المحترف رقم (صفر)

صابنها

محمد عبد الماجد

المحترف رقم (صفر)

• وافق اتحاد كرة القدم السوداني برفع عدد المحترفين في كشوفات القمة السودانية الى (5) محترفين يلعب منهم في منافسات الدوري الممتاز في المباراة ثلاثة.
• يا جماعة راعوا اعصاب صلاح نمر ود. مزمل ابوالقاسم.
• مزمل ذنبو شنو؟
• عشان تاني ما يتحشر في المواضيع دي.
• المرة دي التسجيلات بدون (سيستم).
• بدون كلام كتير.
• بدون صور.
• تسجيل بالكاش.
• اقصد بالورق.
• بالطريقة التقليدية.
• مجلس الهلال اجتهد كثيرا من اجل ان يصل الى هذا القرار والذي نتمنى ان يحدث اضافة حقيقية للهلال بدلا من ان اتكون الاضافة فقط في (كنبة) الاحتياطي.
• ما عاوزين لينا محترف (كنبة).
• كان جايبنو عشان يقعد في (الكنبة) ما تجيبوه لينا.
• الكنبة ما ناقصة.
• للأمانة – وعشان نقول كلمة الحق اننا في الاعلام كلما اعلن عن تسجيل محترف جديد وبشر المجلس بمحترف قادم – طلعنا وفرحنا وما صدقنا..واعتبرنا ان هذا المحترف هو الاعظم وهو الاخطر.
• الكلام الذي كتب عن (جيسي) يلعبوا في الدوري الاسباني.
• يلعبوا مع ميسي.
• لكن والله (جيسي) خطير.
• جيسي لعاب…وما فيه كلمة.
• والكورة عندو ممتعة.
• المهم نحن هسع ح نفرح ونهدد ، ونحذر وما نصدق – بعد الاسماء التى اعلن عنها او سرب نية الهلال للتعاقد معها.
• السنغالي ابراهيما انداي محترف من خلال سيرته والفيديوهات التى قدمت عنه واضح انه خطير.
• بكفت الكورة (قون).
• اقل شيء عندو القون.
• لكن برضو دا ما كافية.
• لو ما شفناه قدامنا – تاني ما بنقتنع.
• تاني ما بنصدق.
• نشوف بس.
• ما عاوزين ننفخ.
• وما عاوزين الناس ترفع طموحات السقوفات.
• ممكن المحترف يكون اخطر لاعب في الدنيا …وما ينجح.
• أي محترف عاوز صبر.
• محترف الاهلي المصري الجديد الزامبي في الجونة كان مكسر الدنيا وكان هداف الدوري.
• هذا المحترف عندما انتقل للاهلي المصري – الكورة فكت منو.
• الكورة بقى يطلعها من القون.
• محترف الاهلي الجديد امس امام المقاولون العرب اخرج ليه كورة من المرمى كانت في طريقها لأن تكون لصالح فريقه.
• عشان كدا ما في محترف مضمون.
• مهما كانت سيرة المحترف وقيمته.
• نشوف بس.
• تاني المحترف لو ما شفناه قدامنا بيدخل الكورة في المرمى ما بنصدق.
• ما بنصدق لينا محترف.
• ولله نحن عندنا لاعبين اخطر من أي محترف.
• هسع في زول بيلحق الغربال.
• في محترف زي عيد مقدم.
• وعندنا ياسر مزمل.
• هذا الهجوم للخصم القاعد برة بجيب ليه (ملاريا).
• الباكات ما عارف ح يحصل عليهم شنو مع هذا الهجوم.
• شيلوا الصبر.
• شيلوا باكاتكم.
• الهلال قد يتعاقد في هذه الفترة مع (3) محترفين وربما يتم الاستغناء عن فيني كومبي بالإعارة او التخزين.
• فيني ما قدم حاجة.
• الاستغناء عنه ما مشكلة.
• لكن (جيسي) لا.
• يمكن ان نسمع عن اسماء (قوية) وقد تكون هناك مفاجآت كبيرة في هذا الملف.
• يمكن ان يحدث الهلال (نقلة) في هذا الجانب.
• المستشار تركي آل الشيخ يمكن يفجر ليه (قنبلة).
• ما عاوز اقول ليكم خلوا نومكم خفيف – عشان لو نومكم تقيل …(القنبلة) التى يرتب لها بتخليك تقوم مخلوع.
• ما في نوم.
• ادتونا السهر يا الفاضل التوم.
• يا الطاهر يونس – انتوا بتعملوا في شنو؟
• قالوا المحترف رقم (صفر) جنسو براهو.
• جنسية ما جاءت البلد دي قبل كدا.
• وقالوا مجلس الهلال بيسابق الزمن عشان يحسم هذه الملفات قبل يوم 31 يناير.
• في خطاب الفيفا الذي نشرته صحيفة ريمونتادا امس بترجمة الواثق بالله جاء خطاب الفيفا للاتحاد السوداني : (خطابكم الى الفيفا الخاص ب”كوفيد19″”
• (بعد التحية / بالاشارة إلى الموضوع أعلاه وإلى خطابكم المؤرخ 18 يناير 2021، والذي طلبتم فيه تعديل فترات التسجيل الخاصة بكرة القدم للرجال.
• نفيدكم بأنه اتساقا مع (1) الإرشادات والقرارات المتعلقة بـفايروس كورونا التي أجازها مكتب مجلس الفيفا بتاريخ 6 أبريل 2020، و(2) تعميم الفيفا رقم 1720، يسعدنا إبلاغكم بأنه قد تم قبول طلبكم بتعديل فترة/فترات التسجيل الخاصة بكم. بناءً عليه، نفيدكم أن التغييرات ذات الصلة (التي أدت إلى إنشاء فترة تسجيل “ثالثة” والتي تقابل الجزء “غير المستخدم” من فترات التسجيل الأخرى لاتحادكم) قد تم تسجيلها بواسطة الفيفا. نشير الى أنه ولأسباب فنية، لا يمكن تعديل تواريخ فترة التسجيل المذكورة (من 20 إلى 30 يناير 2021) في نظام مطابقة الانتقالات. وبالتالي، عند طلب بطاقة الانتقال الدولية خلال فترة التسجيلات المذكورة سيتم تفعيل خاصية القبول الاستثنائي للانتقال. وبتفعيل هذه الخاصية سينتقل الاجراء الى الفيفا لاكمال عملية الانتقال يدويا عند طلب اتحادكم. يرجى العلم انه عند طلب تدخل الفيفا لاكمال عملية الانتقال يجب تحميل نسخة من هذه الرسالة في السستم. مع الأخذ في الاعتبار أن الاختلافات في التوقيت وأيام العطلات، قد تتسبب في بعض التأخير في اكمال عملية الانتقال اليدوي).
• اهم ما في هذا الخاطب هو التوضيح الذي جاء من الفيفا والذي يجب ان ينتبه له الهلال وان يتعامل معه بحذر وقد جاء وهو ان التسجيل (اليدوي) لن يكون بسرعة التسجيل الكتروني ويمكن ان تحتاج عملية الانتقال الى وقت وزمن وامام الهلال فرصة محدودة حتى 31 يناير.
• الفيفا اكدت انها لن تتحمل مسؤولية ذلك – أي نادي ياكل نارو براهو وحسب كلام الفيفا فقد قالت الفيفا (مع الأخذ في الاعتبار أن الاختلافات في التوقيت وأيام العطلات، قد تتسبب في بعض التأخير في اكمال عملية الانتقال اليدوي).
• لذلك على الهلال ان ينجز هذا الملف خلال 72 ساعة بالكتير – يعني حتى يوم 25 يناير مفروض يكون الهلال رفع كشفه الاضافي الى الاتحاد الافريقي حتى يتم اعتماده.
• ابراهيما انداي – واضح ان التعاقد معه تم بطريقة سلسلة في وجود وكيله بلال.
• طبعا مع المستشار تركي آل الشيخ يمكن أي تسجيل يتم في لمح البصر.
• الاجمل من هذا اعلان لجنة التطبيع حل مشكلة اضاءة استاد الهلال.
• التعاقد مع شركة اسبانية لمعالجة هذه المعضلة امر مفرح.
• المباريات التى تلعب في الجوهرة مساء بهذه (الاضاءة) فيها خطورة على اللاعبين.
• الرؤية غير واضحة – وهي اضاءة غير صحية تهدد (النظر) وتشكل عليه خطورة.
• اضاءة ومحترفين اتنين او تالتة…..دي حاجة ما معقولة.
• نتمنى ان تتم ادارة ملف التسجيلات (اليدوية) بصورة رائعة وجميلة ، تحقق طموحات الاهلة وتشبع تتطلعاتهم.
• ………….
متاريس
• ابراهيما انداي.
• ومحترف (قنبلة).
• امسكوا صلاح نمر.
• غايتو يا صلاح نمر واضح انك اكتر زول ح تتعب مع الجماعة ديل.
• احسن شوف ليك بلد.
• اتخارج قبل الموضوع دا ما يتم.
• جايكم محترف القون عندو زي صينية الباسطة.
• وجنسيتو مختلفة.
• وبستعمل حروف (الجر) في الملعب.
• المحترف القادم للهلال بخلي ناس الاهلي المصري يحمدو الله على انهم سوف يلعبوا مع المريخ.
• الاتحاد منح المريخ فرصة تسجيل 4 لاعبين.
• والمريخ ممنوع من التسجيل.
• من الفيفا.
• ومن الاتحاد السوداني نفسه.
• يعني ديل إلّا تسجلوهم في (كشف البكا).
• وحتى لو كنتم عندكم فرصة للتسجيل (4) محترفين تجيبوهم من وين؟
• إلّا من ميدان الليق.
• غايتو الجزولي نوح دا ممكن نعتبره ليكم (محترف).
• بالمناسبة يا الطاهر يونس شوفوا لينا الزول دا عقدو بنتهي متين في المريخ.
• شكلو ماشي الهلال.
• ………..
• ترس اخير / قنبلة وانفجرت.