القاهرة هذا الشتاء

صابنها
محمد عبد الماجد
القاهرة هذا الشتاء

• لو عاوز تعرف شعب وطبائعه – ما تمشى المسرح ولا السينما – ولا السوق.
• دا كلام (منظراتية) ساكت.
• لو عاوز تعرف بحق وحقيقة أي دولة او أي شعب اركب مواصلاتهم العامة – شوفهم بتصرفوا كيف وبتكلموا في شنو؟
• بالمناسبة ما سمعت لي مصري قال تلفوني اتسرق وهو في مركبة عامة.
• ولا في كمساري بلاحق الركاب عشان يدفع..
• تمشي تدفع براك ..ويمكن تمشي من غير ما تدفع – انت وضميرك.
• ما في زول بطارد ليه زول او بيلاحقو.
• في أي مركبة عامة بتلقى ليك زول ما شغال بالجماعة قاعد يتكلم في التلفون مع صديقه او مع زوجته او مع الزول العاوز منه قروش.
• بتكلم معاه بصوت عالي ولا فارقة معاه في حاجة.
• بحكي في كل شيء.
• ممكن يحتو قرض.
• وينزل بعد داك من البص زي الما حصل حاجة.
• ما عندو قضية مع زول.
• اغلب الذين يتحدثون بالتلفون في المواصلات العامة عندهم مشاكل وخناقة في البيت – مع ذلك المركبة العامة هي المكان المناسب لتصفية حسباتهم الاسرية.
• في ناس بيستمتعوا يتكلموا في المركبات العامة –عشان يكسروا وقت – وما يشعروا بي طول الرحلة.
• في المركبة العامة بتعرف حالة الناس كيف في البلاد؟ – المزاج العام ممكن تعرفو من (البص) زي ما بتعرف حالة الطقس من النشرة الجوية.
• في ناس زهجانة.
• وفي قرفانة.
• وبرضو في ناس فرحانة.
• ابسط يا عم.
• ركبنا المواصلات – نزلنا في اول مكرم ومشينا رمسيس – الناس كلها جارية – ما في مصري واقف.
• اتوبيس شبرا في شهرة بص الجريف عندنا.
• يا عم انت ح تمشي وين؟
• يا باشا.
• دائما يعطوك احساس انهم لاحقين ليهم حاجة مهمة.
• المصريون ما زي زمان بقوا ما بتكلموا كتير – ما عندهم وقت ذلك.
• أي زول في حالو.
• ما عارف دا من البرد ام من الاوضاع الاقتصادية؟
• ام ان التكنولوجيا الجديدة خلت أي زول في حالو.
• حقيقة ما عارف.
• لو عاوز تعرف اكتر اركب مع بتاع تاكسي – وافتح ليه أي موضوع سوف تلقاه حاضر.
• بقعد يتكلم ليك والعداد ماشي.
• بتنسى نفسك مع ثقافتو وكلامو – بتشعر انه عندو (حكمة) كبيرة – خاصة لمن يقرأ ليك العداد وتكتشف المبلغ الكبير الذي سوف يحاسبك به.
• للأمانة وهذا حق علينا للمصريين – هم كلهم بتحدثوا عن السودانيين بصورة جيدة – وبقولوا ليك نحن بلد واحدة – او كنا بلد واحدة – ما عارف قاصدين شنو؟
• هل مازالت عندهم مطامع في السودان؟
• هم بحبوا السودان وعلى قناعة تامة ان السودان فيه خيرات كتيرة وان الانسان السوداني حقاني وطيب وما بقبل الحقارة.
• اعتقد انهم صادقين في ذلك – وانهم بتحرموا السودانيين.
• على الاقل في مصر ما في سوداني ممكن يحس انه في بلد تانية.
• بتشعر انك في السودان.
• وهم ذاتهم بمنحوك هذ الاحساس.
• والإحساس دا لو ما فيه صدق ما بصل ليك ولا بتحس بيه.
• في القاهرة ما تجيب سيرة الزمالك – انا كل الذين قابلتهم في القاهرة اهلاوية ومن يشجع الزمالك بيلعن ليك الاهلي وينتقدو لكن ما بقول ليك انا زملكاوي.
• ما عارف السر في ذلك شنو؟
• لو مشيت القاهرة لازم تمشى سوق العتبة – هكذا هم السودانيين في القاهرة – ولازم كمان تأكل ليك طبق كشرى وإلا تكون ما وصلت القاهرة.
• الكشرى في مصر اشهر من برج الجزيرة واوضح منه.
• ما عاوز اقول ليكم اشهر من الاهرامات.
• في القاهرة لازم تقعد في مقهى وتشاهد مباراة لمحمد صلاح.
• شوارع القاهرة كلها اعلانات بصور محمد صلاح.
• عندهم محمد صلاح زي كأنو بيلعب في خشم ابوابهم.
• ما بيلعبوا فيه.
• القاهرة زمان كانت بتكتب.
• الآن لم تعد كذلك.
• ما شفت لي مصري شايل ليه جريدة – في سنوات ماضية كان من الصعب ان تجد مصري بدون جريدة.
• في المقاهي قبل القهوة والشاي والضمنة بتلقاهم شايلين الجريدة.
• هسع الكلام دا ما في.
• لغاية الآن ما شفت لي مصري شايل ليه جريدة.
• حتى انا كنت احرص على ان اغتني واشترى الصادر من الصحف وكنت انتظر الطبعة المسائية على ما هو احر من الجمر.
• هذه المرة اشتريت الصحف مرة واحدة – ولم تعد عندي رغبة في ان اكرر المحاولة رغم اني كنت حريص على ذلك.
• يمكن الانترنت ومواقع التواصل انتهت من هذا الشغف (الورقي).
• زمان كانت الصحف تعرض في أي حتة وكانت الجريدة بتصلك لغاية عندك والباعة يصيحون بأسماء الجرايد – الاهرام – الاخبار – الجمهورية – المصري اليوم – اليوم السابع.
• الآن بعد مشقة تجد مكتبة او مكان فيه جرايد.
• عموما القاهرة لم تعد تكتب.
• والخرطوم ايضا لم تعد تقرأ.
• في حاجات كتيرة انتهت.
• السينما في مصر بقت ما زي زمان – ما عاوز اظلمهم يمكن الكورونا.
• كما ان الموسم الشتوي ليس موسم سينما.
• المسرح انتهى في العالم كله.
• كنت فاكر المسرح انتهى عندنا برانا.
• المسارح في مصر اصبحت خالية.
• ما فيها أي حركة.
• وين الناس ديل؟
• وين المسرح المصري؟
• هل يمكن ان يكون هذا من (البرد)؟
• هل يمكن ان تكون الكورونا هي السبب؟
• طيب ليه الناس متعلقة بالكرة؟
• هوس الكورة زايد.
• في أي حتة وفي أي مكان.
• ليه المقاهي مازالت مزدحمة؟
• ناس الجرايد.
• وناس السينما.
• وناس المسرح مفروض يراجعوا حساباتهم.
• في حاجة غلط بتحصل.
• ناس الضمنة قاعدين في أي مقهي.
• الغريبة ان الضمنة والطاولة محافظة على كل حاجاتها.
• لا انترنت ولا العاب النت اثروا عليها.
• الاغرب من ذلك ان من يمارسون هذه اللعبات شباب صغار في السن – اعمارهم لا تتجاوز العشرين عاما.
• مصر جميلة.
• فيها حياة.
• وفيها حركة.
• فيها نشاط.
• وفيها كل شيء – حاجات سودانية ممكن ما تلقاها في السودان بتلقاها في مصر.
• أي حاجة متوفرة.
• ما في حاجة مافي.
• حتى المواصلات مع كل هذا القوم متوفرة.
• الحاجات ما بتزيد بين يوم وليلة.
• طبق الكشري قبل 5 سنوات والآن سعرو واحد.
• الاسعار نفسها متوحدة.
• سعر السلعة في أي حتة واحد.
• الاسعار في مصر ما زي الاسعار في السودان أي واحد عاوز يضع الشعر العاجبو.
• لا في زول بيسأل ليه زول لا في حكومة بتقول حاجة.
• في مصر لو عاوز تعيش بمليون جنيه بتعيش ، ولو عاوز تعيش بخمسة جنيه برضو بتعيش.
• ما في حاجة صعبة.
• كل حاجة عندها سعر محدد.
• واي زول بقدر يتعايش مع ظروفو وإمكانياته.
• في مصر هذه المرة لم اشعر بوجود (الاخوان).
• زمان الاخوان كانوا في أي حتة.
• في انحسار كبير في الاخوان في مصر.
• الحاجة التانية الواضحة للناس ان هناك شغل.
• الدولة شغالة.
• في طرق بتقوم.
• وفي كباري.
• وفي مؤسسات بتظهر.
• قد تكون كل الحاجات في مصر حقت الجيش والشرطة – ربما – لكن يهون ذلك ان الجيش والشرطة شغالة.
• نحن مشينا لمعسكر الهلال في مدينة نصر لقينا في زي (12) عاملا بحفروا بآلياتهم في طريق.
• اليوم التاني وقت رجعنا للمعسكر لقينا الطريق تم سفلتته.
• 12 عاملا عملوا الشغل دا كيف ؟ ما عارف.
• الناس شغالة.
• ومصر فعلا محروسة وآمنة.
• بس برضو في حاجات ما مفهومة – والسودان يتقدم فيها بشكل كبير.
• في مصر شبكة الاتصالات دائما واقعة – والضرائب بتخصم قرابة النصف من أي كرت شحن بتشحنها.
• يعني عندما تشحن رصيد بـ 200 جنيه بتلقى الرصيد الذي نزل في تلفونك 135 جنيه.
• تسأل عن 65 جنيه راحت وين ؟ يقولوا ليك الضرائب – ودي نسبة كبيرة شديد.
• ……..
متاريس
• وبرضو نحن في السودان لسه؟
• نحن عاوزين شغل.
• عندنا أي حاجة.
• بس ما في شغل.
• الوطن محتاج لي اولاده.
• لكن الوطن يتبني كيف مع الحكومات دي؟
• في السودان أي حكومة خصم على الوطن.
• ما في حكومة عملت اضافة للوطن.
• كلهم بشيلوا من الوطن.
• الله يكون في العون.
• ….
• ترس اخير : بكرة صباح جديد.