بيعرف متين يأكل (سلطة) ومتين ما يأكل (بيض) !!
بالعربي الكسيح
محمد الطيب الأمين
بيعرف متين يأكل (سلطة) ومتين ما يأكل (بيض) !!
* قالوا أن الإمام الراحل الصادق المهدي كان يأكل وجباته بواسطة (كتلوج) خاص .
* زي ما تلفونك الجديد عندو (كتلوج) يساعدك على التشغيل ، ايضاً للإمام الراحل كتلوج يساعده على التغذية.
* عنده نظام غذائي متنوع ومتكامل إستطاع من خلاله الإمام أن يحافظ على حضوره ورشاقته وصحته زمناً طويلا .
* كان بيعرف متين يأكل (سلطة) ومتين ما يأكل (بيض) .
* جسم الإنسان عشان يكون مثالي وصحي يحتاج لتنوع في الأكل.
* ونحن الأكل المتنوع ده شكلو كده إلا في الجنة .
* والله صحي .
* لو أكلت فول السنة كلها ما بضرك لكن ما بنفعك زي لما تأكل فول ولحمة ومكرونة.
* بتنوع .. تشيل من الليمون فايتمين (سي) وبتشيل من الشعيرية (النشويات) وبتشيل من (الرِجلة) الحديد .
* ديل كلهم عشان تعمل جسم صحي ومعافى .
* وبما أن ذلك كذلك فإن فترة التسجيلات هي عملية تشبه عملية الغذاء المتكامل .
* كل فريق في التسجيلات يبحث عن (الحديد والنشويات والسكريات) .
* كل ما تلقى (عنصر) غذائي مفيد بالنسبة لفريقك بتسجلو طوالي .
* عشان كده ناس الطاهر يونس السنة دي ركزوا لينا على (السكريات والنشويات والخضروات ولون الدم) .
* ولمن فاتهم الإستماع لقصة لون الدم إليكم التفاصيل : (الأخ غير الشقيق أبو عشرين جلس مع ناس الطاهر يونس قبل مباراة القمة بثلاثة أسابيع وأتفق وقبض قروشو ووقع على العقد) .
* أبو عشرين بعد ما قبض قروشو مشى الكرين إشترى ليهو عربية على الزيرو) .
* وصل البيت اخد ليهو (دش) وفتح مُكيف الصالون ورقد في السرير ودخل الفيسبوك .
* دخل الفيس وكتب : (أنت يا الدم لونك أحمر) .
* وجماعتك التمهيداب شالوا تغريدة أبو عشرين وبقوا لافين بيها القروبات زي رسالة (الجمعة) .
* مالكم ؟
* قالوا أبو عشرين غرد .
* غرد قال شنو ؟
* قالوا قال : أنت يا الدم لونك أحمر.
* وأنت حصل قابلك دم لونو ليموني؟
* طيب فرحان مالك ؟
* قال الزول ده طالما قال كده معناها بحب المريخ .
* هاك العشق ده .
* المهم .. تسجيلات الهلال فيها كل ما يحتاجه جسد الهلال من غذاء .
* جابوا لينا (السكريات) من زيمبابوي الأخ جيسي .
* جابوا لينا (البروتين) من الجزائر الأخ الغربال .
* جابوا لينا (النشويات) من المريخ .. الأخ لون الدم .
* جابوا لينا (الخضروات) من شندي (بوغبا وصلاح وعيد والطيب ومجاهد وياسر) .
* طبعاً المريخاب الواحد تلقاهو ما فاهمة حاجة يجي يقول ليك أنتو سجلتو ستة من أهلي شندي ولو كان فيهم فايدة كان أهلي شندي جاب كأس خارجي .
* ما بحسبوها كده يا أولاد.
* نحن من أهلي شندي شلنا (خضروات) عشان نجيبها تتكامل مع البقوليات والنشويات والسكريات .
* هم مع أهلي شندي ما عملوا حاجة لكن مع الهلال بعملوا كل حاجة .
* وكلهم نجوم منتخب .
* يقول ليك (الهلال بقى هلال شندي) .
* طيب كويس .
* ممكن توريني أنت سجلت كم من الخرطوم الوطني؟
* صلاح نمر من وين ؟
* بيبو والتش من وين ؟
* حمزة داؤد من وين ؟
* وجدي هندسة وعزام من وين ؟
* ديل كم ؟
* سيف تيري من وين ؟
* أنت مسجل ليك سبعة من الخرطوم الوطني .
* قوم على حيلك .
* سبعة من (الأمن الوطني) وجاي تتفاصح معاي؟
* نادي (الأمن الوطني) داعم رئيسي لنادي (المؤتمر الوطني) .
* زيتكم في بيتكم .
* اللاعب من الخرطوم الوطني بيجي المريخ زي (الكوز) البيمشي من إتحاد الشباب إلي إتحاد الطلاب .
* وتعال أناقشك.
* ما تتفاصحوا عشان ما نقلب عليكم المواجع .
* خليك ماشي جمب الحيطة ما بنسالك.
* اصلاً باقي ليك كورة واحدة مع انيمبا ألعبها وورينا عرض اكتافك.
* وتبكو بس .. عين قطرة وعين مس .
* وغايتو الله يكفينا شر (المُصدي) اللمعتو الأيام.
* ونركب صافنات ونجيبة (نيجيرية) واصلو الزول بيموت والذكرى تفضل حية .
* و..و..
* وعدتك قبل كده مرات ولسه ……. (شايفك ما تبت مني) .
تاااني ياود الطيب جبت سيرة الاخ غير الشقيق لون الدم؟؟. ارجا الراجيك من ابي المستعار صاحب الاسماء الخمسة وعصابته. بس ولا يهمك كلما زادوا سفها زدهم حريقا. نار القصب تبدو باردة ولكنها تهري الدلاقين هريا. 😹😹😹
أول حاجه يا معلم انت رؤساءك كانو منو الفترة الفاتت ما تتفاصح ساي كمية من الأمن وأشقاء الرئيس منهم الفريق عبدالرحمن سر الختم وعبدالله البشير اخو الرئيس الله يغفر له وكردنه بقروش وداد
ثانيا شن جاب أهلي شندي للخرطوم الوطني النادي الأرقى واأجمل والأكمل الي اخر هزيمة ليكم قبل سوط السماني اخدتوها منهم ونوعية لاعبينو انت شايف براك وبعدين ده نادي بيعرف يسوق لاعبينو لي منو والبدفع منو بلا سوباط بلا طاهر واللاعبين نفسهم عارفين مصلحتهم وين يا بتاعين عزام الأحسن من الغربال ولا ما كده يا ود عبد الماجد
وفعلا هم مع اهلي شندي عملو شنو لكن والشهادة لله هم برضو احسن من رواكبيكم الشطيتوهم ورواكيبكم القاعدين برضو وذي ما قال المثل الما عندو التش بنخلع من عبدالرؤوف هههه
وأخيرا بالنسبة لي ولدنا ومحترفنا أبو عشرين نتمنى له التوفيق في دار الغربة وفترة الأحتراف الخارجي في الهلال ونقول ليك نحن اعتزل حامد بريمة بي كل عظمتو والعظمة لله والمريخ ياهو المريخ وانت يا الدم لونك أحمر ختى لو لبسوك الكحلي من بره وأسأل أبو عشرين هو ما داسيها
واخيرا ما تهدد وما بنتوب والبيتو من قزاز ما يجدع الناس بالحجار فريقك كلو قزاز ولا ما كده يا ولدنا ومحترفنا عندكم الفتى الزجاجي البقى فولازي الغربال برضو نتمنى ليهو فترة احتراف ناجحة أصلو بقيتو تجيبو محترفنكم من عندنا بالدولار شفت التقييم ده كيف لاعبنا عندكم محترف أجنبي وكدا ….
بالغت لكن كل يوم اقعد افهم فيك ما تهبش علشان بيتكم من قزاز وبتكسر طوالي
ياخ انت ما بتتعظ كله كله طوالي شايت غلط وحاولت انبهك كتير يا فرده لكن مصمم تلق العضم الناشف ياخ المريخاب ديل تاريخ ناصع وانت تاريخك مافي اصلا ما تحاور معاهم علشان نحبك ونحن بنشجع فيك ونقول احسن صحفي في شلة الاصفار
بالجد زعلتني وخليت يطلعو ليك موضوع وداد وقبله مواضيع
عليك الله روق واكل السلطه وانت ساكت وما تنسي الصورة
والدم فعلا لون احمر وكل شي احمر
هسي لما يحللو ليك دمك بلقوه ازرق يا بتاع السلطه انت
روق ساي وابعد عن المريخاب ديل جرابهم مليان فضايح ليكم