صحيفة كورة سودانية الإلكترونية

الورق قفل

22
  • وان طال السفر

  • محمد عبد الماجد

  • في الكوتشينة ..مرات ورقك بكون ما كويس.

  • قدر ما تقلبو ..ما يتصلح ليك.

  • تجيب الصيني.

  • تلعبو في الوسط.

  • ترجعو دفاع.

  • تتطلع بشة..تدخل الثعلب.

  • تمرق محمد موسى ..تدخل ولاء الدين.

  • تقلب الورق فوق وتحت.

  • تفتش بس في حاجة تتم ليك النزول.

  • حق الحكومة بس.

  • عشان (الورق) يتصلح معاك.

  • تقوم تتحرفن …تخلف الجرة.

  • فجأة يجيك (الجوكر).

  • ورقك يتصلح بعد 4 جرات.

  • الورق يولع نار عديل كدا.

  • وزولك القافل ليك من بداية اللعب (قافل من الصباح) ..اي كرت تفكو ليه يفوت فيه.

  • زول قاعد ساكت.

  • وانت اول ما تقفل..يفكوا ليك الخمسين.

  • اقول ليكم شيء.

  • الهلال قفل.

  • علاءالدين يوسف بفك الخمسين.

  • وصلاح نمر بجيبها تجري.

  • يا كاريكا أصبروا ، ناس نمر ديل بيدوكم ليها.

  • ديل كرت (النص) ممكن يفكوه ليك.

  • بجيبوهو ليك بالاسم.

  • في الكوتشينة بتحصل حاجات زي دي.

  • مرات الزول البكون ورقو كعب ..بتصلح.

  • وهو البفتح.

  • وبجر الخمسين كمان.

  • والزول الورقو كويس ..ما بفتح.

  • بتقبضو بي ورقو.

  • بي 14 كرت.

  • والله ناس التش ومحمد عبدالرحمن أي واحد فيهم تفكوه بايظ.

  • وكان لي جمال سالم …ما لقى ليه زول ساكت يجيب ليه رأسو.

  • الزول دا منجد النيل أحسن منو.

  • وعلاءالدين يوسف ..الله جابو لينا في الوقت المناسب.

  • هدية وجاتنا من السماء.

  • ألعبوا على دفاع المريخ …ممكن تجيبو فيه 4 اقوان.

  • دفاع فيه صلاح نمر وفيه علاءالدين يوسف ..عاوزين تاني شنو؟.

  • واطراف قاعدة قدام.

  • انتوا بتصدقوا طرف المريخ اليمين التاج ابراهيم…زول بيلعب في الدوري من زمن (الموردة بتلعب).

  • وكان لاحمد آدم ..بيمشي قدام.

  • وضعيف جدا في الالتحامات.

  • استغلوا الفرصة دي وألعبوا قدام.

  • الهلال يوم السبت لو لعب باسلوب هجومي كاسح ممكن يهزم المريخ كتير.

  • ألعبوا لينا بي ولاءالدين وشيبولا واكرا والثعلب وبشة وكاريكا.

  • كل هذه الاسماء خلوها حاضرة في تشكيلة الهلال.

  • حتى شلش ومحمد موسى ..خلوهم يلعبوا.

  • عاوزين نلعب هجوم بس.

  • ليس أمامكم خيار غير ذلك.

  • الانتصار فقط.

  • الانتصار ببطولة الممتاز كلها.

  • الحمدلله ان الهلال يلعب بفرصة واحدة.

  • والله نحن مع فريقنا دا ما عاوزين أكتر من فرصة.

  • المباراة في الجوهرة.

  • وجمهور الهلال ما قاعد يقصر.

  • فريق المريخ لن يكون أفضل من الخرطوم الوطني.

  • فريق الخرطوم الوطني أفضل فريق بيلعب تكتيكياً في الدوري الممتاز.

  • التغلب على الخرطوم الوطني والهلال في هذه الظروف مقدمة واضحة لتغلب الهلال على المريخ يوم السبت ان شاءالله.

  • بس ألعبوا لينا باسلوب هجومي كاسح.

  • حاصروا المريخ.

  • وشكلوا على الفريق ضغط رهيب.

  • خلوهم في مناطقهم …ح تشبعوا هدايا.

  • الفريق الذي يلعب بفرصة واحدة بكون أكثر دافعاً وأكثر قوة.

  • وهدفو بكون واضح.

  • المريخ في المباريات الاخيرة قدم مستويات جيدة.

  • هذه حقيقة.

  • وظهر التش واحمد آدم والتكت ومحمد عبدالرحمن وحتى بكري المدينة بصورة أكثر من جيدة.

  • هذه برضو حقيقة.

  • لكن كل انتصارات المريخ الأخيرة كانت بمساعدة (الحكام).

  • لدرجة ان حصيلة المريخ من ضربات الجزاء ارتفعت الى 9 ضربات جزاء.

  • وهذه النسبة العالية لو وجدها فريق ود هاشم سنار الذي يلعب في التأهيلي لفاز ببطولة الدوري الممتاز.

  • وكل الفرق التى لعبت امام المريخ بتلعب على الواقف.

  • الهلال هذه الايام يقدم في مستويات دون الطموح.

  • والفريق متراجع فنياً.

  • هذه حقيقة ..وبنعترف بيها.

  • لكن الهلال يظل الهلال.

  • الهلال هو الهلال.

  • وفي الدوري الممتاز الهلال لو بالرديف ووجد المريخ وهو في أفضل حالاته قادر باذن الله وتوفيقه على جندلته.

  • الهلال روح.

  • والهلال ارادة.

  • والهلال عزيمة.

  • والهلال جمهور.

  • جمهور الهلال قادر على ان يبدل كل المعادلات.

  • جمهور الهلال قادر ان يضع أي فريق يلعب امام الهلال في علبو.

  • جمهور الهلال هو صاحب الكلمة الاولى والاخيرة.

  • ومباراة القمة القادمة مباراة جمهور.

  • مباراة لجمهور الهلال.

  • خاصة ان فريق الهلال يعاني في هذا الوقت.

  • وهذا الوقت هو الذي يحتاج فيه الهلال لجمهوره.

  • لن نقول ان الهلال جيد.

  • ولن نقول ان المريخ سييء ..حتى بعد الانتصارات التي حققها المريخ بواسطة الحكام.

  • 9 ضربات جزاء في بطولة واحدة لفريق محدد..دي في دوريات شهر رمضان ما قاعد تحصل .

  • يا هلالاب أقول ليكم حاجة ..انتوا في شهر ربيع الأول.

  • انتوا في المولد.

  • ونحن متعودين ما نطلع من المولد بدون حمص.

  • وحمصنا معروف.

  • حمصنا قاعد.

  • ما تفوتوه …والدنيا مولود.

  • تعالوا امنحوا فريقكم السند.

  • امنحوه الدعم.

  • امنحوه الثقة.

  • أكثر ما يحتاجه الهلال هذه الايام ..احتياج لاعبيه للثقة.

  • لاعبو الهلال لعبوا تحت ضغط رهيب.

  • وواجهوا أندية تلعب بدوافع كبيرة ومختلفة أمام الهلال.

  • وتعرضوا لظلم تحكيمي كبير.

  • مع ذلك وصلوا الى الاسبوع الأخير ..وهم يحتفظون بفرصة كبيرة للفوز باللقب.

  • مطلوب فقط الانتصار على المريخ.

  • ليس مطلوب من الهلال أكثر من ذلك.

  • والهلال في كل الاحوال ..وكل الأوضاع ..يعرف كيف يفوز على المريخ.

  • الكورة في معلبكم.

  • والجمهور جمهوركم.

  • وبشه موجود.

  • والثعلب موجود.

  • وكاريكا موجود.

  • وولاءالدين موجود.

  • وعمار الدمازين موجود.

  • عاوزين شنو تاني.

  • مباراة الهلال أمس أمام الخرطوم الوطني ، لم يقدم فيها الهلال العرض المطلوب.

  • وللأمانة افتقدنا الاداء الرائع في معظم مباريات الهلال الأخيرة.

  • لكن مع ذلك عرف الهلال كيف ينتصر على الخرطوم الوطني.

  • عرف الهلال كيف ينتصر على فريق كبير ومحترم.

  • فريق بيلعب كورة.

  • قد يكون الهلال ساعده في تلك المباراة الاصابات الكثيرة التى تعرض لها لاعبو الخرطوم الوطني.

  • وكانت تلك الاصابات سبباً في تبديلات اضطرارية.

  • تلك التبديلات أضرت بفريق الخرطوم الوطني.

  • وان كان الهلال هو الآخر فقد اوتارا بسبب الاصابة.

  • وشارك في المباراة الصيني بعد غياب طويل.

  • الصيني لعب في الوسط.

  • ثم عاد ولعب في الدفاع.

  • وشارك بويا بعد غيبة.

  • وتحقق الانتصار.

  • ظروف صعيبة مر بها الهلال.

  • ننتظر يوم السبت ان تكون ظروف الهلال أفضل.

  • وان يحقق الهلال انتصاراً يمنحه بطولة الدوري الممتاز.

  • نحن نعرف ان الهلالاب لهم معزة خاصة للممتاز.

  • ولاعبو الهلال قبل غيرهم يعرفون ذلك.

  • لذا مطلوب من الهلال يوم السبت القادم ان يقدم اقصى ما عنده.

  • مطلوب من لاعبي الهلال ان يضاعفوا من جهدهم وعطائهم في الملعب.

  • هناك نواقص يعاني منها الهلال.

  • في الوقت الذي يمر فيه المريخ بأفضل حالاته.

  • هذا الأمر يستوجب من الهلال ..ادارة وجهاز فني ولاعبين وجمهور ان يضاعفوا من جهدهم.

  • ان يقدموا أقصى ما عندهم ..حتى تتحقق لنا بطولة الدوري الممتاز.

  • انتوا براكم شفتوا (الهدايا) التى يقدمها الحكام للمريخ.

  • ضربات جزاء لصالح محمد عبدالرحمن ، في الوقت الذي يتجاوز فيه الحكام ضربات الجزاء التى يرتكبها دفاع المريخ.

  • واهداف صحيحة يمكن ان لا تحسب للفريق صاحب الهدف اذا كان يلعب ضد المريخ.

  • وقد شهدنا ذلك في مباراة المريخ وهلال الابيض في ام درمان.

  • لكل هذه الهرجلة.

  • لهذا الظلم.

  • وهذا التعدي الواضح ..مطلوب من الهلال ان يحقق بطولة الدوري الممتاز.

  • لتكون بطولة الدوري الممتاز هذا الموسم هي الاصعب للهلال.

  • وهي التي تعرض فيها الهلال لمصاعب كبيرة.

  • نسأل الله ان يحقق الهلال رغبة جمهوره.

  • نسأل الله ان يتحقق للهلال اللقب ..بعد كل هذه العقبات.

  • ونتمنى ان يكون الهلال في الموعد.

  • وان يقدم لاعبو الهلال اقصى ما عندهم.

  • مجلس الهلال لا بد من مضاعفة الحوافز خمس مرات للفوز ببطولة الدوري الممتاز.

  • وجمهور الهلال لا بد له ان يغطي على كل مدرجات الجوهرة الزرقاء.

  • اذا ارتفعنا للمستوى سوف يتحقق عشمنا في الفوز باللقب.

  • والممتاز ما بنخليه.

  • والهلال خلاص ..ورقو قفل.

  • ومنتظر أي كرت من علاءالدين يوسف.

  • او صلاح نمر.

  • او أحمد آدم ..عشان يفتح.

  • عشان يجر الخمسين.

  • ويفوز بالممتاز باذن الله وتوفيقه.

  • ……….

  • ملحوظة : وقولوا يا رب.

هوامش

  • بويا عملها.

  • بويا ولعها مباراة السبت.

  • جمهور المريخ عشان ما عندو ثقة في فريقه..وعشان عارف الهلال صعب في جوهرتو …كان ينتظر ان تحسم الخرطوم الوطني لهم اللقب.

  • عاوزنها باردة وساهلة.

  • الفاضل ابوشنب صرف اكثر من ضربة جزاء للهلال.

  • الناس دي عاوزة شنو من الهلال.

  • انتوا مالكم عاوزننا نقول والله يا حليل زمن معتصم جعفر واسامة عطا المنان.

  • مالكم عاوزين تخلونا نندم على زمن جمال الوالي والذي كنا نظن ان سوء التحكيم فيه وصل اقصى مدى.

  • جمهور الهلال في مباراة الامس كان رائعاً.

  • شجع طوال الـ 90 دقيقة.

  • ولم يفقد الامل حتى والفريق يتراجع مستواه.

  • شيبولا يظل النجم الاول في الهلال هذه الايام.

  • ربما يشاركه في ذلك عمار الدمازين.

  • السموأل ايضاً كان جيداً ..رغم انه ارتكب مخالفة خطيرة في الزمن البدل الضائع ..كان يمكن ان يسجل منها المتخصص قلق.

  • مثل هذه المخالفات في ذلك التوقيت ..تشكل خطراً كبيراً على الفريق.

  • مباراة القمة حذاري من ذلك.

  • خاصة ان احمد آدم والتش والصاوي أيضاً يجيدوا تنفيذ المخالفات التى تكون امام الصندوق.

  • لذا منذ الآن يجب تفادي المخالفات امام منطقة جزاء الهلال.

  • الهلال اذ لعب على احمد آدم وهاجم عبره المريخ ..يمكن ان يهزم المريخ كثيراً.

  • أحمد آدم ضعيف في الدفاع وضعيف في الالتحامات ..وبتقدم بي عدلو.

  • طبعا الى جانب الهدايا التي تكون من علاء الدين يوسف وصلاح نمر.

  • امير كمال تقيل.

  • والتكت مخالفاته كتيرة.

  • ألعبوا على هذه المفاتيح.

  • والانتصار سوف يكون ان شاءالله من نصيب الهلال.

  • والدنيا مولد.

  • والحمص جايبنو ليكم في ملعبكم.

  • وقالوا يا رب.

  • والله غالب.

  • وابقوا على سفر.

  • ……………..

  • عاجل : دو هارتي يمكن ان يفتح للهلال يوم السبت.

 

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق

قد يعجبك أيضا
تعليق 1
  1. خال أماسى يقول

    اجدت استاذمحمد بس شلش احسن من ولاء الدين بالذات امام المريخ ديل عايزين زى ما ذكرت زول سريع يوقف احمد ادم ما يتقدم التاج درويش اكثر من احمد ادم لكنو عكاس العبوا زى ما ذكرت على نمر وعلاء

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد