جاهم شايل شنطتو وقال ليهم أنا من طرف حازم !!

قزاز ورذاذ
محمد الطيب الأمين
جاهم شايل شنطتو وقال ليهم أنا من طرف حازم !!

* إتخيل .. تكون قاعد في أمان الله يجيك واحد شايل شنطتو وبدون مقدمات وبدون سابق معرفة يقول ليك أنا جيت أقعد معاكم.
* تقعد وين؟
* يقول ليك : أقعد معاكم هنا في البيت.
* وأنت منو اصلاً؟
* أنا زول.
* الحوار ده حصل بالضبط في معسكر المريخ بالقاهرة و(العهدة على الراوي).
* قال ليك ناس المريخ قاعدين في المعسكر بالقاهرة فجأة دخل عليهم شاب مصري.
* الجماعة قالوا ده بيكون إعلامي مصري جاي يعمل إستطلاع مع البعثة.
* إستطلاع شنو وأنت نجيلة ما عندك؟
* قال إستطلاع قال.
* واحد منهم سأل الشاب المصري ده قال ليهو : حبابك يا إبن النيل تطلب خدمة؟
* المصري قال ليهو : خدمة شنو يا أستاذ أنا لاعب معاكم.
* معانا وين؟
* قال ليهو : معاكم في المريخ ده.
* من متين؟
* من هسه ، أنا جاي من طرف حازم هو اللقال لي إنضم للبعثة.
* طوالي حجزوا ليهو غرفة ناصية في الفندق.
* وصرفوا ليهو (اللبس).
* ومشى التمرين.
* ما من طرف حازم وكده.
* في التمرين لو مسك الكورة ما في لاعب بقرب عليهو.
* بخلوهو ياخد راحتو.
* من طرف حازم وكده.
* امبارح الصباح المريخ لعب مباراة ودية.
* والمصري شارك أساسي.
* من طرف حازم وكده.
* التشكيلة كلها بتلعب للمصري ده.
* أي لاعب معاهو الكورة أول حاجة بشوف المصري وين وبلعبها ليهو.
* من طرف حازم وكده.
* المصري بالصاح بالكضب جاب ليهو قون غايتو.
* وأول ما جاب القون طلع من الملعب والكورة شغالة ، مسك تلفونو دخل الفيسبوك كتب : (الحمدلله سجلت أول أهدافي مع المريخ السوداني).
* كتب الكلام ده ورجع تاني واصل المباراة.
* ما من طرف حازم وكده.
* لاعب لا مسجل في الكشف ولا في زول سمع بالمفاوضات معاهو ولا عارفين الرشحو منو.
* اللهم زول مصري جا شايل شنطتو ودخل المعسكر ودخل التشكيلة ودخل الفيسبوك ذاتو .
* أنا لما شفت صورتو بعد المباراة عرفتو.
* الزول ده قبل كده أنا شفتو.
* ولو ما أخاف الكضب شربت عندو عصير في موقف شروني.
* شكلو ما غريب علي والله.
* ما داير أحلف ساكت والدنيا خميس لكن الزول ده كان شغال في كافتريا في موقف شروني.
* أو موقف جاكسون.
* أو موقف الإستاد.
* المهم .. موقف من المواقف.
* عليك الله حصل سمعت ليك بعملية زي دي؟
* شغل زي ده في الحواري قابلك؟
* اوع يغشوك ويقولوا ليك ده لاعب بعمل إختبارات.
* في مدرب محترم بعمل إختبارات للاعب وأمامه مباراة أفريقية بعد ٧٢ ساعة؟
* وهو ذاتو قالوا ساب الكورة وبقي وكيل لاعبين.
* اصلاً هو ما بعرف يلعب وغير كده بقى وكيل.
* غايتو غارزيتو ده زادو موية والله.
* زمان ما كان كده.
* بقى يقبل بأي حاجة.
* لما تشوف الحاجات دي بتحمد الله على نعمة الهلال.
* والله صحي.
* زي المصري ده لو جا معسكر الهلال إلا يتصور مع الغربال ويرجع.
* كده افرض المريخ ما كان مشي القاهرة؟
* هل اللاعب ده كان ممكن يجي الخرطوم؟
* ولا الشغلانية صدفة ساي.
* يكون المصري ده عرف المريخ في القاهرة وقال يمشي عليهم.
* كل شي وارد.
* مساكين المريخاب قالوا ارتاحوا من سوداكال جاهم حازم ح يخليهم يندموا على سوداكال.
* ونحن غايتو السنة دي بالذات يا متنا من الضحك ويا كمان الضحك كتلنا.
* تنويه .. اليوم الخميس سيتم بث حواري مع مذيعة قناة (العربية) و(الحدث) الأستاذة لينا يعقوب عبر قناتي على اليوتيوب (قناة دقايق) ، أرجو شاكراً دعم القناة بالإشتراك والمتابعة.
* ونركب صافنات ونجيبة (مصرية) واصلو الزول بيموت والذكرى تفضل حية.
* و…و…
* وعندي ليك سر من زمان داير أقولو ومنكسف …….. (أنا من طرف حازم).