بعد العيد كلام تاني !!

لهيب النار
=======

هشام الطيب
بعد العيد كلام تاني !!
________________
& لو لم تسمح الظروف وما عيدنا عليك نطلب منك العفو ونقول ليكم العفو والعافيه وربنا يعيده علينا والكل في بحور السعادة وتتحقق كل الأمنيات الطيبه … وبعد ..
& الحمد لله معظم الناس نحروا ضحياهم بالرغم من غلاء ألأسعار ورائحة الشيه عطرت الأجواء والمراره شطه ودكوه وليمون والسعاده والفرح ربنا يديمه …
& البلد أمن وأمان لا شئ ينقصها سوي هذه الجلود المجدوعه في الشوارع حتى الكلاب الضاله عافيتها والحكومه عامله أضان الحامل طرشاء.!!
& بالرغم من عدم رضائي عن سفر وزير الشباب والرياضة لطوكيو على رأس الوفد السوداني وأنا أتساءل أين الشاب الأولمبي بطل بكين اسماعيل واين كاكي والملاكم العالمي محمد مرحوم وعز الدحيش ووو أليس هؤلاء هم أصحاب الحق الأصيل لكن في بلدي كل شئ صورة مقلوبه ومغلوب على أمرها !!؟
& غايتو الشاب الأستاذ الصحفي الممتاز زول زي رزاز المطر هذه الأيام وشفاف ومن قراءة كتاباته يشفق لوح قزاز بس محمد ود الطيب بن الأمين طاف بينا في رحلة سياحية في غرب كردفان على تلال ونهود ورهود النهود وروعة الطبيعة شكرا ليك يا أبو الطيب زيد من رحيق قلمك شويه شويه.!!
& يا مجذوب جنس الشباب أصحاب القلم والحرف المنفرد بتلقاهم وين؟ أستاذ أبو عاقله أماسا ينقى ويعزل الحروف والكلمات كما يفعل أهلنا الرباطاب وهم يفوزون التمر البركاوي بعيدا عن الجو والصيص أبو عاقله زول نصيحه لا بيعرف يكسر تلج والأعور عند أعور .!!
عزه العزيزه :
_________
هاتفتني يا أستاذ ممكن أطلب منك طلب وأجبت بالأبجاب منو حضرتك؟ أنها المعلمة عزه أبوزيد والدها في زمن مضى كان حارس فريق الجلاء بدوري عطبرة واليوم أصبح كفيفا لكنه يتابع أخبار الرياضه عبر الإذاعات و طالبها بفتح رابط كوره سودانية ولذلك أتصلت وأصبحت تطالعها كل صباح لوالدها الشغوف بالخبر الرياضي الصادق ..