صحيفة كورة سودانية الإلكترونية

(الفاس) وقع في الرأس !!

2٬414

صابنها

محمد عبد الماجد

(الفاس) وقع في الرأس !!

• لقيت لي مريخابي زعلان – قاعد يتكلم براه – ينفخ في (الهوا) زي (الفرن) الشغال بالحطب.
• قربت منو؟
• قلت ليه في شنو؟
• يا زول اهدأ.
• يا زول روق.
• ما كدا.
• هي الدنيا دي فيها شنو؟
• المريخابي قال لي اروق كيف يعني اذا الهلال بسجل في ( ألفاس إلفيس باول) والمريخ بسجل في (كرنقو).
• قلت ليه (كرنقو) مالو؟
• كرنقو بقى ليكم كعب هسع.
• انتوا ما قلتوا كرنقو دا احسن زول.
• مالكم هسع بقيتوا تنقنقوا.
• المريخابي قال لي والله نحن ناس مزمل ابوالقاسم ديل كل مرة يغشغشوا فينا.
• قلت ليه ما تزعل…هسع بكرة مزمل ابوالقاسم يقول ليكم ( ألفاس إلفيس باول) عندو رباط صليبي.
• ويمكن يقول ليكم تسجيله ما قانوني.
• وفي زول مسح الايميل.
• ويمكن يطلعو قاصر..تقول عاوزين نطلع بيه ورثة.
• ومالو (مكعوج) كدا.
• قالوا ليك نحن عاوزين نعرش بيه.
• وإلّا عاوزين نوزن بيه (الطبق)؟
• نحن عندنا طبق – كل ما (طبنجة) يعكس ليه كورة – قناة الملاعب بتقوم تطش.
• نحن في البداية افتكرنا المشكلة في (الطبق)…اكتشفنا بعد الحين ان المشكلة في (طبنجة).
• ما في الملاعب.
• عكسيتو بتمشي السما.
• غايتو يا ناس الهلال – القدرة البقت عندكم في ريال مدريد مافي – معقولة يفتحوا ليكم التسجيلات مخصوص – (استثناء) كدا عشان تسجلوا (الصاقعة) ده.
• الصاقعة ده البيرجاه ليكم منو؟
• الواحد هسع لو وقعت فيه (صاقعة) خاطية عليه.
• قالوا ليك صلاح نمر لمن سمع بالخبر اختفى ودخل (البطانية) ، لغاية الآن ناس المريخ ما عارفنو اختفي وين؟
• مفقود ليه 24 ساعة.
• وكان لي امير كمال – بقى يقوم من النوم ويقول انا ما بلعب …ما عاوز …خلوني.
• فكوني.
• ما عارفين الحاصل عليه شنو؟
• ومامون ابوشيبة قال السبب كمال شداد.
• كله من شداد.
• يمين ناس الهلال جابو ليهم (رئيس فخري) ممكن تقعد تتابع في الدوري الاسباني بعين قوية وتقول عاوزين اللاعب دا.
• حتى لو كان بيلعب في ريال مدريد.
• سمحة (المفخرة).
• قالوا ليك د. مزمل ابوالقاسم دخل (غوغل) يفتش في (الايميل) – يمكن يلقى ليه (شركة صينية) حايمة.
• انا ما عارف.
• الايامات دي في (برد).
• ولمن يكون في (برد) بتحصل لخبطة.
• هسع الدخل (البرد) في موضوعنا دا شنو؟
• ما تستغربوا – مزمل ابوالقاسم ممكن يدخل ليكم (البرد) في التسجيلات.
• انا بخاف من (السوباط) يطلع لينا (تركي آل الشيخ).
• دي نصيبة شنو دي؟
• نصيحة لي الله العندو (وجع ضرس) يحضر ليه فيديو لهذا المحترف ( ألفاس إلفيس باول).
• العندو مصران.
• الما بشوف كويس.
• الما بهضم.
• العندو حيرقان.
• البشوف طشاش.
• كلو ننصحه يشاهد ( ألفاس إلفيس باول).
• الحلبة بقت ما بتعمل اي حاجة.
• عندنا عمنا كبير – لو شكيت ليه من اي شيء بقول ليك : اشرب حلبة.
• اي حاجة بنصحك بالحلبة.
• مرة كنت قاعد جنبو ..اتكلمت براي بيني وبين نفسي قلت الليلة (النت) دا مالو تقيل كدا؟
• قال لي اشرب حلبة.
• مريخابي اخر زعلان – قال (ألفاس إلفيس باول) دا كان يجيبوه لحكومة حمدوك.
• حكومة حمدوك ما عندها (طرف).
• الزول دا كان بحل ليكم مشكلة البنزين.
• والغاز والرغيف.
• والكهرباء.
• والمجلس التشريعي ذاتو.
• الزول دا ما بحل مشكلة الهلال بس – الزول دا مشكلة البلد كلها ممكن يحلها ليكم.
• ندخل ليكم على الجانب التحليلي شوية.
• كنت عاوز اكتب ليكم العمود دا بالإنجليزية أفريقية كريولية التى تعتبر اللهجة العامية الجامايكية في جامايكا.
• لكن قلت لو عملت كدا بحرج (المريخاب) وبطلعهم من (اللعبة).
• الناس ديل قالوا اصولهم من الأراواك والتاينو.
• اها نوع دا – المريخاب عاوزين يستوعبوا لينا.
• بطلعوا برة الشبكة.
• الدولة دي بتقع جوار كوبا وهايتي، وجزيرة هيسبانيولا، التي تقع عليها الجمهورية الدومينيكية.
• باقى ليكم كرنقو وطبنجة الكلام دا بقع ليهم.
• خلوهم في حالهم.
• وامسكوا ليهم من طرف.
• نخش على (الجرجير).
• انا قلت (جرجير) – ما عارف المناسبة شنو؟
• المهم ما تشتغلوا بالحتة دي.
• في اعتقادي ان علة الكرة السودانية تكمن في الاطراف – وان الهلال في الكثير من البطولات والمباريات لدغ من (اطرافه) ، وهذا لا ينفي ان هناك (اطراف) في تاريخ الهلال كانوا من عباقرة الكرة السودانية وقدموا من خلال (الاطراف) ابداعا وفنا كرويا تفوقوا به على لاعبي (الخانات) الاخرى في الملعب بما في ذلك خانة (رأس الحربة) و(صناعة اللعب) والتى تستوجب مواصفات ومهارات محددة.
• التاريخ القريب يذكر في هذا الجانب منصور بشير تنقا والذي كان ينثر الدرر في الطرف الشمال مثل (اغنيات) وردي.
• ولا ننسى محمد حمدان الذي رقصت معه (المدرجات) طولا وعرضا وهو يرقص كل من يواجهه.
• الكثير من الانتصارات والفتوحات الكروية تحققت في عهد الطرف اليمين يوسف محمد والذي نجح في اضافة الكثير للهلال.
• الآن في الهلال اسماء جيدة في الاطراف – شماله ويمينه ، لكن تبقى الاضافة الاخيرة للهلال في هذه الخانات (ضربة معلم).
• اضاف الهلال لاعبه (السحري) الدالي ليلعب الى جانب بويا وفارس في الطرف الشمال.
• ونجح الهلال بفضل رئيسه الفخري (تركي ال الشيخ) في التعاقد مع المحترف الجامايكي (الفاس الفيس باول) لاعب الطرف اليمين.
• هسع دا يقولوا عليه شنو؟
• (الفاس) وقع في الرأس.
• اما (الفيس) اشتعل.
• امس بعد ان اعلنت منصة الهلال الاعلامية التوقيع مع هذا اللاعب دخلت (الفيس) لقيتو ليك كلو (عكسيات).
• عرفت ليك ليه بقولوا ليه (الفيس).
• الفيس في اليمين.
• والواتساب في الشمال.
• تاني ما في زول بثبتنا.
• الهلال على موعد مع ايقاع جديد.
• نحن على مقربة من موسيقي (الريغي).
• الفاس دا بدخل ليكم موسيقى (الريغي) في السودان.
• الهلال بشكلو دا تاني ما في زول بياكل ليه فيه (عدس).
• او (بامية مفروكة).
• او (قرع).
• تاني من (البيتزا) ولي فوق.
• تدخل المباراة تلقى الهلال غالب خمسة…غير الاهداف التى ينقضها الفاضل ابوشنب.
• تاني ما عندنا مشكلة.
• ضربة جزاء ما تحسبو.
• هدف ما تحسبو.
• وبرضو بنغلب.
• قبل ما تبدأ عندنا تلاتة اقوان.
• في التسخينة عندنا قون.
• على الاخوة المريخاب ان يتحسسوا رؤوسهم – الهلال جايب ليه (طرف يمين) المباراة بتعاقد عليها زي (الحفلة).
• الزول دا اسمو (الفاس).
• تاني في شنو؟
• الفاس بتعاقدوا معاه مباراة مباراة.
• والكورة بعكسها بـ (علبة هندسة).
• ومعاها موية صحة.
• وكيكة.
• غايتو يا الغربال بختك.
• تقبل شمال تلقي بويا وفارس والدالي.
• تقبل يمين تلقي السمؤال ومؤيد والفاس.
• الكور بتجيك في الصندوق زي المطر.
• تشيل وتسجل.
• الفاس دا (الكورة) بجيبها ليك قون إلّا ثمن.
• هبشة والقون.
• …………
متاريس
• في وجود الرئيس الفخري المستشار تركي آل الشيخ مع لجنة التطبيع سوف تحدث نهضة كبيرة في الهلال.
• والنهضة ان شاءالله تحدث في البلد كلها.
• المريخ ايضا سوف تنعكس عليه هذه الاشياء.
• التازي كلموه يتحرك شوية.
• الهلال تاني ما بقيف.
• يبقى الشكر والتقدير لكل من يدعم الهلال ويسانده ويقدم له.
• الهلال محظوظ وهو يشارك في بطولة ودية ويلعب امام اندية في حجم مازيمبي وسيمبا.
• السؤال الذي يمكن ان نوجهه لادارة المنتخب الوطني وللجهاز الفني هو هل الاستفادة سوف تكون للاعبي الهلال الذين سافروا الى تنزانيا ام اللاعبين الذين حجزوا مع المنتخب الوطني.
• اعداد نجوم الهلال في تنزانيا سوف يكون افضل من اعداد نجوم الهلال في المنتخب.
• الجهاز الفني للهلال عليه مراعاة هذا الامر في المباراة القادمة للهلال.
• الجاهزية سوف تكون للعناصر التى ترافق الهلال.
• الهلال مباراته القادمة سوف تكون امام الخرطوم الوطني.
• والمباراة صعبة.
• والخرطوم الوطني ظلت في الفترة الاخيرة (رافد) للمريخ ونجح فريق الخرطوم في عرقلة الهلال وتسبب في تحويل الدوري للمريخ.
• لذلك يجب اعطاء هذه المباراة اهميتها.
• تاني نحن ما عاوزين نخسر.
• وما عاوزين نفقد.
• وعاوزين نحسم الدوري من الدورة الاولى.
• الهلال يلعب اليوم امام سيمبا.
• نتمنى ان تنجح احد القنوات السودانية وخاصة قناة الهلال في نقل المباراة على الهواء.
• او حتى تسجيل ان فشلوا في ذلك.
• النتيجة اليوم ما مهمة.
• خاصة ان الهلال يلعب بعناصر ظلت بعيدة عن المشاركة مع الهلال واغلب العناصر تفتقد حساسية المباريات.
• لكن التجربة مفيدة.
• ومكسب للهلال في كل الاحوال.
• بالتوفيق ان شاءالله.
• وفي انتظار الفاس.
• انداي كرتو وصل.
• ما في لعب تاني.
• ………..
• ترس اخير : شكرا المستشار تركي آل الشيخ الرئيس الفخري للهلال ..في ظل هذه الاوضاع من الصعب التعاقد مع محترفين بهذه القيمة.

قد يعجبك أيضا
7 تعليقات
  1. Mustafa يقول

    م تنفخونا ساي الهلال مغلوب اربعه بلا محترفين بلا كلام فاضي وما في اي ملامح فريق يرجي منه بطل تطبيل

  2. madani يقول

    الهلال لاعب بالبدلاء ما عدا اوتارا وسمبا مكتمل

  3. صلاح ابراهيم محمد يقول

    بعد مباراة الهلال وسيمبا البونية دورت ول لسه ، نادي الهلال للملاكمة عندكم خطافيات مابتجلي

  4. جلابي الدوحة - قطر يقول

    هضرب في هلالك المغلوب 4 وسط النهار
    مواسيركم سرو بالنا

  5. عمر يقول

    الناس البتكتب دي وهم وما بعرفوا كورة المباريات الوديه النتيجة ما مهمه المهم تعرف المفروض تعمل شنو ثم ثانيا الاهلي المصري اتغلب خمسه في مباراة تنافسيه ايش الحصل قفل النادي وانا في نظري الهلال ماشي في الطريف السليم بغض النظر عن النتيجة

  6. صلاح ابراهيم محمد يقول

    بدل فأس اصبحت اربعة فؤوس

  7. ابو محمد يقول

    والله دي هضربه سببها واااااااضح يا ود عبد الماجد هو علقة سيمبا الرباعيه الساخنه وفعلاً الفاس وقع في راسكم ههههههههههههههههههههاي اتهضربي على قول الصفوة الرائع هيثم كابو

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد