توني (ما شفت عوض يا ساري الليل؟)

صابنها
محمد عبد الماجد
توني (ما شفت عوض يا ساري الليل؟)

اغاني (الشايقية) زي (مضمدات الجروح) ، لا يتخيل لي ان هنالك سوداني في الارض مر بقصة حب حقيقية دون ان يستعين بأغاني الشايقية ويقيف فيها.
الاغنية تعتر ليك في القلب.
وتعمل ليك (عشراقة) في الحلق .. رغم انها موجعة ومرة.
السوداني وقت يحب بتظهر عليه خمس علامات.
ما بنوم.
وبشرب الشاي تقيل.
وبسمع اغاني الشايقية.
وبهري القميص بالمكوى.
وبقيف قدام باب المدرسة الثانوية للبنات.
زمان كنا بنشترى شريط الكاسيت ونسمعه في السر – لأن (الجهر) الذي تحمله الاغنية الشايقية كان لا نقوى عليه.
نتفلت متل (فرخ القطا الاماتو ركت وفرت).
(ترك وتفر) دي ما بلقاها إلّا عند الشوايقة – هي حالة من التناقض والجمع بين فعلين بعدين ومتناقضين في وقت واحد… يمكن الامر يكون له علاقة بالإرث العربي القديم كما عند امرؤ القيس (مكر مفر مقبل مدبر معًا) – هذا البيت طبعا كل ما يقع في عيني بذكرني بـ (ياسر مويس) فهو ما شاءالله عليه (كجلمود صخر حطه السيل من عل).
شفتوا كيف؟
مكر ومفر ومقبل ومدبر في نفس الوقت.
دخلت ليكم في حتة تانية.
ياسر مويس نفس الشيء (مكر مفر مقبل مدبر معا)… المدافع لا بعرفو جاري عليه .. لا بعرفو جاري منو.
حاجة (تلخبط) كدا.
ما شاءالله عليه.
المهم ما تخلوني اطلع من الموضوع.
وقت اطلع من الموضوع ذكروني.
اصلو الايامات دي فرق التمانية نقاط عامل برندة وغرفتين من الفرحة.
الموضوع دا عاوز ليه كباية شاي … ما في داعي نطلع لفاصل اعلاني.
الشعراء الشايقية امثال حسن الدابي و اسماعيل حسن ومحمد سعيد دفع الله و السر عثمان الطيب وسيد احمد عبدالحميد وبعدهم من اجيال – محمد احمد الحبيب وخالد شقوري وحاتم الدابي وعلاءالدين عبدالرحيم ومحمد سفلة وخالد الباشا والفاتح ابراهيم بشير ، وغيرهم من فطاحلة شعراء الشمال ، هم اذا وضعتهم في شارع دكاترة الاغنية السودانية صوف اصنفهم من اختصاصي (الجراحة).
جراحة القلب المفتوح.
محمد الحسن سالم حميد طبعا في مكانة مختلفة – وهو يحتاج الى بحوث خاصة.. وعاوز ليه (فلسفة) منفصلة.
اعتقد ان الاغنية الشايقية قامت بدور مهم في حياة الناس في السودان فقد كانت تلك الاغاني هى المتنفس الوحيد الذي يمكن ان يبكي فيها العاشق ويقعد في الواطة .. يتتخج لمن يعرف حاجة.
الاغنية الشايقية تعبر عننا (عاطفيا) بصورة نفتقدها في الواقع.
ما في تفاوض (عاطفي) بتم بين اثنين بخلو من حسن الدابي عندما فجر هذا الامر في (فاوضني بلا زعل)… الزعل حاضر في أي مفاوضات عاطفية … دا كلام عجيب.
محمد سعيد دفع الله جاب (الطيف) من (ديلو) أي من (ذيله) عندما قال (حتى الطيف رحل خلاني ما طيب لي خاطر) ، دي حالة متأخرة شديد.
نحن نقنع يعني!!
التجاني الماحي ما بتقبل بيه.
سيد احمد عبدالحميد مع ثنائي العماراب ابدع في (رمال حلتنا).. انا من اشوف لي (رملة) بدخل معاها في حوار بس بوجعتها .. وبقعد افتش فيها عن (الدرب).
بالمناسبة لم اجد اجمل من هلالية عطا فضل الله (ثنائي العماراب) والسر عثمان الطيب وسيد احمد عبدالحميد والفاتح ابراهيم بشير – المبدعين ديل هلالاب اكتر مني ومنك.
اكتر من أي زول.
هلاليتهم متل ادبهم وروعتهم.
في حاجات كتيرة عاوز اكتر عنها في هذا المجال – وان شاءالله نعود لها لاحقا بشكل تفصيلي.
الشاعر السر عثمان الطيب في (بحر المودة) قدم لنا عاطفة الابن مع امه بما نحس به تماما (شوفى الزمن يا يمة ساقني بعيد خلاص) .. حاجة (تحنن).
انا كل ما اسمع الاغنية دي بحس بي اني بعيد ومسافر حتى لو لم اكن كذلك.
صديقي (اباذر الكدرو) عندو مكتبة جميلة في هذا المجال – زول فنان ومريخابي رائع – دائما اتوق ان ارى امثال اباذر الكدرو ابن مدينة شندي (الشايقي) في العمل العام – المريخ يحتاج لمثل هذا الشاب فلا تهملوا هذا الكنز.
اوصى اهل المريخ به.
بمناسبة اباذر الكدرو سوف اخاطبه اليوم بلغته …لأن موضوع توني د ابي صراحة كدا فيه (كسير) شديد.
قالوا توني مكسر في الهلال.
اخذ ليه (كرت احمر) عشان يسافر الى بلاده.
اتزوج عشان يأخذ اجازة وعشان يقول بعد كدا ان زوجته مريضة.
اصلو (المحترف) من يعمل ليه زوجة بقول ليك (عيانة).
عملتها ظاهرة يا (توني).
كنت عاوز اكتب ليكم عن شعراء شباب الاغنية الشايقية ناس سفة والباشا والحبيب.
لكن قلت اكتفي بـ ( ساري الليل) : (ما شفت عوض تابع النجمات فات لي قدام يا ساري الليل).. الاغنية التى كتب كلماتها الشاعر الرائع حاتم الدابي وتغني بها الزول البغني في منطقة حقتو براهو عبدالقيوم الشريف.
ونحن نستأذن الدابي وعبدالقيوم في ان نقول (توني) بدلا من (عوض) .. عشان النيجيري اختفى في ظروف غامضة.
رئيس نادي المريخ الذي فقد شرعتيه حازم مصطفى قال ان عوض سوف يعود يوم الثلاثاء.
اقصد توني.
والليلة الثلاثاء .. نشوف بحصل شنو؟
لو رجع ما بقعد معاكم كتير.
الدكتور مزمل ابوالقاسم كتب : (تصريح غير موفق أدلى به رئيس المريخ حازم مصطفى أمس، وذكر فيه أن النيجيري توني يمتلك متأخرات بقيمة 190 ألف دولار على النادي… ذكر حازم أنه عرض على اللاعب تسديد المبلغ له لكنه لم يرد عليه! لم يكن هناك داع لتصريح متهور، أريد به تحميل التازي مسئولية عدم عودة توني. قيمة عقد النيجيري حوالي مليون دولار، سدد منها التازي زهاء 800 ألفاً. المستندات تؤكد أن اللاعب تسلم مرتباته كافة، حتى نهاية شهر مايو الماضي، وتبقت له دفعة أخيرة سيتسلمها فور عودته للخرطوم. لذلك نتوقع من حازم أن يجتهد لإعادة اللاعب كي يلحق بمباراة القمة، بدلاً من إطلاق تصريحات مفخخة يراد بها تجريم الرئيس الفخري).
مجلس حازم كله متهور.
حازم والجاكومي.. وكابو كذلك.
واللواء نورالدين داك متهور شوية عليه.
السؤال الذي يفرض نفسه هل تعاقد المريخ مع اللاعب توني بقيمة تصل الى مليون دولار؟
عاوزين نعرف.
عشان ناس العيلقي يكون عارفين قيمة هذا اللاعب.
الحكاية شنو؟
الزول دا الظاهر عليه خطير.
بالمناسبة أي ملف مسكه العليقي انجزه.
ولا كلمة.
اغنية (يا ساري الليل) بتحكي عن (عوض) الذي فقد في فيضان 1988 وكانت حبوبته بتسأل عنه (ما شفتوا عوض) بعد ان تأخرت عودته وفقدته .. ليلتقط حاتم الدابي هذا السؤال ويكتب اغنية (ساري الليل) التى ابدع عبدالقيوم الشريف في تقديمها في وقت كان فيه الشعب السوداني كله بيسمع (اغاني الشوايقة)… ايام شرايط الكاسيت … تركب أي حافلة في الخرطوم تلقى شغال فيها (يا ساري الليل) .. تمشي أي كافتريا تلقى شغال فيها (يا ساري الليل).
ايام (حبي ليك انا كان زادي) لعبدالرحيم ارقو .. الاغنية التى شالها كل العاشق والمحبين (زاد) في كل قصة حب.
وساري الليل ما شفت توني؟
مزمل ابوالقاسم كتب عن الوضع الحالي في المريخ (مرثية) اخطر من (مرثية) حاتم الدابي التى كتبها عن (توني) اقصد عن (عوض).
انتوا مالكم عاوزين تلخبطوني؟
كتب مزمل : (خلال فترة الانتقالات الماضية طالبنا مجلس المريخ بضم هاجم أجنبي متميز واستغلال العقوبة التي أوقعتها لجنة الانضباط بالفيفا على نادي فاركو المصري لإعادة المهاجم سيف تيري للمريخ.. فلم يفعل. لاحقاً لاحت فرصة لضم المهاجم وليد الشعلة بعد انتهاء عقده مع نادي العربي الكويتي فطالبنا بضمه، لكن المجلس بقيادة رئيسه ورئيس القطاع الرياضي رفض الاستجابة، وتمسك باستمرار الثلاثي الأجنبي الضعيف، المكون من الليبيريين أوغستين أوتو وفريدريك والغاني المعطوب تايلور. استفحلت أزمة خط المقدمة الأحمر بسبب غياب النيجيري توني والسماني الصاوي اللذين تحملا عبء التسجيل والصناعة في مباريات دور المجموعات لدوري الأبطال. المحصلة ما رأيناه في المباريات الأخيرة!).
انتوا مزمل ابوالقاسم نسى صديق كوة.
ما قلتوا هداف الدوري.
ونجم المنتخب الوطني.
ما قلتوا صديق كوة اخطر من هيثم طمبل.
هسع بقيتوا تتكلموا عن العقم الهجومي.
دنيا.
مزمل اعلنها صراحة وقال طالبنا بتسجيل وليد الشعلة .. بعدين وقت الهلال يدخل عليكم ويسجل من المريخ الموضوع ما يبقى ليكم حار.
انتوا بديتو بـ (وليد الشعلة).
استحملوا الباقي.
وما شفتوا عوض يا ساري الليل.
عوض فات لي قدام فعلا.
وتوني برضو فات قدام.
لا عندكم ملعب.
ولا عندكم مجلس.
توني البخليه يقعد معاكم شنو؟
لاعب قيمته مليون دولار .. ما بتقدروا عليه.
احسن تركزوا مع صديق كوة.
ادعموا هذا اللاعب هو الباقي ليكم.
كلنا صديق كوة.
…..
متاريس
التساهل في أي نقطة يعني تساهل في لقب الدوري.
تفقد مباراة يمكن ان تفقد البطولة كلها.
فرق الـ 8 نقاط لو ما زاد ان شاءالله ما ينقص.
مباراة اليوم امام كوبر نرجو ان لا ينظر لها الهلال على انها مباراة ساهلة.
المباراة الساهلة او التى نظن كذلك دائما بتفقد فيها.
نزيف النقاط لا قدر الله اذا بدأ ما بقيف.
انظروا للمريخ.
تعادل مع الخرطوم الوطني وهي في المركز الاخير وتعادل مع حي الوادي وهو في المركز قبل الاخير.
فريق حي الوادي ظل على الدوام يقدم مباريات كبيرة امام المريخ – هذا امر يحسب لفريق حي الوادي ولإدارته المحترمة.
من الاندية التى احب كورتها فريق حي الوادي.
نسأل الله التوفيق اليوم للهلال.
وان شاءالله الهلال ينتصر.
وان شاءالله الفرق يبقى (11) نقطة.
نقول يا رب.
والله غالب.
توتي تلعب اليوم امام المريخ من اجل المشاركة في البطولة الكونفدرالية.
مباراة توتي اليوم تحدد مصير توتي (خارجيا).
بعد المباراة القادمة سوف يخاطب الاتحاد السوداني ويحدد الاندية التى سوف تمثل السودان خارجيا في الموسم الجديد.
لهذا تكتسب مباراة توتي اليوم اهمية كبيرة.
….
ترس اخير : الليلة عاوزين نشوف فصاحة كفاح.