المحامي البرتغالي (بيدرو) سأل من رمضان عجب ومحمد الرشيد!!
صابنها
محمد عبد الماجد
المحامي البرتغالي (بيدرو) سأل من رمضان عجب ومحمد الرشيد!!
• رمضان عجب تاني ما بنوم.
• محمد الرشيد تاني ما بنوم.
• بخيت خميس كلموه يأخد راحتو.
• ان شاء الله ينوم لي عشرة.
• ما عندنا معاه مشكلة.
• مسؤول السيستم في المريخ تاني ما بنوم.
• لجنة اوضاع اللاعبين في الاتحاد تاني ما بتنوم.
• لجنة الانضباط في الاتحاد تاني ما بتنوم.
• مجلس المريخ تاني ما بنوم.
• لاحظو اني لغاية الآن ما جبت سيرة وداد.
• عشان ما تلافحوا الكلام ساكت زي (الكراسي) في الحفلة.
• في ناس متعودة على (اللفح).
• يقلبنوا الكلام ويمشوا على كدا.
• (اصدرت محكمة التحكيم الرياضية “كاس” ، قرارا بتقليص عقوبة حرمان الفريق من اللعب بدون جمهور لمباراتين بدلا من 4 مواجهات، والعقوبة المالية من 100 ألف دولار أمريكي إلى 30 ألف دولار. وأصدرت محكمة “كاس” الثلاثاء، حكمها بقبول استئناف الهلال لعقوبة كان قد سلطها عليه الاتحاد الأفريقي لكرة القدم “كاف” ، بسبب سلوك جماهيره أمام الأهلي المصري، بالدور ربع النهائي بدوري الأبطال، في فبراير الماضي).
• الكلام دا واضح.
• الشيء العجيب ان افريقيا كلها تلعب في هذه الايام بدون جمهور.
• شفتوا بركات الهلال.
• ما في نادي بيلعب في افريقيا في وجود الجمهور.
• وفي الغالب عندما تنتهي عقوبة الهلال – تنتهي كورونا وترجع الجماهير.
• الاهلي المصري الذي تمت معاقبة الهلال بسببه يلعب بدون جمهور.
• يعني ما برانا.
• الما واضح الكلام القادم دا : (تقدم السوباط وأعضاء اللجنة بالشكر للمحامي البرتغالي بيدرو، مضيفا: ” بيدرو بذل مجهودات جبارة وكبيرة لكسب قضية الهلال ضد الاتحاد الأفريقي”. كما اعتبرت اللجنة أن هذا القرار انتصار كبير للنادي، لا سيما وأن المحامي البرتغالي كرس خبراته القانونية فى التقاضى بمهنية عالية ومتابعة دقيقة حتى توج بهذا القرار، الذي قالت اللجنة إن النادي ظلم فيه كثيرا).
• بيدرو بتاع خبرات وبتاع تكريس.
• اها بعد الكلام د اتاني في نوم لرمضان عجب ومحمد الرشيد.
• والله انت يا ابوعشرين في كل مرة بتثبت فيها انك (معلم).
• عرفتها يا ابوعشرين.
• نوم العافية ان شاءالله يا كابتن.
• يذكر كما جاء في الاخبار أن مجلس إدارة الهلال السابق الذي كان يرأسه الدكتور أشرف الكاردينال، هو من استأنف على القرار، وقد ترافع عن النادي حتى الأسابيع الأخيرة مقدما دفوعات وإيضاحات لـ”كاس”، الأمين العام السابق بالإنابة الدكتور حسن علي عيسى.
• عشان ما نضيع حق مجلس الكاردينال والدور الكبير الذي قام به الأمين العام السابق بالإنابة الدكتور حسن علي عيسى.
• نشكر الكاردينال ونشكر كذلك الدكتور حسن علي عيسي.
• ندخل بعد كدا على عدم النوم الجد.
• العجب حبيبي …دموعي سالت والمنام ابي لي.
• المحامي البرتغالي بيدرو اجبر الاتحاد الافريقي على دفع تكاليف واتعاب ورسوم المحكمة.
• يعني الهلال قرش ما خسر في هذه القضية.
• واذا الاتحاد الافريقي حلقوا ليه على الاتحاد السوداني ان يبل رأسه.
• ناس الاتحاد العام لغاية الآن ما عارفين يتصرفوا كيف؟
• لجنة اللاعبين اوضاع اللاعبين حولت الملف الى الانضباط.
• وقبل ما تصل للانضباط القضية وصلت الى لجنة الاستئنافات.
• وفي كل هذه اللجان – الاتحاد ما عارف يعمل شنو؟
• يأجلوا في القضية من فترة الى اخرى.
• مرة يقولوا نسبة لعدم اكتمال النصاب.
• ومرة لغياب الرئيس.
• والاتحاد مورط في القضية مورط.
• خلوه المريخ.
• وانسوا رمضان عجب ومحمد الرشيد وبخيت خميس.
• الاتحاد السوداني ذاتو الموضوع دا ممكن يجيب ليه الهوا.
• نوم مافي.
• اذا لم يعد عجب والرشيد للهلال – الاتحاد والمريخ واللاعبين سوف تنزل عليهم اقسى عقوبة.
• عشان كدا لجنة الاستئنافات امامها فرصة تاريخية لانقاذ الاتحاد وانقاذ المريخ واللاعبين انفسهم وذلك بعودتهم للهلال.
• غير كدا (بيدرو) قاعد.
• والزول دا في البرتغال اصلا ما عندو شغلة.
• شغلتو بس يقعد ينتظر (الحجج) دي.
• بيدرو فاضي للمواضيع دي.
• القضايا دي شغلتو.
• قاعد ليها …ومطلع ليها الكراسي.
• فاتح ليها مكتب.
• وعامل قاموس.
• موضوع زي دا بيدرو بقعد يقزقز ليكم فيه زي أنو بيلعب (ليدو).
• موضوع في منتهى البساطة.
• اذا كان بيدرو انتصر على الاتحاد الافريقي (كاف) العامل لينا فيها حافظها ..تفتكروا ما بقدر ينتصر على الاتحاد السوداني.
• موضوع عجب والرشيد وبخيت دا في منتهى السهولة.
• شفنا فيكم يوم يا ناس الاتحاد.
• شفنا فيكم يوم يا ناس المريخ.
• المريخ مهدد على الاقل من الحرمان فترتين من التسجيلات.
• والمريخ ممكن ينزل اذا تأكد تلاعبه في بيانات اللاعبين.
• مجلس الهلال سلم بيدرو من قبل فترة ملف وعقودات هؤلاء اللاعبين ..والمحامي البرتغالي متابع الخطوات من هناك.
• بيدرو هو الذي يشير لمجلس الهلال ماذا يفعل.
• ماشيين خطوة خطوة.
• منتظرين الموضوع يصل (الفيفا).
• او يصل (كاس).
• اصلو ما فارقة معانا.
• ما لم نستطع ان نفعله في بكري المدينة عندما وقع مع الهلال ومشى للمريخ سوف نفعله في رمضان عجب والرشيد وبخيت.
• ناس المريخ جابوها لينا (مدردقة).
• موقية.
• عشان نأخذ حقنا.
• ويرجع لينا حقنا بالكامل.
• ناس الاتحاد السوداني لو ما فهمتوا رسالة السوباط بتبقوا بتبالغوا.
• تفتكروا ليه السوباط قدم شكره للمحامي البرتغالي بيدرو.
• عشان شنو يعني؟
• انتوا فاكرين هذا الشكر عشان الجهد الذي بذله بيدرو في القضية وكسبها بعد ذلك.
• ابدا.
• الشكر هذا عشان التحركات التى قام بها بيدرو في قضية رمضان عجب ومحمد الرشيد.
• بخيت خميس خلوه عليكم الله.
• ما تعملوا لي بيه زحمة.
• انا ما حاسبو.
• لكن مرات بذكرو ليكم عشان العقاب يكون قاسي على المريخ.
• براكم انتوا بتجيبوا الكلام لي روحكم.
• بيدرو منتظر قرار لجنة الاستئنافات عشان يتحرك.
• عاوز القرار.
• بغض النظر على طبيعة القرار وفحواه.
• نحن عاوزين الموضوع يصل الفيفا.
• عشان نثبت موضوع (التزوير) الذي حدث في تسجيل عجب والرشيد وبخيت في المريخ.
• عاوزين نشوف التلاعب الذي حدث في (السيستم).
• التلاعب الذي حدث في البيانات – خاصة ان الاتحاد ادان مسؤول السيستم في المريخ وحوله الى لجنة الانضباط.
• الموضوع ما بخص الهلال.
• ولا بخص الاتحاد السوداني.
• الموضوع بخص (الفيفا).
• السيستم دا مسؤولية الفيفا.
• انتوا فاكرين الموضوع ساهل.
• ناس المريخ مفروض يلحقوا روحهم.
• مفروض يمشوا للاتحاد ويعلنوا تنازلهم عن اللاعبين عشان الموضوع يتقفل.
• الموضوع دا لو ما اتفقل ما في زول تاني بنوم في المريخ.
• ما في زول بنوم في الاتحاد.
• بيدرو قال بالبرتغالي اخوك لو حلقوا ليه بل رأسك.
• بيدرو قالوا بيسأل من رمضان عجب.
• بيدرو سأل من محمد الرشيد.
• الغريبة بيدرو ما جاب سيرة بخيت خميس.
• منتظرين شنو انتوا؟
• يا انسحبوا من القضية يا كمان بلوا لينا رأسكم.
• ما عندكم خيار تاني.
• بيدرو شغال (بل).
• بالله تقول شغال في لجنة ازالة التمكين.
• بل صاح.
• الكاف.
• والاهلي المصري.
• وحق الهلال رجع.
• عاوزين في قضية زي قضية عجب والرشيد وبخيت تاكلوا حق الهلال.
• بيدرو بصمته واضحة.
• والجواب بتعرف من عنوانه.
• والما بشوف من الغربال يبقى سيف الدمازين!!
• ………………….
متاريس
• نسأل الله هلال ومريخ تكون في الاسبوع التاني للدوري.
• عاوزنها مع بداية السنة.
• في عيد الاستقلال.
• ان شاءالله القمة تطلع في الاسبوع التاني.
• ناس جيسي ديل لا بعرفوا المريخ ولا بعرفوا حي الوادي نيالا.
• كلهم عندهم واحد.
• الله يحفظ الهلال.
• ويحمي اللاعبين.
• ويكمل المشوار والمقاصد والاهداف.
• الاتحاد مدد للجنة التطبيع 4 شهور.
• 120 يوم تاني.
• يعني الاضاءة ركبت.
• الاستقرار الاداري اهم من الاستقرار الفني ذاتو.
• ………….
• ترس اخير : يا محمد الرشيد ألحق نفسك
هههه جابت ليها هذيان كمان…الحقوا ود عبدالماجد والله في نص مقالك رجعت لاخر سطر فاكر العربي المسيخ يمزح واستعار الصبة سبحان الله انت فاكر دخول الحمام زي خروجه وعلى راي ابو برنيطة السنة متو من الضحك ويا شقاكم عدم النوم … اما المريخ وحي الوادي اليوم أسود الحبال كشفت المستور برغم الزخم الذي فلقتنا بيهو غربال وجيسي وبوغبا وهنري ويقف في مرمى الهلال حارس المريخ الأول واحتياطيه لون الدم… اما ابوعشرين سينال قسط من الراحة وسينوم طويلا بعد العودة من غانا. وانت فاكر لو تم تطبيق عقوبة على المريخ وفقد اعمدته المذكورة تاني في كورة تتلعب في الخرطوم لا تجميع ولا تمييع وسيطول سهر الاتحاد الازرق بقيادة العنقالي دكتاتور طوالي ههه وفقط عندما يتعلق الأمر بالمريخ..عادة فرحة الرشاشات حدها أيام التسحيلات فقط وتذكر كلامي هذا جيدا واليوم انت تركت اللعب على السطور وتحولت إلى عربي مسيخ آخر هههااااااااي.
ابو المستعار جاك بالردم التقيل بالمفردات المعهودة ياود عبد الماجد. غايتو الله يصبرهم السنة دي تسجيلات الهلال هاردة فشافيشهم وحتي المباريات الاعدادية لسيد البلد متابعينها اكثر من الهلالاب. غايتو لو طاروا السنة دي الله يسترنا من شرورهم لانهم عندما يجلسون في الرصيف شرورهم افظع واكبر. 🤣🤣🤣
عافي منك يا ود عبد الماجد، خليت صبي الكاهن الأعظم أليخماو العجوز يجقلب ذي القعونجة في الموية المليانة طين 😝😝😝
غايتو يوم بتقتل ليك دلقون يا ود عبد الماجد……
بيدرو بيسأل من ملف ولدنا العجوز أبو المستعار المندلاوي برضو 😆😂😁
كانب عشرات الصفحات في جيسى ومواسير الصفر الدولى
اها تعادلوا مه هلال كادوقلي والغربال طش شبكة طبعا مع المواسير سيكون ماسورة وزجاجى
مواسير الهلال تعادلوا مع كادوقلي
بطلوا نفخ المواسير بمشاركة الغربال وحيسي وكل المواسير ٢ بوصة
هو جوز اللوز دا وارد الرتينة بقت وضنب النملة ما داير يطلع من الملل والرتابة جلافيط اصقاع منسية… وفعلا بلاء ما انجلى ما دام جونا ناس الخلا… رقصوها الرقبة وغلبتم غلبه ولمن جات تجيب القون مسكوها من ضنبها…ايه الضحالة والمحلية الموغلة في الجلفطة دي؟
1- ياخي الفهم قسمة انت كنت وين لما الفيفا قال دا شأن داخلي ويحول للحنة شئون الاعبين في الاتحاد السوداني للفصل في القضية واستعلام اللاعبين عن وجهتهم وتم الفصل والتحويل للجنة الانضباط لتحديد الغقوبة بلا بيدرو بلا كلام فاضي وتخدير
2- اللاعبين الثلاثة في كشف المريخ ولا يوجد قوة في الدنيا تستطيع تحويل تسجيل اللاعبين للهلال والفيفا يقف مع اختيار اللاعبين ولا يجبرهم على اللعب لنادي لا يرغبون فيه وبالاضافة للعقد هنالك طلب فسخ موقع من قبل اللاعبين يعني منهية منتهية
3- لا تصرفو أنظار جماهيركم المكلومة بمثل هذه القضايا الخاسرةلأن الهلال بلا انجازات لمدة 3 مواسم داخليا و90 موسم خارجي وكل ما في الأمر تأخير مشاركة اللاعبين مع المريخ والجميع يعلم ذلك وللعلم مدة العقوبة ان وجدت تبدأ من تاريخ المخالفة يعني قبل شهر ونصف وللعلم ايضا أنكم أكملتم كشفكم ونكرتو ادم الدالي وياسر مزمل عشان سمكرة تسجيل الغربال وفيني بعد الزمن المسموح للشطب والتسجيل وصور العقود موجودة
4- ثم انو اللجنة أدانت الهلال بالمادة 26 عدم مخاطبة نادي المريخ بطلب التفاوض مع اللاعبين اذن المريخ لا علم له رسميا بمفاوضات الهلال فكيف يعاقب مع ادانة الهلال بعدم مخاطبته واذا عوقب بالمادة 25 كيف يدان الهلال بعدم مخاطبة المريخ وأين عقوبة الهلال لمخالفة المادة 26
5- وقال ايه فرحانين يتخفيض العقوبةالافريقية على الهلال وناشرين الخبر في الصفحة الأولى ياااخ فضحتونا مع الأفارقة ده خبر يتنشر ولا دي عمايل تتعمل أصلا :-
أول فريق سوداني يعاقب باللعب بدون جمهور ومرتين كمان
أول فريق في أفريقيا يختار له الكاف حكام هجين من 5 دول منعا للتلاعب
أول رئيس نادي يستخدم الضرب بالبونية للحكم
6- وبالنسبة لحال فريقكم شغالين تلمعو في القديم ومصدي ناس أهلي شندي ومحترفين الغفلة والحال المايل باهو نفس الحاللا قجديد يحكى ولا قديم يعاد بلا بوغبا بلا فيني كلنا شفناهم مع فايبرز وانكشف المستور ولا ما كدا يا هلال كادقلي
وأخيرا أعتقد انكم لا تجدون ما تكتبونه غير التكرار ثم التكرار ثم التكرار لدرجة الواحد يعلم ماتكتبون قبل ما ينزل ما عدا قليلا وصدق من قال ان مقالاتك أصبحت لا تشبهك وعلى شاكلة الصغار ناس العربي الكسيح وأشباههم من المشجعين