صحيفة كورة سودانية الإلكترونية

(النملة) واحدة و(القرصتين) في نفس الحتة !!

46

بالعربي الكسيح
محمد الطيب الأمين
(النملة) واحدة و(القرصتين) في نفس الحتة !!

* حكمة الله هي وحدها التي تجعل (النملة) لا تكرر محل (القرصة) ..
* النملة لما (تقرصك) وتمشي وتجي تاني ما ح تقرصك في نفس محل القرصة الأولى.
* بتغير محل القرصة.
* مستحيل تدبل ليك (القرصة) في نفس الحتة.
* ولكن هنالك بعض (النمل) الذي يسيئ التقدير والفهم ويكرر (القرصة) في نفس الحتة وبعد أقل من دقيقتين.
* تبقي ليك (قرصتين) في حتة واحدة مع إنو النملة لو (صفت النية) بتلقى في (جسمك) مساحة أخرى غير (مقروصة من قبل).
* في نمل غبي بشكل غريب.
* يقرصك ويكرر القرصة وكأنه يريد أن (يتأكد).
* والله صحي.
* في نوع من النمل لما يقرصك بيشك عشان كده (بيأكد) ليك القرصة بقرصة تانية.
* وبما أن ذلك كذلك فإن المريخ الشهير ب(الاصيفر) اتقرص مرتين.
* ولكن المريخ (عكس الآية).
* النملة بتقرصك (مرتين في حتة واحدة).
* حتتين لكن النملة واحدة.
* والمريخ اتقرص في حتة واحدة بواسطة (نملتين).
* الشبيبة الجزائري (قرص المريخ) وكتب له الطيران من التمهيدي الأفريقي.
* الوداد المغربي (قرص المريخ في نفس الحتة القرصو فيها الشبيبة الجزائري وكتب له الطيران من الدور الأول عربياً).
* قرصتين في حتة واحدة بواسطة نملتين.
* وبهذا يكون موسم المريخ قد انتهي قبل أن يبدأ.
* والله أنا محيراني حاجة واحدة بس.
* المحيرني .. المريخ ليه ما عندو ثقافة (طار من بطولة يعوض في البطولة التانية) ؟
* ما عندهم الثقافة دي.
* عشان كده الطيران عندهم بالجملة.
* بيطيروا من هنا وهناك وبقعدوا يتلفتوا.
* الطيران بيجيب طيران.
* سبحان الله .. عكس الهلال تماماً.
* الهلال واحدة من أكبر دوافع صعوده للمجموعات الأفريقية هي طيرانه من بطولة العرب.
* طرنا من بطولة العرب جينا عوَّضنا أفريقياً.
* اتعادلنا مع إنيمبا في بلده ونحن ناقصين.
* وجينا في الجوهرة (حلقنا للنيجيري وعملنا ليهو القطعية) واتأهلنا رجالة وحمرة عين.
* وكان دافعنا هو سقوطنا من البطولة العربية.
* ده الهلال كده.
* الهلال لما يتهبش في كرامتو بيعمل عمايل.
* الهلال (اتقرص) عربياً وجا (قرص) أفريقياً.
* كبير ولا ما كبير؟
* المريخ اتقرص أفريقياً وجا اتقرص عربياً.
* ولو شارك في سيكافا ح يتقرص سيكافيا برضو.
* بياكدوا في (القرصة).
* الطيران بجيب طيران.
* لكن أنا عندي مقترح.
* بقترح إنو نطلق علي المريخ لقب (أطلع بره).
* هكذا اقترح.
* وأي زول طبعاً حر (مقترحاتو).
* أطلع بره هو أنسب لقب للمريخ في الوقت الراهن.
* في جنوب السودان هنالك فريق اسمه أطلع بره.
* وفي أم درمان برضو في فريق اسمو اطلع بره.
* فريق أطلع بره المشهور بـ(المريخ).
* يعني السودان وجنوب السودان الاتنين عندهم فرق تحمل اسم اطلع بره.
* والسنة الجاية في تمهيدي الأبطال أتوقع إنو القرعة ترمي (أطلع بره أم درمان مع أطلع بره جوبا).
* كلو وارد .
* فريق للموسم التالت توالياً بيطير من التمهيدي.
* تلاتة مواسم وراء بعض.
* لا في غيرة، لا في ضمير بيحاسب، لا في دوافع.
* ياخ المفروض (غيرة ساكت) من الهلال تصلوا دور الـ(32).
* غيرة بس.
* أنا ما عارف أنتو سافرتو المغرب علي أي أساس؟
* سياحة ولا تسوٌّق؟
* مرات عندكم حركات كده بتحير والله.
* فريق في أم درمان ما قادر يعمل حاجة.
* ماشين المغرب لشنو؟
* المريخ مشى المغرب عشان يتأكد من (القرصة).
* غايتو أنا ما لاقني فريق (موفق) في الطيران زي المريخ ده.
* عندهم توفيق رباني في الطيران والفشل.
* محظوظين جداً في حكاية الفشل دي.
* ما حاسدنكم والله في التوفيق ده.
* بل بالعكس .. نسأل الله العلي القدير أن يوفقكم كمان وكمان.
* في الزمن الصعب العلينا ده كونك تكون (موفق) حتى لو في الفشل برضو حاجة كويسة.
* عشان كده بنتمنى من ربنا يوفقكم أكتر في هذا الاتجاه.
* وربنا يخلي ليكم الهلال الذي يقاتل حتى يحفظ لكم مقعداً في النسخة القادمة (صحبة راكب وكده).
* عليك الله شوف الدنيا دي… فريق يلعب مباراتين (ذهاب وإياب) ويطير، وبعد ده يجي يشارك في النسخة القادمة بفضل فريق آخر (الهلال).
* دنيا والله.
* المريخ ده والله زي الزول العندو (واسطة).
* يتمرمط كل سنة ويطير من التمهيدي ويجي السنة الجاية يشارك زيو وزي الفرق.
* عظمة يا هلال.
* كبير يا هلال.
* المهم .. بنشكر فريق الوداد على (الرأفة).
* وتبكوا بس .. عين قطرة وعين مس.
* وغايتو الله يكفينا شر (المصدي) اللمعتو الأيام.
* ونركب صافنات ونجيبه (مغربية) وأصلو الزول بيموت والذكرى تفضل حية.
* و..و..
* وما شفنا الأسد بلاعب الجاموس و…… وشفنا (النمل) بيقرص وبدوس.

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد