* في حافلة المواصلات عندما تخرج هاتفك وتفتح (الواتس) أو (الفيس) ستجد جارك في المقعد المجاور (بيعاين بتركيز شديد).
* بعاين للدردشة باهتمام مبالغ فيه.
* وهذه حركة غير شعورية فيها كثير من التطفل والعبط.
* زول بيركز معاك في (شاشتك) أكتر من تركيزك أنت ذاتو.
* لو رسلت لزول كلمة (مشتاقين) هو بيكون منتظر رد الطرف التاني بلهفة تفوق لهفتك.
* لو جاتك (نكتة) هو ممكن يضحك قبل ما تضحك أنت.
* يشاركك في تلفونك بالنظر.
* المشاركة بالنظر.
* (الدردشة بالنظر) دي زي نظرية عبد الرحيم محمد حسين (الدفاع بالنظر).
* والزول البعاين ليك في تلفونك في الغالب بيكون (متطفل تعود على الحركة) أو (بطارية تلفونو نازلة).
* ومرات في ناس بعاينو من باب (العادة).
* يكون ماسك تلفونو في يدو وبرضو يعاين ليك في تلفونك.
* حتى لو بطاريتو تمام التمام برضو بعاين في تلفون جارو.
* اتعود على كده.
* ممكن يلومك ويقول ليك (مالك غادرت القروب ده)؟
* هذا التطفل يحدث الآن من جانب المريخ.
* المريخ لا يملك هاتف ذكي ولذلك هو (بيعاين في شاشة تلفون الهلال).
* مركزين معانا بصورة غريبة.
* المريخ من شدة ما مشغول بالهلال لما ما قادرين يحبوا المريخ.
* بهتموا بمباريات الهلال أكثر من اهتمامهم بمبارياتهم.
* تركيزهم مع الهلال ده لو ركزوا مع فريقهم ما كان تلاتة سنين بيطيروا من التمهيدي.
* ما كان بيطيروا من التمهيدي.
* لكن هم ما فاضين.
* مشغولون بالهلال.
* يوم الأربعاء، الفات من الساعة خمسة المريخاب قاعدين منتظرين قرعة أبطال أفريقيا.
* تشوفهم قاعدين يحضروا في القرعة ويشربوا في السجائر تحلف تقول المريخ (تصنيف أول).
* التمهيدي ده كمان داير ليهو سجائر؟
* قاعدين وبتمنوا في الفرق.
* في البتمنى الهلال مع مازيمبي، وفي البتمني الزمالك، وفي البتمنى الوداد.
* يطيروا من التمهيدي ويقعدوا يتمنوا.
* منى بس.
* ما عندهم غير الأمنيات.
* ولذلك نحن نخجل لناس المريخ إنابة عنهم.
* خجل بالإنابة.
* نخجل لهم ونأسف لقوة العين هذه.
* فريق تلاتة سنين ما قادر يصل دور الـ(32) ومع ذلك بتكلموا عن الهلال الذي وصل المجموعات!!
* قابلتك قوة عين أكتر من كده؟
* فريق يشارك في الأبطال (صحبة راكب) بفضل تصنيف الهلال ومع ذلك بيتكلموا عن الهلال!!
* صادفتك قوة عين بالطريقة دي؟
* الكاف بيختار الهلال لدوري الأبطال (عرق جبين) وبيختار المريخ (هوادة ساكت).
* وبعد ده يتفاصحوا.
* دنيا والله.
* وحقيقة نحن كل ما نقرأ تعليقات وتوقعات أهل المريخ للهلال في المجموعات، كل ما نقرأ بتدهشنا قوة العين وبنشفق عليهم.
* بيستحقوا الشفقة.
* حاجة تكسف.
* المهم.
* الفرصة أمام الهلال قائمة لتدراك ما يمكن تداركه.
* سيخوض الفريق ثلاث مباريات في المجموعات قبل التسجيلات وثلاث بعد التسجيلات.
* يعني في فرصة إضافة محترفين من العيار الثقيل.
* محترفون يحدثون الفارق وينقلون الهلال للمرحلة القادمة.
* وهذا يتطلب أن يحسم الهلال خياراته من الآن.
* من هسه تكون عارف نفسك داير تجيب كم محترف ومن وين.
* أدي نفسك براح للتفاوض والفحص عشان يكون اختيارك سليم.
* ما تبدأ البحث عن محترف بعد انطلاقة التسجيلات.
* قدامنا شهرين ونص نفتش محترفين (زي الناس).
* أعمل لجنة فنية حقيقية يا كاردينال.
* لجنة جد جد.
* لجنة ما كضب.
* لجنة من الفنيين أبناء الهلال.
* لجنة تتكون من سبعة أشخاص.
* السبعة ديل خليهم يسافروا (نيجيريا والسنغال والكاميرون وساحل العاج).
* يسافروا عشان يرصدوا ويشوفوا المحترفين (شوف عين).
* شوف عين.. ما لقطات فيديو وسمسرة وعبط.
* معظم المحترفين الجونا في عهد الكاردينال هم مجرد (أجانب).
* ما عندهم علاقة بكرة القدم.
* لو مشينا جامعة أفريقيا العالمية وسجلنا لينا تلاتة طلاب من النيجر بيطلعوا أفضل من محترفي الكاردينال.
* والله صحي.
* سبعة محترفين جابهم الكاردينال وشطبهم بعد (40) يوماً.
* اختيارات خاطئة للحد البعيد.
* أقفل باب السماسرة يا كاردينال واعتمد على أبناء الهلال المخلصين وبعد داك بتشوف الفرق.
* بتعرف أنت كنت وين وبقيت وين.
* هسه عليك زي بشة ده لو جبتو وقطعت ليهو تذكرة وقلت ليهو أمشي أقعد في الكنغو شهر جيب لي مهاجم في حجم الهلال.. لو عملت كده هل ممكن بشة يجيب ليك (ماسورة)؟
* لكن المشكلة الكاردينال خسر معظم أبناء الهلال.
* خسرهم واعتمد على السماسرة والمنتفعين عشان كده خمس سنين بغشو فيهو.
* خمس سنين بيشرب من نفس الكأس.
* حتى الأيام البتعلم الناس ما علمتو.
* خليك من بشة.. هيثم ده مش زولك، خليهو يمشي نيجيريا من بكره يتابع الدوري ويقعد شهر ويجي ومعاهو محترف من طراز ساماتا.
* ممكن تلقي زي ساماتا في حواري نيجيريا والسنغال.
* كونو ترسل ليك زول بيعرف كورة عشان يجيب ليك محترف.. دي حاجة صعبة يعني؟
* لمتين ح تعتمد على تسجيلات مقاطع الفيديو والسماسرة؟
* لمتين؟
* شوف الأهلي بيسجل كيف والترجي والنجم.
* تسجيلات الفيديو الناس خلوها زماااااان.
* الزول لو داير يعرس ليهو بت ما بختارها عن طريق الفيديو.
* وأهم من ده كلو.. الهلال من جوه فيهو مشاكل، عالج المشاكل عشان ما يطول البكا.
* و..و..
* والله في..
