صحيفة كورة سودانية الإلكترونية

بين المرض والمرض (شولة ،) بس !!

45

بالعربي الكسيح
محمد الطيب الأمين

* الوجع هو أن تقوم من (إلتهاب لوز) وتقع في (ملاريا) ..
* قبل أن يتخلص لسانك من طعم علاج الالتهاب تبدأ في علاج الملاريا ..
* في ناس بين المرض والمرض شولة بس(،) ..
* يبقي كويس عشان يبقي عيان من جديد …
* والمرض كفارة للإنسان ..
* ولكن مرض المريخ لن يكون كفارة له ..
* المريخ زمن طويل وهو مرضان بالتعيين الحكومي ..
* عندهم مرض إسمو (التسيير) ..
* والمرض ده بيمسك الأندية الما عندها شخصية ..
* مرض (التسيير) بيشبه مرض (الحصبة) ..
* والله صحي ..
* ومرض الحصبة ومرض التسيير كلاهما يتعالج بالتطعيم ..
* الحصبة علاجها (وقاية) ..
* من عمر يوم لعمر خمس سنين يتم التطعيم ..
* الطفل بياخد جرعة الحصبة عشان يقوم عديل وكذلك جرعة الشلل وغيرها من (التطعيمات) ..
* تاخد كل الجرعات منذ الصغر ولما تكبر بإذن الله بتكون معافى وسليم ..
* جيل صحي ..
* مشكلة المريخ إنو ما اخد جرعة ضد (التسيير) في سنواته الاولى ..
* المرا الخواجية الاسمها (فكتوريا) لما أسست المريخ ما عملت ليه تطعيم ضد (التسيير والحصبة والتتنس) ..
* عشان كده المريخ الآن (مرضو كتيير) ..
* لو هبت نسمة ساكت من الديمقراطية بتأثر علي صحة المريخ ..
* زي الناس البيعانوا من مرض (الأزمة الصدرية) و(الجيوب الأنفية) ..
* سيد الأزمة ما بتحمل الغبار وكذلك سيد الجيوب الأنفية ..
* أقل غبار الواحد بيطلع (بخاخو) ..
* نسأل الله يشفيهم ويعافيهم ..
* هسه الحاصل في المريخ يشبه أيضاً مريض الازمة ..
* اقل ديمقراطية طوالي المريخ بيطلع بخاخو ..
* ولو الديمقراطية استمرت سنة فإن المريخ سيكون محتاج لـ(اوكسجين) او ما يعرف بالتنفس الاصطناعي ..
* ما بتحملوا الديمقراطية ..
* المريخ الآن وقبل أن يتخلص من طعم دواء التعيين سيقع في الهلال ..
* مباراة القمة المحدد لها الاسبوع الثاني ستكون هي فرصة كبيرة لفرتقة المريخ ..
* المريخ الأيام دي ( مغري) ..
* زي لحم الأرنب ..
* طري وطاعم ..
* الفرصة أمام الهلال كبيرة لتحقيق فوز تاريخي على المريخ ..
* الهلال يعيش استقرار على المستوى الاداري وأيضاً هناك استقرار فني بدأ الآن ونرجو أن يتواصل ..
* يواجه الهلال المريخ بمعنويات عالية وقوة هجومية ضاربة ..
* الثنائي الأجنبي اظهرا مستويات مميزة في التدريبات كما حملت الأنباء ..
* وهذا يبشر بقوة هجومية كبيرة للأزرق ..
* هذه القوة يجب أن تفصح عن نفسها في لقاء القمة ..
* التنزاني والنيجيري والبرازيلي وبشة الكبير ونزار حامد ووليد الشعلة وفارس وشيبوب ..
* لما تتأمل الاسماء دي بتطمئن من جوة قلبك ..
* غايتو ناس المريخ ديل لو ما خايفين من شداد كان انسحبوا ..
* لو كان رئيس الاتحاد معتصم انا بجزم إنو المريخ كان انسحب ..
* لكن وجود شداد يعني أن المريخ امام خيارين لا ثالث لهما : يلعبوا أو يلعبوا ..
* ورجالة كمان ..
* شداد ما بهظر ولا بيلعب ..
* عشان كده ناس المريخ ما ح يفكروا في الانسحاب ..
* ح يلعبوا ولا كتر خيرهم ..
* وانا عايز ألفت نظر شداد لحاجة مهمة شديد ..
* ناس المريخ قبل كل مباراة قمة بيقفلوا الاستاد وبيقولوا عندهم صيانة ..
* وهم في الحقيقة ما عندهم صيانة وإنما عندهم خوف من الهلال ..
* بيخافوا يلعبوا مع الهلال في استادهم ..
* شداد لابد ان يعرف هذه النقطة حتى لا يهرب من ملعبه ..
* الفوز على المريخ داخل ملعبه الشهير بملعب الحكومة له طعم خاص ..
* بكرة او بعد بكرة ح تسمع إنو المريخ يغلق استاده للصيانة ..
* والحكاية دي يجب أن ينتبه لها شداد ..
* إستاد الخرطوم ما عندو ذنب عشان المريخ كل سنة يحول كورتو مع الهلال ..
* المهم.. مطلوب من اعلام الهلال ان لا يبرز تألق هارونا ..
* ناس المريخ بدون هارونا خايفين ..
* دورنا في الاعلام الهلالي هو أن نخفف على المريخ ..
* نحنسهم ونخفي اخبار اللاعبين حتى نضمن أن المريخ سيلعب بملعبه ..
* عموماً (الحصبة) علاجها تطعيم والمريخ علاجو سباعية إن شاء الله ..
* وغايتو السنة دي بالذات يا متنا من الضحك ويا كمان الضحك كتلنا ..
* ونركب صافنات ونجيبة (هبانية) واصلو الزول بيموت والذكرى تفضل حية ..
*و..و..
* وغايتو جنس غايتو ..

 

 

 

التطبيق               

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app 

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

 

حمل تطبيق كورة سودانية لتصفح أسرع وأسهل 

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملوh

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app

 

 

 

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد