
* شاشة عرض المواهب في الهلال أفضل.
* الأضواء في الهلال أكبر.
* ما يغشوك يقولو ليك جدد عقدك .
* والله تندم .
* المريخ لا عندو قروش ولا هو الفريق الأول في البلد .
* افريقيا بتعرف الهلال .
* واديك حاجة تانية .
* في المريخ لو جاتك نزلة ساكت (بنكروك حطب) .
* شوف محمد عبد الرحمن شال المريخ في كتفو ووصلو المربع العربي ، وأول ما اتعرض لإصابة جدعوهو في قطر .
* عشان كده محمد لما اتعالج رفض يجدد عقده مع المريخ .
* رفض عديييل كده .
* نصيحتي ليك يا ود الرشيد تعال الهلال حتى لو تساوى عرض الأزرق مع عرض الأحمر.
* وانا على ثقة لو المريخ اداك ٤ مليار الهلال بيديك ٦ .
* تعال الهلال وبتحس بالفرق والله العظيم من أول أسبوع.
* تعال عشان تلعب مع ابوعاقلة وقدامكم روفا.
* تعال عشان تعيش ملك وعشان تشبع سفر وتجوال في أفريقيا.
* تعال عشان تبدا كرة القدم .
* تعال من (الوصيف الدائم) للبطل القائم .
* مصلحتك فوق كل شي .
* حتى لو ما جيت الهلال ما تجدد للمريخ بأقل من ٦ مليار .
* يدوك ٦ كاش .
* والله أنا لو في محلك لو المريخ اداني ٦ والهلال اداني ٥ بجي الهلال.
* في حاجات كده القروش ما بتجيبها.
* المهم .. أنا وريتك .
* اقرأ العمود ده كويييييس واسمع كلامك الببكيك.
* القروش في الهلال والنجومية في الهلال والإعلام في الهلال والعز في الهلال.
* ختاما .. تقبل تحياتي وكل جماهير الهلال وقريبا نلتقي لنرتقي.
* وتبكو بس .. عين قطرة وعين مس .
* ونركب صافنات ونجيبة (عطبراوية) واصلو الزول بيموت والذكرى تفضل حية.
* و..و..
* وفاض بي لهيب الشوق وما عارف أحوالها الحلوة ست الناس يا ريتني………..(كهربا في بيتم) .

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد