تسجيلات برائحة (البمبان)

صابنها
محمد عبدالماجد
تسجيلات برائحة (البمبان)

• كان عندنا أستاذ وقت تصب (مطرة) بقعد يزرز فيني – بنقول ليه يا أستاذ نحن ما عندنا ذنب.
• صبت ما صبت …نحن ما عندنا قضية.
• المطر دي صبت براها.
• نشيل ونحلف ..زي براق القبلي.
• الأستاذ بقول لينا انتوا قاعدين تحت المطرة وبتقولوا ما عندكم ذنب ؟
• قلنا ليه يعني انت عاوزني نعمل شنو ؟ نقعد فوقها.
• علاقة القعاد تحت المطرة بالمحاسبة عليها شنو؟
• موضوع (المطرة) دي ..هو اختصار للحاصل الآن.
• لا انترنت.
• لا فيس بوك.
• ولا واتساب.
• لا جرايد.
• لا اخبار.
• لا تسجيلات.
• ومرات اتصالات مافي.
• زمان كنا بنشكي من أزمة البنزين. ..وأزمة الخبز ، هسع اكتشفنا ان قطع الانترنت اكعب من أزمة الخبز.
• كنا بنشكي من انقطاع التيار الكهربائي ..هسع بقت لينا في (الانترنت).
• شوفوا الشعب السوداني ممكن يجامل في الكهرباء.
• يجامل في الخبز.
• يجامل في السكر.
• لكن في (الانترنت) ما بجامل ولا بيستحمل اكتر من كدا.
• تسجيلات الهلال بقينا نتابعها عن طريق (الخيال).
• لو ما خيالك واسع ..ما بتعرف شيء.
• زمان خبر الوفاة بتعرف بيه في الاربعين.
• الكلام دا قبل ما يظهر الفيس والواتس.
• مرات خبر العرس بتسمع بيه بعد عودة العرسان من شهر العسل.
• هسع بعد العولمة دي.
• وبعد (المدنية) – الخبر بقينا نسمع بيه بعد اسبوع.
• تتخيلوا تسجيلات الهلال زمان اللاعب قبل ما يتفاوضوا معاه ..بتسمع خبرو في الجرائد.
• هذه الأجواء يمكن ان تساعد مجلس ادارة الهلال ولجنة التسجيلات على انجاز التسجيلات بصورة علمية ومهنية.
• بدون ضغوط إعلامية..ومن غير ضغوط جماهيرية.
• يا صابت..ويا خابت.
• مواقع التواصل الاجتماعي المرة دي طلعت من التسجيلات من غير حمص.
• من غير خبر.
• لجنة تسجيلات الهلال قالت انها التزمت بتقرير المدرب ونفذته كما هو.
• بعض من ملامح هذا التقرير سوف نتحدث عنها الآن إيجازا – خاصة ان الغالبية مقطوع عنها الاخبار.
• الله يجازي الكان السباب.
• ما تقعدوا تحمروا لي عيونكم دي.. انتوا عارفنو.
• نحن كان عندنا رأي في (الخطف) البحصل في التسجيلات.
• كان عندنا رأي في (خطف) الموبايلات…تتخيلوا …حمدوك ذاتو خطفوه.
• هسع الكلام دا خلوه.
• لمن نبقى عليه ..بنجيكم عديل.
• خلونا في التسجيلات.
• الهلال سوف يعير الشيخ محمد بعد تمديد عقده ..وهو لاعب كنت أتمنى ان يجد فرصته في الهلال..لكن رؤية المدرب كانت ترى ان يخرج الشيخ اعارة.
• كلام مدربين.
• ما كلام جرائد.
• عبدالصمد منن ايضا لاعب كنت أتمنى ان يستفيد منه الهلال – لكن للأسف الشديد منن ايضا سوف يتم التوقيع معه وإعارته بعد ذلك.
• البركة في التوقيع معه.
• قد يكون منن في حاجة الى تجربة في الدوري الممتاز ..لكن الشيخ محمد كان يفترض ان يمنح الفرصة – خاصة ان الهلال لا يوجد فيه لاعب يجيد تنفيذ الضربات الثابتة.
• الشيخ محمد قدم موسم ممتاز مع الخرطوم الوطني يؤهله للمشاركة مع الهلال.
• لكن نقول شنو عن رؤية المدير الفني للهلال ؟ والتى يجب ان تحترم.
• التسجيلات المرة دي رائحتها بمبان بمبان.
• ان شاءاله تنجح.
• وتجيب لينا (مدنية).
• الهلال حسب الأخبار تعاقد مع المهاجم النيجيري إبراهيم مصطفي …وهو (رأس حربة) صريح ..اختاره ريكاردو بعناية ..يجيد الضربات الراسية والتصويب القوي على المرمى بقدمه اليمين…وصغير في السن وصاحب بنية جسمانية جيدة 190 سم.
• ابراهيم مصطفى هو إضافة نوعية لخط هجوم الهلال – سوف يجعل القوة الهجومية للهلال تكتمل.
• المدير الفني للهلال طلبه الأول في هذه التسجيلات التعاقد مع مهاجم صريح يجيد الضربات الراسية.
• إبراهيم مصطفى هو قريب لاعب الهلال السابق يوسف محمد …هناك قرابة دم قوية تجمع بين مهاجم الهلال الجديد ولاعب الهلال السابق يوسف محمد.
• إبراهيم مصطفى جاء للهلال من الدوري النيجيري بعد توصية ومتابعة من الجهاز الفني للهلال.
• كذلك اكمل الهلال تعاقده مع الجناح الشمال التنزاني ديفيد الومي …وهو لاعب يتميز بالمهارة والسرعة الكبيرة.
• التنزاني ديفيد عمره (21) سنة ويتوقع له نجاح كبير في الهلال – وهو أيضا جاء للهلال وتم التوقيع معه بعد توصية المدرب وإلحاحه على ذلك.
• ديفيد ح يرجع (الهوبة) للهلال من جديد ..فهو بعد التسجيل بقلب الهوبة على طريقة مهند الطاهر.
• الهلال قبل هذا الثنائي كان قد تعاقد مع اسحاق ادم حارس الاهلي شندي والمنتخب الوطني ، وهو مكسب كبير للهلال، كما تعاقد الهلال مع حسن متوكل (ميسي 3) وجمعة قلق ومبارك عبدالله ، إضافة الى عناصر مميزة جدا تم التوقيع معها في كشوفات فريق الشباب مثل امجد قلق لاعب مريخ القضارف السابق وياسر عطبرة ارتكاز فريق الهدف عطبرة ، اضافة لحارس النيل حلفا محمد ناصر ولاعب الجالية السعودية محمد صلاح.
• اسحاق وقع في خانة جمال سالم ومبارك عبدالله سجل في خانات الشباب ..ليكون الهلال في حاجة لـ 4 خانات.
• تقارير الشطب أشارت لمغاردة المهاجم محمد موسى الضي الذي ربما يتعاقد مع المريخ الى جانب سليم برشاوي ومؤيد عبادين وبشه الصغير.
• طبعا عندنا رأي في الشطب – لكن في النهاية اذا كان التقرير صادر من المدرب يبقى من الصعب عدم الالتزام به.
• كنت اتمنى ان تتم إعارة سليم برشاوى …ولكن سليم رفض الإعارة …فكان قرار شطبه.
• مؤيد عابدين كثيرون قد يكونوا ضد قرار شطبه ..وان كانت حجة المدرب تتمثل في ضعف مردوه الدفاعي.
• بشه لاعب ممتاز ..ولا عذر لشطبه سوى انه اخذ فرصة كبيرة في الهلال ولم يستقلها الاستقلال السليم.
• على العموم دائما تقارير الشطب لا يكون هناك اتفاق عليها..ومن الصعب ان تجد تقارير الشطب الرضاء من الجميع.
• لهذا من المتوقع ان تثير قرارات الشطب بعض ردود الأفعال وان كان انقطاع خدمة الانترنت سوف يضعف هذه الردود.
• نحن دائما نقول ان تنفيذ تقارير الشطب يحتاج الى ادارة قوية وشجاعة..واظن ان هذا الامر توفر لمجلس ادارة الهلال هذه المرة.
• لا نريد ان نتحدث عن المحترفين كثيرا ..لأننا شاهدناهم فقط من خلال (اليويتوب) – وهو امر لا يمنح القدرة الكافية للحكم على المحترف.
• نتمنى نجاح كل العناصر التى تعاقد معها الهلال …الوطنية والاجنبية …كما نتمنى التوفيق للعناصر التى غادرت كشوفات الهلال.
متاريس
• في كلام كتير ح نرجع ونكتب عنو.
• لكن هسع دا ما وقتو.
• بنمشى معاكم واحدة واحدة.
• يعني هي الدنيا طارت.
• التسجيلات تم مد فتح السيستم فيها حتى 6 نوفمبر.
• لجنة تطبيع الهلال تعمل من اجل النجاح في صفقة اخرى.
• ان شاءالله ينحجوا في ذلك.
• التسجيلات تمت حسب تقرير المدرب …وهذا امر لم يكن يحدث في الهلال من قبل.
• شيبوب حتى الآن خارج نطاق القمة.
• زمان كنا بنشكي من الكهربة عندما نكتب العمود.
• هسع العمود إلّا تجيبو براك للجريدة زي عمود المستشفى.
• الناس ديل رجعونا تاني 30 سنة.
• نت ما في.
• ترسوا الشبكة العنكبوتية.
• الله يهون بس.
• ….
• ترس اخير : لسه الحكاية ما انتهت.