تجي ولا ما تجي… الهلال الأجنبي!
العمود الحر
عبدالعزيز المازري
تجي ولا ما تجي… الهلال الأجنبي!
*الوصيف مالو زعلان والليلة يا حبان!!*
*ياللهول… مدرب ديناموز قال الوصيف مجهول!*
* لا أعلم سر انفعال المريخاب، أهل الوصيف، وزعلهم و«طرشقتهم» بعد تصريحات مدرب باور ديناموز الزامبي… الرجل لم يقل إلا الحقيقة: هل كان الوصيف متواجدًا إفريقيًا أو تخطى التمهيدي خلال السنوات الثلاث الماضية؟
* غايتو الزعل مرفوض ولا مبرر له… اتصل بي واحد من أهل الوصيف وقال: «المريخ ما مجهول، ده بطل الكاسات المحمولة جوًا»! قلت ليه: **إنت حضرت الكاسات دي؟ قال: لا! قلت ليه: خلاص… مدرب باور ديناموز معاهو حق!
*أهل الوصيف الخفيف… بلاش تحريف! راجع البطولات وآخر عشر سنوات… الوصيف ما شاف نجمة واحدة، والنجمة ذاتها بقت تسأل: المريخ وين؟
* خلينا من أولاد الوصيف ونجي لأولادنا… واحد هلالابي من جهلاء الميديا قال لي: «سيكافا إعداد للهلال»! قلت ليه: براحة يا حبيبنا… الإعداد عند المدربين ستة إلى ثمانية أسابيع، والهلال عمل أسبوع ولا عشرة أيام ودخل بطولة ومعاه عشرين لاعبًا جديدًا! ده إعداد ولا مناسبة تعارف؟
* الإصابات زادت، التجانس ما اكتمل، وبعض اللاعبين لم يشاركوا… وفي النهاية نسأل: من استفاد من سيكافا؟
* والمدرب الكنغولي المغمور بوكاسا شغال تدوير… وصندي معاهو حق! اللاعب يريد أن يعرف مستقبله، والمدرب يريد أن يعرف تشكيلته، والجماهير تريد أن تعرف: منو المدرب أصلًا؟
* **العليقي ما حردان ولا زعلان…العليقي في غابات إفريقيا ينقب عن الجواهر والمرجان! نحن فقط نسأل: يا عليقي، لما تلقى الجوهرة… **تبيعها ولا تخليها تلعب؟
* الهلال أصبح يشتري صغارًا من مجاهيل إفريقيا، يطورهم ثم يبيعهم… يا جماعة نحن الهلال ولا وكالة مواهب؟
* وبعنا جان كلود بالملايين… جميل! لكن أين انعكاس الملايين على الفريق؟ الجماهير تشجع الهلال، **ما كشف الحساب!**
* وين الفريق السابق؟ إيبولا، فريد، قمرديني… المعنويات تحت الصفر، والتفاهم ناقص، وصلاح عاد للإصابة من أول مشاركة! البدن قال: كفاية يا جماعة!
* وما زاد الطين بلة الاستغناء عن أبناء الهلال الوطنيين… حتى أصبح الهلال للأجانب. **إذن الهلال الأجنبي!
* رغم الشكاوى والملفات، تستمر الأمانة العامة، وتستمر دائرة الكرة، ويستمر مدير القطاع… **نفس الدكان، نفس الرفوف، وننتظر بضاعة مختلفة!
* مدير الكرة ليس اسمًا في الكشف. الرجل مسؤول عن التسجيلات، الشكاوى، الانضباط، المعسكرات والإصابات… **الشكاوى لا تطارد الكرة، لكنها تطارد الهلال!
* ثلاث فترات لمجلس السوباط، والاستقرار في زمن الحرب إنجاز يُحسب له… لكن ثلاث فترات تعني أيضًا ثلاث فرص للمراجعة. **نفس الأفكار ونفس الأخطاء؟ طيب نحن بنعيد الموسم ولا بنعيد الحلقة؟
* **بختك يا النائب صاحب العضوية… أهو جيت واتحكرت! هات وقربت… **ما تشيل هم، الكرسي دافي والموسم طويل!
*حليل أبناء الهلال!** في عهد مجلس السوباط أصبحوا يتابعون من المدرجات… وشوقي زاتو قال: «دا طرفي منها». كويس يا أبو الأشواق… **الجات منك أحسن من الجات علينا!
* وعلى أبناء الهلال وكباتنه: الفرجة والمشاهدة! القرار عند المجلس، الكرة عند الأجانب، والوطني عليه التفرج والتصفيق!
*كلمات حرة*
*أما الشكاوى، فهذه حكاية أخرى… الهلال يخسر شكوى، يكسب شكوى، وتطلع شكوى جديدة تقول: «أنا هنا»! يا جماعة، **الشكوى بقت لاعب أساسي ولا شنو؟
*مدير الكرة؟لا تسألني عنه… اسألوا الشكاوى، يمكن تكون قابلته قبلنا!
*الهلال عنده أجانب، وعنده محترفين، وعنده فلوس… ناقصه فقط أن يجد الهلال نفسه!
*أهل الوصيف الخفيف… بلاش تحريف!** مدرب باور ديناموز معاهو حق؛ راجعوا آخر عشر سنوات… النجمة الإفريقية ذاتها ما شافت الوصيف!
*العليقي ما حردان ولا زعلان…** في غابات إفريقيا، ينقب عن الجواهر والمرجان… ونحن ننتظر الجوهرة التي ستلعب بدلًا من التي ستباع!
*حليل أبناء الهلال… الفرجة والمشاهدة! كابتن شوقي زاتو خلاها زعلك علينا يا ابوالاشواق أما القرار، فله ناسه!
*كلمة حرة*
*باور ديناموز قال الوصيف مجهول… والوصيف زعل! أما الهلال فمشغول بإفريقيا والبطولات، والوصيف مشغول بإثبات أنه معروف… يبدو أن الفرق بين الزعيم والوصيف أن الهلال يبحث عن النجمة، والوصيف يبحث عمّن يتذكر آخر مرة وصل فيها إليها!
