النظرة الشرعية

في السلك
النظرة الشرعية

*منتخبنا الذي يمثلنا يبتدر مشواره
*رضينا أم أبينا هو منتخبنا
*نعرف قدر منتخبنا
*لكنه منتخبنا
*فلا تكون أمنياتنا إلا التوفيق له والظهور بمظهر مشرف
*حتى ولو كان مظهرا كاذبا قياسا بالفنيات والفنيين والاستعدادات
*إنه يوم الالتقاء تحت علم السودان
*يوما نخلع فيه عباءات الانتماء الضيق بكل ألوانها
*لنستمتع بفضاءات علم السودان
*الذي ما زال يقدم الشهيد تلو الشهيد قربانا لمدنية تقودنا من الظلمات إلى النور
*من ظلمات الشمولية التي تخلق في كل حقبة فرعونا يمتلكنا ويبيع الوطن ليبيع لنا الوهم
* وطن يقدم فلذات كبده قربانا لأجل مدنية توقف تهريب دهبو وصمغو وقطنو
*مدنية تعلن انتهاء ديباجات الصمغ العربي بالسوق العالمية التي تحمل عبارة إنتاج الإمارات
*وتمزق ديباجة اللحوم المكتوب عليها انتاج مصري في نفس السوق
*لذا
*دعونا نخلع العباءات الملونة بكل ألوان طيفها
*لنرتدي على أجسادنا علم السودان
*كان عشنا يشرف
*وكان متنا أشرف كفن
*أمنياتنا للمنتخب هي أمانينا لأنفسنا
*أها
*قصة التدريب في المريخ قصة
*لسه مدوره
*البعض يرى أنه مدرب قاعد ساي
*لأنه مغمور
*ولأنه قبل بشرط فترة الاختبار البالغة تلاتة أشهر
*البعض الآخر يرد عليهم بالقول
*قصة مغمور دي ما مشكلة
*خمونا بيها قبل كده أيام الزولفاني
*وطلع أفضل من المشهور
*بل والذين أعابوا عليه أنه مغمور
*طالبوا ببقائه عندما همّ بالرحيل
*فلم يعيب الرجل أنه مغمور
*لكن قصة التجربة دي الرد عليها شنو؟؟
*شخصيا أعتبرها نظرة شرعية
*والنظرة الشرعية واردة وغير مؤاخذ عليها
*نجي حتة جابو منو؟؟
*جابوا الكيزان يعني!!!!!
*ماجابو الرئيس
*هو في مدرب في المريخ ده ماجابو الرئيس؟؟؟!!!!!!
*لسه نحن في أنا أدفع إذن أنا أقرر
*وجابت ليها كمان
*برا نقة برا زفت
*لذا كنا ولسه نطالب باستمرار العملية الديمقراطية
*لأنها تتجود بالتكرار
*تنهض بالشعوب والدول
*تغربل العقول
*تنقي الضمائر
*تجعل الهدف الأسمى الوطن الكيان الإنسان
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا المكلف علينا
*الخواجات شو عملوا لينا؟؟؟؟
*صالحونا ولا لامونا ولا تفكيرهم في خيراتنا ما فينا؟؟؟؟؟

سلك كهربا

ننساك كيف والكلب قال أكعب ككو البطلع على أكتاف الناس ويبول عليهم من فوق…. برا لمة
وإلى لقاء