الفهلوة المصرية هل تجعل ضكر البط (جوز كناريا)؟

صابنها
محمد عبد الماجد
الفهلوة المصرية هل تجعل ضكر البط (جوز كناريا)؟

• في القاهرة لو سألت عن برج (ايفل) بوصفوه ليك.
• ما عندهم حاجة ما بعرفوها.
• شفت يا ابن النيل تمشي عدل – تخش شمال في يمين في شمال في يمين بتلقى برج (ايفل) في وشك.
• وصاحبكم ما عارف ان برج ايفل دا في باريس.
• يعني الواحد لو مشى على وشو زي ما بقول ليك المصري 15 سنة ما بيصل.
• أي زول تسألو بوصف ليك.
• حتى لو ما عارف المكان.
• ما عندهم زول ما عارف.
• كلهم علماء.
• والما بعرف ما بقول ليك ما بعرف – كتر خيرو بقعد يوصف ليك.
• بخترع ليه حاجات كدا – ويقعد يوصف ليك على اساسه.
• تكون واقف تحت كبرى 6 اكتوبر تسأل منو – يوصفوا ليك كبرى 17 نوفمبر.
• علما انو اصلا ما في كبري في مصر بهذا الاسم.
• لكن برضو بوصفوه ليك.
• طبعا القاهرة دي نص الناس البدخلوا ليها في اليوم ما عندهم علاقة بيها – وانت بتكون عارفها اكتر منهم.
• عشان كدا احسن ما تسأل.
• تمشي بس.
• ولو ركبت مع بتاع تاكسي عشان تنزل في شارع الصاقعة مثلا في مدينة نصر – ممكن ينزلك في شارع نجيب محفوظ في العجوزة.
• عادي بتحصل.
• احسن حاجة تكون عارف.
• او تدخل (غوغل) وتتابع الخريطة مع السواق.
• طبعا من الانترنت بقى ما في زول ممكن يتخدع.
• لكن برضو في ناس ما عندهم علاقة بالنت او ما عندهم خدمة.
• خليك مفتح.
• وعارف أي حاجة.
• ما تمشى ساي.
• الفهلوة المصرية في مصر ممكن تجعل (ضكر البط) جوز كناريا.
• عادي بحصل عنهم.
• فحل الفجل ممكن يصبح بطيخة.
• بتحصل.
• هسع انتوا تلقاكم قلتوا هسع الكلام دا مناسبتو شنو؟
• وعلاقتو شنو بمعسكر الهلال في القاهرة.
• انا عارفكم ما عندكم صبر.
• وما بتسكتوا.
• والله الليلة في برد.
• لاحظت في كل حوارات المصريين مع الاجهزة الفنية التى تقود الهلال في فترات مختلفة – محاولاتهم الدائمة ان يجعلوا الحديث والحوار عن الاهلي او الزمالك او عن الكرة المصرية وليس عن الهلال.
• يعني بحاوروا ليك مدرب الهلال او مدرب المريخ ما عشان الهلال والمريخ – وإنما حوارهم من اجل ان يمجدوا ليهم الكرة المصرية والأهلي والزمالك.
• خاصة اذا كان المدرب اجنبي.
• بوصلوا ليه رسالة اننا نحن الافضل ونحن الابعد – ونحن خطيرين .. وانت كيف تشتغل في السودان – ما هي مصر قدامك اهي.
• عندما حاور مدحت شلبي المدير الفني للهلال البرتغالي ريكاردو – مع ان ظاهر الحوار عن الهلال إلا ان مدحت شلبي كان بيسأل البرتغالي عن الكرة المصرية.
• كان بقول ليهم ك ايه رأيك في الاهلي المصري ؟
• وبتعرف مين في الاهلي؟
• ثم يسألو عن المحترفين المصريين الذي لعبوا في البرتغال.
• وسؤال محمد صلاح طبعا سؤال ثابت.
• طبعا من حقهم يروجوا ويقدموا حاجاتهم – لكن يجب ان ننتبه ان لا يكون ذلك على حسابنا.
• نحن برضو عندنا حاجاتنا.
• نحن برضو بنعجبك يا باشا.
• مدحت شلبي قبل جائزة الكرة الذهبية اتصل بالمدير الفني السابق للمنتخب السوداني الفرنسي فيلود وقال له من سوف ترشح للكرة الذهبية؟.
• فيلود طبعا خواجة وما فارقة معاه قال ليه حارشح طبعا كريم بنزيما.
• مدحت شلبي ما عجبو الكلام – وقال بعد ان انتهت مكالمته معه – طبعا فرنسي اكيد ح يرشح فرنسي – لكن في اعتقادي ان محمد صلاح هو الافضل في العالم هذا الموسم.
• ونحن بنقول زي ما قال مدحت شلبي …مصري اكيد ح يرشح مصري.
• ريكاردو اتكلم مع مدحت شلبي وقال له الهلال فريق كبير ويملك لاعبين ممتازين وانا سعيد اني بدرب فريق كبير مثل الهلال.
• الكلام دا مدحت شلبي ما عاوزو.
• هم الكبير عندهم فقط الاهلي المصري.
• ما عاوزين أي كبير تاني.
• قناة المحور عملت استطلاع مع بعثة الهلال في معسكر القاهرة واستضافت على هامش التمرين المدير الفني للهلال موتا، اضافة الى كابتن الهلال عبداللطيف بويا ومحمد النور ابوجا.
• تتخيلوا الحوارات كلها كانت عن الكرة المصرية – وهم حضروا لمعسكر الهلال من اجل التغطية للمعسكر.
• مذيع قناة المحور اول حاجة قال للمدير الفني – اكيد لا تتمنى ان تلعب في مجموعة تضم الاهلي او الزمالك في مرحلة المجموعات.
• الطبيعي ان يقول موتا : نعم لا اتمنى ذلك – كنوع من المجاملة – وان كان موتا قال لا اتمنى مقابلتهما في مرحلة المجموعات ولكن سوف اقابلهما في المراحل متقدمة من البطولة… وسوف اكون جاهز لذلك – كل الاندية عندها طموحات واهداف تعمل من اجلها.
• يعني موضوع التأهل من المجموعات محسوم عند المدير الفني للهلال البرتغالي موتا.
• مذيع قناة المحور قال للمدير الفني للهلال – هل تتمنى ان تعمل في مصر وتقود فنيا احد الاندية المصرية؟
• او قال له ما معناه ماذا لو قدمت لك عروض من الاندية المصرية؟
• عليكم الله في داعي للسؤال دا.
• طبعا السؤال دا كان بعد ان اثنى موتا على الكرة المصرية واشاد بها.
• موتا قال لمذيع قناة المحور انه سعيد بالهلال وهو يقود فريقا كبيرا ولن يقبل بأية عرض في هذا الوقت.
• المذيع المصري سأل موتا عن الاهلي ومديره الفني وسأله عن الزمالك ومديره الفني.
• ومشى بعد ذلك وسأله عن محمد صلاح.
• يعني الحوار كلو كان عن الكرة المصرية.
• شفتوا الناس ديل بخدموا اجندتهم كيف؟
• الطريف انهم عندما حاوروا حارس الهلال محمد النور ابوجا سألوه عن الشناوي.
• بس عشان ابوجا يقول ليهم الشناوي حارس كبير.
• هم عاوزين دي.
• وبعرفوا يصلوا ليها كيف؟
• في مصر قامت الدنيا ولم تقعد لأن لاعب منتخب تونس حنبعل عندما قال بعد انتصار المنتخب التونسي على المنتخب المصري في البطولة العربية انه يتمنى مواجهة المنتخب المصري في جولة التأهل لبطولة كاس العالم.
• طبيعي ان يتمنى اللاعب مواجهة مصر – في وجود المغرب والجزائر ونيجيريا والسنغال والكاميرون اضافة الى الكنغو الديمقراطية وغانا ومالي.
• بعدين المصريين ديل كلهم طلعوا في الفضائيات وقالوا انهم يتمنوا مواجهة تونس في المرحلة الاخيرة للتأهل لكاس العالم.
• ليه الموضوع بقى ليهم صعب وقت حنبعل قال اتمني مواجهة مصر.
• عادي.
• اقول ليكم حاجة انا شخصيا اتمنى ان نلعب في مجموعة فيها الاهلي والزمالك معا.
• اول حاجة الاهلي سوف يخلص على الزمالك في الجولتين.
• ونحن ح ننطلع بنتيجة جيدة امام الاهلي والزمالك حتى لو كنا نلعب خارج ارضنا.
• اصلو ما في مشكلة.
• بعدين معسكر القاهرة واللعب امام الاندية المصرية امر سوف يساعد الهلال كثيرا في المجموعات عندما نواجه اندية شمال افريقيا.
• الترجي ما الترجي.
• والزمالك ما الزمالك.
• والوداد ما الوداد.
• والرجاء ما الرجاء.
• مع ذلك انا الاندية المصرية افضل لي من الاندية المغربية.
• …….
متاريس
• نمشي على التمرين.
• المشكلة التمرين بعيد.
• والبرد زايد شوية الليلة.
• اول امس كانت هناك امطار خفيفة ليلا.
• يوم الاثنين مواجهة فيوتشر.
• مواجهة صعبة وكبيرة ايضا.
• نشوف.
• …………..
• ترس اخير نبقى مارقين.