المريخ يسجل أغاني

في السلك

بابكر سلك
المريخ يسجل أغاني

*ما أن تحين التنقلات
*إلا وتخرج علينا الأخبار بنجاح مفاوضات فلان المريخي من حبوبتو
*وضم فلتكان الذي ختاها واضحة
*يا المريخ يا ما داير كورة
*النوع التاني ده بالذات أول زول بتمرد عند تأخير أول حافز فوز على نيل الغمتوها براهم
*أريتو لو بتمرد بسبب تأخير حافز فوزنا على الوداد المغربي الذي أتى بأقدام المتمرد
*وسبحان الله
*الزمن ده زمن متمردين بس
*تتمرد على المدرسة وتبقى رئيس جمهورية وتترأس اجتماع أساتذة وبروفات جامعة الخرطوم (المعربة)
*تتمرد على فريقك تنجو من الشطب
*تتمرد علي البلد تسوسها
*ونحن برضو بنتمرد
*لكن بنتمرد على الواقع على التاريخ
*ونطلع بره للشارع في وش الريح
*في وش الريح بنتمدى
*نقيف للطلقة نتمدى
*عن أهدافنا وعن المبدأ
*أبدا ما حا نرتد
*وتمرد لي تمرد يفرق يا متمردين ومتنمرين
*المهم
*نفس الهيلمانه التمينا معاها الشغل
*كانت قاعدة قبل أربعة شهور لما تمينا الشغل مع ناس غيرهم
*وسيذهبوا غير مأسوف عليهم بعد أربعة شهور
*عشان نجيب محلهم ناس تانيين على شاكلة
*اللعب للمريخ أمنية حياتي
*المريخ بيتي الكبير وأسرتي كلها مريخاب
*النوع ده بالذات بكون تم شغلو شقيقو الهلالابي
*أيها الناس
*القصة ما قصة إحلال وإبدال
*القصة قصة استقرار
*وعمل مدروس وممنهج
*واستراتيجية محددة
*وخطة تقود لأهداف معينة تتحقق في تواريخ بعينها
*وعشان ده كلو يتم
*قبل ما ندخل معارك التعاقد مع اللاعبين
*حقو ندخل معركة تسجيل الإداريين الذين يستحقون أن يقودوا نادينا
*إذا ظفرنا بي ديل
*جلب اللاعبين أصلو ما مشكلة
*لكن وين نلقى إداريين مطلقي السراح لنتعاقد معهم؟
*وين نلقى إداريين لا تقيدهم المعارضة الهدامة مدفوعة القيمة طواااااالي
*لي رمضان ده قبضت
*وين نلقى إداريين مطلقي السراح من الهيمنة الجماهيرية من هتيفة أصحاب مصالح تتعارض مع أي تطور مريخي يشكل هما لكل مريخي عفيف وغير منتمي لكيانات المصالح التي أحبطت كل محاولات الإقلاع عن مدرج التخلف والتدهور
*فإذا أصرينا على تسجيلات بالطريقة التقليدية التي أدمناها
*أفضل لينا نسجل أغاني وأغاني
*على الأقل نأرشف للأغنية العتيقة بأصوات شبابية ونزيل الضبابية عن داتا الأغنية موضوع الحلقة
*فكم من لاعب أمه مريخيه طلعت ما عندها علاقة بالرياضة
*وكم من لاعب والده قال ليهو ماعافي منك لو ما سجلت في المريخ
*رفض مليارات الهلال وقبل بالمريخ وأخيرا المريخ فكاهو عكس الهوا
*أيها الناس
*طيش المجموعة بجيبها جنس ده
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا المكلف بينا
*يوم الأربع نجيك ولا بتجينا؟؟؟؟

سلك كهربا

ننساك كيف والكلب قال أربعاء وعقاب حاجات كتييييرة
وإلى لقاء.