توتي كدا الاهلي كيف؟

صابنها

محمد عبدالماجد

توتي كدا الاهلي كيف؟

• لعب فريق الاهلي المصري امس الاول في الدوري المصري امام فريق القاولون العرب.
• المقاولون العرب انهى الشوط الاول متقدما على فريق الاهلي 2 / صفر.
• كل ما تابع الشوط الاول ، اكد ان المقاولون انهى المباراة باكرا وان عودة الاهلي حتى للتعادل مستحيلة.
• نحن افتكرنا المباراة انتهت.
• شربنا (لبنا) وقفلنا تلفزيونا.
• لكن الاهلي المصري جاء في الشوط الثاني شكل تاني.
• قمنا تاني صنقرنا.
• وقلنا نشوف (هزيمة) الاهلي المصري.
• 2/ 0 في الشوط الاول نتيجة ما بتتعوض.
• ربع ساعة مضت في الشوط الثاني – وما في حاجة.
• قلنا نقفل.
• طاهر محمد طاهر سجل الهدف الاول في الدقيقة 60.
• قلنا تقليص ليس اكثر من كدا.
• القون في البرد صعب.
• المقاولون مقفل.
• والاهلي ضاغط.
• والكور تتطاير.
• قلنا الحكم لو جامل الاهلي – المباراة تنتهي تعادل.
• الدقيقة 70 محمد شريف سجل الهدف الثاني للاهلي.
• هدف التعادل.
• قلنا خلاص تنتهي كدا.
• ما مشكلة.
• الدنيا (برد).
• الدقيقة 80 محمد مجدي افشة يسجل الهدف الثالث للاهلي هدف الفوز.
• دا حظ شنو دا؟
• دا فريق ايه؟
• لو الاهلي في العشرة دقائق الاخيرة دي عاوز ليه (5) اهداف بجيبها.
• ولو عاوز مثلها في الزمن البدل الضائع – برضو بيسجل.
• حسب الطلب.
• عاوزين اتنين بجيبو.
• عاوزين خمسة.
• ستة.
• أي رقم تضعو ليهم بجيبوه.
• اصلو ما عندهم مشكلة.
• فريق زي دا بجيب (الاقوان) حسب الطلب سوف يواجه المريخ بعد مشاركة الاهلي في بطولة كاس العالم للاندية في القاهرة يوم 16 فبراير.
• ناس طبنجة.
• وكرنقو.
• والتاج يعقوب.
• وتمبش.
• وعزام عادل.
• سوف يواجهوا الاهلي المصري يوم 16 فبراير.
• انتوا ما عندكم رأس.
• امس حضرت مباراة المريخ امام توتي – 90 دقيقة عاوز اعرف نفسي بشاهد في شنو؟ ما عرفت.
• قدر ما اجتهدت عشان اعرف نفسي بتابع في شنو ؟ ما فهمت حاجة.
• مرات اقول ديل ناس (ساحات الفداء).
• ناس (طبنجة) يتراوحوا لي كدا رهاب رهاب.
• صورتهم تمشي وتجي.
• ومرات اقول لا ..أنا شكلي كدا بحضر في (فيلم اجنبي).
• مباراة عاوزة ليها (ترجمة).
• ما مفهومة.
• ومرات اقول دي مسلسل (وادي ام سدر).
• امير كمال دا زي شفتوا قبل كدا في مسلسل وادي ام سدر مع الراحل عبدالعزيز العميري.
• ومرات اقول يمكن الارسال قطع.
• يمكن بحضر لي في ارسال قاطع.
• قدر الكورة ما تجي على كرنقو بسمع ايششششش.
• وايشششش دي كنا بنسمعها زمان لمن الارسال يقطع.
• الناس ديل بعملوا في شنو؟
• هسع فريقكم دا عاوزين تلعبوا بيه امام الاهلي المصري.
• طبنجة دا – نصيحة ليكم حدو معاكم جوازات بانت.
• اكتر من كدا شبر ما يمشي معاكم.
• وكرنقو.
• وتمبش تقول في حفلة.
• انا اول مرة اشوف لي مدافع بقدل ليه في هزيمة.
• يا زول شغل زي دا ما بنفع.
• الاهلي صعب.
• دي توتي.
• الكابتن محمد موسى محلل قناة الملاعب في الاستديو التحليلي قال ما عارف المريخ لاعب بي ياتو تنظيم.
• الظاهر كدا ناس طبنجة ديل ادم سوداكال ما جاب ليهم (مترجم).
• الفريق دا واضح شغال بدون مترجم.
• الفرنسي جوميز شغال مع ناس (تمبش) بالاشارة.
• ما فاهمين منو أي حاجة.
• سوداكال ما عندو (مرتب) للمترجم.
• وفيما يبدو ناس محمد عباس وعزام وكرنقو فهمو جوميز غلط.
• يقول ليهم شمال يمشوا يمين.
• يقول ليهم يمين يمشوا شمال.
• الجدعة بفهموها (ضربة ركنية).
• كمان ناس امير كمال شن خبرهم بالفرنسي؟
• توتي يوم الاتنين لعبت امام الهلال واتغلبت خمسة.
• الغربال قونين.
• سمؤال قون.
• نزار حامد قون.
• اباذر عبدالمنعم قون.
• نحن يا بكري المدينة في توتي جبنا خمسة اقوان ما عملنا عمايلك دي…انتوا في قون التعادل – في نقطة تعمل كدا؟
• توتي قدمت مباراة كبيرة امام الهلال ، وكان اداء توتي امام الهلال افضل من هذا الاداء الذي ظهر به فريق توتي امام المريخ.
• مع ذلك توتي اتغلبت خمسة من الهلال.
• عارفين ليه؟
• عشان الهلال عندو تنظيم.
• وعندو حلول فردية.
• وعندو مدرب.
• في تنظيم.
• وفي شغل.
• توتي امام المريخ لم تلعب واستطاعت ان تخطف نقطة من المتصدر.
• لو قدموا نصف المستوى الذي لعبوا به امام الهلال كان غلبوا المريخ.
• لكن برضو (نقطة) ما كعبة.
• مرات النقطة احلي من النقاط التلاتة.
• المريخ ما عندو فريق.
• تتصدروا.
• تتأهلوا للمجموعات.
• ما عندكم فريق.
• احسن قابلوا الواقع المرير دا.
• دي الحقيقة.
• بعد ثلاثة اسابيع وشوية أي في يوم 16 فبراير المريخ سوف يواجه الاهلي المصري في القاهرة.
• والكلام دا صعب عليكم.
• اذا توتي عملت فيكم كدا – الاهلي يعمل شنو؟
• تمبش.
• طبنجة.
• منجد النيل.
• امير كمال.
• كرنقو.
• ديل ناس ما بركزوا ليكم امام الاهلي المصري.
• عاوزين مني (النصيحة).
• شوفوا ليكم (كورونا) سريع …واتخارجوا من المباراة دي.
• احسن تعتبروا مغلوبين 0 / 2 بالكورونا ، من ان تتغلبوا 0 / 5.
• النصيحة دي ما بتلقوها في حتة تانية.
• النصيحة دي اعلام المريخ ما بديكم ليها.
• شوفوا ليكم فحص يؤكد ان هناك 25 لاعبا في المريخ عندو كورونا.
• احسن ليكم من الفضائح.
• والسفر.
• والتذاكر والتلتلة.
• والبرد.
• والمطر.
• احسن ليكم تتغلبوا بالكورونا ، من ان تتغلبوا بطبنجة ومنجد النيل وتمبش.
• ناس الاشانتي عرفوها.
• الاشانتي اتغلب في اكرا من الهلال 1 / صفر.
• الجماعة وصلوا الخرطوم لقوا الهلال مولع.
• والفريق فيه حالة تمرد وعصيان بين اللاعبين.
• جماعتكم قالوا احسن يقولوا (كورونا).
• هسع يا ناس المريخ انتوا اعملوا نفس الشيء.
• قولوا كورونا.
• يوم 14 فبراير اعملوا فحصوات للكورونا.
• يوم 14 فبراير قولوا البعثة كلها عندها (كورونا).
• وامرقوا من (الاحراج) دا.
• ناس افشة والسولية ديل لا بتقدروا عليهم ولا حاجة.
• اذا كان امام (توتي) الذي يلعب امام المريخ بعد 50 سنة ما انسترتوا – عاوزين تنستروا امام اهلي القرن.
• مالكم ومال الفضائح.
• كمان اقول ليكم (سر).
• والله الايامات دي قالوا ليك القاهرة برد ومطر يلخم.
• ناسكم ديل في الصيف ما انستروا.
• في استاد الهلال ..الفيهم اتعرفت.
• عاوزين تنستروا في القاهرة.
• وفي البرد دا.
• طبنجة دا (البرد) ممكن يجيب خبرو.
• انتوا ما عندكم رأس.
• غايتو (المجموعات) التى صعدتوا لها دي ح تبقى ليكم سبب.
• ح تشوفوها تاني عشرة ..عشرة.
• المجموعات دي ح تطرشوها عديل كدا.
• ح تكرهوا اليوم الذي تأهلتم فيه للمجموعات.
• انتوا فاكرين المجموعات دي لعب.
• توتي كدا.
• الاهلي كيف؟
• انا قلت مالي ومال كدا؟
• ………..
متاريس
• قالوا ناس المريخ بفتشوا ليهم في شكوى.
• عشان يشتكوا توتي.
• قالوا توتي فيها (تمساح) فوق السن.
• ناس المريخ مشوا يفتشوا في (البحر).
• يمكن يطعنوا ليهم في (تمساح).
• الجزولي نوح قالوا اختاروه للمنتخب.
• معقولة بس.
• بدمروا الولد.
• الولد لسه على الكلام دا.
• خلوه ينضج شوية.
• ادوه فرصة.
• ما كدا.
• وإلّا بس عشان تثبتوا ان نظرية شداد صحيحة.
• تشكيلة الهلال.
• وتشكيلة المريخ.
• والمنتخب الوطني.
• بقى يضعها شداد.
• ما كدا.
• الهلال يلعب اليوم امام الاهلي شندي.
• كمال الشغيل مدرب شاطر …وحافظ الهلال.
• الشغيل (تكتيكي) من الطراز الاول.
• عشان كدا احسموا الموضوع من بدري.
• المريخ اتعثر.
• ما تكرروا (العثرة) ذاتها.
• نحن منتظرين.
• وراجيين منكم الكتير.
• يا نزار ابعد.
• ابقى بعيد.
• ويا بوجبا ..بصر.
• شوف (الحتة) الصاح في الشبكة وخت الكورة.
• …………
• ترس اخير : مدرب الاهلي المصري موسيماني قالوا تابع مباراة المريخ وتوتي امس …لمن المباراة انتهت مفتكر فريق المريخ هو (توتي) – وتوتي هي فريق (المريخ).