صحيفة كورة سودانية الإلكترونية

القوة المالية (الضاربة)

26

توقيع رياضي
معاوية الجاك

القوة المالية (الضاربة)

* كردنة قال نحنا القوة المالية الضاربة ولو شئنا نسجل ميسي لسجلناه ..
* فرح أهل الهلال بحديث كردنة وأصبحوا يحلمون بتسجيل ميسي
* الغريب أن كردنة لم يخذلهم أبداً ..
* طوالي سجل لهم ميسي ..
* أي والله العظيم سجل ميسي .. بتاع رديف المريخ
* كردنة أوفى بوعده وقسمه ولذلك يجب تكريمه
* أها ناس المريخ قالوا الزول ده فعلاً قوة مالية ضاربة ولازم نعمل حسابنا
* لكن المشكلة الكبيرة القوة المالية طلعت قوة مالية (ضاربة)
* كيف الكلام ده ..
* بالأمس الفيفا جات تهدر هدير ووجهت الإتحاد العام المسئول عن إدارة اللُعبة بخصم (ست نقاط) من رصيد الهلال نقطة تنطح نقطة بسبب مستحقات المدرب الفرنسي كافالي
* الغريب كافالي كان أفضل مدرب تعاقد معه الهلال وكان ممكن يعمل نقلة فنية كبيرة على مستوى الهلال لكن كيسو طار
* المهم الفيفا جات تهدر هدير وأمرت بخصم النقاط الست وهنا ما في طريقة لأبناء الهلال في الإتحاد يتدخلوا في الموضوع يعني ناس الفاشل باني وبتاع القضارف والفرحان بتاع الدويم ما في طريقة يتدخلوا ويجاملوا معشوقهم الهلال
* كان نفسي أحضر لحظة عرف باني وبتوع القضارف والدويم خبر الخصم
* طبعاً شغل الفيفا أكبر من ناس الفاشل باني وناس قريعتي راحت ..
* الشغل بقى شغل فيفا وشداد ما ممكن يلطخ سمعته بأي سمكرة كفاية سمكرة (2ـــــ12) لي هسع عاملة ليهو سمعة
* المريخ عاش أزمة مستحقات المدربين الأجانب مثل غارزيتو وإبنه أنطوني ولكن في المريخ الوضع مختلف تماماً
* في المريخ الإعلام حريص على مصلحة الكيان شغال صباح مساء يكتب وينبه وينادي بضرورة تسليم مستحقات غرزة لغاية المجلس مشكوراً سلم مستحقات الجهاز الفني السابق وتم تحويل المبلغ المستحق من تركيا
* وعلى العكس في الهلال شغالين شتائم في بعض من النوع التقيل .. شيء كلاب وشيء حشرات .. وشيء ذباب .. أعوذ بالله .. حوالينا ما علينا ..
* إعلام الهلال في وادٍ بعيد عن دوره بتقديم النصح لمجلس إدارته زي ما إعلام المريخ شغال والسبب معروف طبعاً .. ما حا نقول السبب .. ننتظر لغاية العقوبة التانية من الفيفا
* يعني في المريخ ما في (غتغتة) زي الهلال مشغولين بالمريخ وسايبين مشاكلهم لغاية فأس الفيفا وقعت في رأس الهلال الكبير ده وعينك ما تشوف إلا خصم النقاط الست ..
* ناس الهللا قالوا شنو ؟ سلموا الدولارات للإتحاد العام ..
* وأيه دخل الإتحاد هنا ..
* الدولارات دي تبع كالفالي ترسلوها ليهو في حسابه
* وحكاية ما في طريقة تحويل دي حكاية ميتة وما بتمشي على الفيفا ولا على جمهور الهلال المسكين
* طيب ناس المريخ حولوا دولارات غارزيتو وغبنه كيف ؟
* قلتوا منتظرين مندوب كافالي يجي الإتحاد يستلم الدولارات
* أها مندوب كافالي ده حا يعمل شنو بالدولارات ما دام إنتو السودانيين ما قادرين تحولوها
* الدولارات دي ممكن تتحول من دبي
* مش قلتوا كردنة عنده (بيزنيس) في دبي
* سيبك من البزينيس
* ممكن تتحول بواسطة أي شخص في الدنيا
* بس تكونوا معاهو واضحين .. الوضوح مهم شديد لو عملتوا كدة ما كان الست نقاط إتخصمت
* بمناسبة الست .. نسأل عن الست فطومة سيدة الهلال الأولى وزعيمة أمته عن رأيها شنو في حركة الفيفا دي ؟

توقيعات متفرقة ..

* طبعاً حركة الفيفا بايخة وما حلوة .. ما ممكن تخصم من أبو الهل ست نقاط طوالي كدة
* يعني الفيفا ما عارفة الهلال ده القوة المالية الضاربة ولا شنو
* الهلال ممكن يسجل ميسي لو شاء .. وممكن يسجل ساماتا والأحسن من ساماتا .. يعني شنو ست نقاط
* قبل كدة كردنة ده كان متصدر الدوري ومتفوق على المريخ بخمس نقاط وبرضو إنسحب من الدوري تقول لي ست نقاط .. يعني شنو زيادة نقطة احدة ..
* صحيح النقطة بتفرق كتير
* لكن عند كردنة ما بتفرق أي حاجة وكلو عنده صابون
* أها نجي لي رئيس الفيفا السيد إيفانتينيو
* أها بعد كدة يا إيفانتينيو شوف ليك بلد
* حا تودي وشك وين من كردنة
* كردنة حا يوريك كويس وحا يندمك على حركة خصم النقاط دي وحا تكره اليوم الخصمت فيهو النقاط
* قلوبنا معك يا إيفا ..
* نرجع لي القوة المالية (الضاربة)
* طلعت فعلاً قوة مالية (ضاربة) بحق وحقيقة
* زمان قلنا ليكم الهلال يعيش أسوأ أيامه ويفوق في السوء ما كان يعاني منه المريخ خلال عهد المجلس السابق
* سوء الأوضاع في الهلال وصلت مرحلة التردي التي عشعشت على جدران الكيان الأزرق فباضت ثم أفرخت مشاكلاً (عويصة) سببها الرئيسي الإدارة والتي ظلت تتخبط في كل الإتجاهات خاصة على مستوى ملف المحترفين
* المهم الفيفا زرعت المغصة في نفوس أهل القوة المالية (الضاربة) وكشفت المستخبيء والناس عرفت كل حاجة
* إحتمال كردنة كان قاصد كلمة (الضاربة) بمعناها المعروف .. ونحنا الما فهمناهو
* كردنة دائماً عنده بُعد نظر ..
* لكن ست نقاط مش كتيرة شوية ؟
* ده نقطة واحدة بتفرق في الدوري
* هسع ترتيب أبو الهلال أصبح كم ؟
* أمبارح ناس مريخ الفاشر خسروا من الخرطوم الوطني ولو فازوا كان ممكن يفوتوا الهلال
* المهم الفرصة ما زالت موجودةيا سلاطين عايزنكم تشطفوا بتوع القوة المالية الضاربة ونشوفكم في الكنفدرالية
* ناس الأهلي مروي زعلانين وممغوصين فوتوا مولد أبو الهلال وما غلبوه كان مثلوا أفريقياً
* لكن بالطريقة دي عادي ممكن الهلال ما نشوفه السنة الجاية ولا في الكنفدرالية
* خسارة والله .. بطولة الكأس طلعتوا منها
* أقول ليكم حاجة .. مش إنتو مليانين قروش وقلتوا القوة المالية (الضاربة)
* خلاص نظموا سيكافا ..

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد