بابكر سلك
*مرة قريت عن الطالب المعجب بالجمل
*اي موضوع انشاء يتحدث فيه
*يتطرق للجمل
*ومن يجيب سيرة الجمل تاني مابفكها
*مغرم بالجمل حد الادهاش
*قالوا مرة الاستاذ قال ليهم اكتبوا عن السفينة والبحر
*وصاحبنا كتب
*السفينة تنقل البضائع والاشياء منا والينا
*والسفينة تجري علي البحر ولاتجري علي اليابسة والصحراء
*لان للصحراء سفينة اسمها سفينة الصحراء
*وسفينة الصحراء هي الجمل
*والجمل حيوان اليف وقوي
*الجمل يتحمل العطش لمدة طويلة
*والجمل له سيقان طويلة وقوية
*والجمل من المخلوقات التي يفخر الخالق بانه خلقها
*والجمل انواع
*ابو سنام وابو سنامين
*الجمل ابو سنامين ده ماعندنا هنا
*واكتسب الجمل شهرة في الثورة المصرية لما فجخ ثوار مصر في ميدان التحرير
*المهم
*قال ليك الاستاذ قرب يجن
*نادي الطالب وقال ليهو
*انت اي حاجة الجمل الجمل؟
*اتكلم لي عن الثأر عند قدامي العرب
*الطالب قال
*الثأر قديما عند العرب غاية
*ومابتنسي ولو مرت عليه السنوات
*ولكن الجمل اكثر تمسكا بالثأر من العرب
*لو واحد ضربو
*بعد مية سنة لو لقاهو نايم بقع فيهو يمسحو مع الواطة
*في اللحظة دي الجمل اقصد الاستاذ استقال من التدريس واسي قال ليك شغال في عصارة زيت سمسم اصلي لافي بيها جمل
*ايها الناس
*الجمل اللافي بالعصارة هين
*الجمل اللافي بينا وبعصر فينا علي ارض الاعتصام علي قرار الجمل المصري العصر الناس في ميدان التحرير ده شنو؟
*هل صدرت الينا الثورة المصرية جملها ليبرطع علينا في ساحة الاعتصام؟
*ام انه جمل الثورة السودانية الذي اراد ان يضع بصمته علي تاريخ الثورة ولكن علي طريقة جمل الثورة المصرية؟
*ام ان الجمال كلها كده؟؟؟؟؟
*ولماذا تبرطع الجمال فينا لتنقص من لوحتنا الجميلة؟
*وهل الجمال عدو للجمال(بفتح الجيم )
*وهل مانسمعه من تصريحات فطيرة ومبررات واهية من السلطات (المؤقته) العليا يقنعنا؟
*خلاص صدقنا انو جيشنا ده كلو غلبو يحمي ثوار السلمية
*صدقنا انو جيشنا ماعارف الجمل البفجخ في الثوار من بعد الافطار
*لكن لنا سؤال؟
*اذا الجمل غلب الجيش
*برضك غلب الجمال؟؟؟
*ايها الناس
*برطعة الجمل هي فرفرة ذبيح لعهد الآن معلق في السلخانة
*منزوع الجلد متعري
*اي شئ ظاهر
*الشحمان والسجمان والرمدان
*وقع ليك يابرهان؟؟؟؟
*ومهما برطع الجمل
*مصيرو يبرك
*لان للثوار المقدرة علي اناخته
*ولن ننسي ان الجمل حيوان اليف
*ايها الناس
*بوادر الاتفاق التي اشرقت
*يجب ان نحميها بقوة
*وحمايتها تكمن في تفويت الفرصة علي جمل ميدان التحرير الذي بدأ البرطعة علي اجساد الشهداء
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*لماذا انتوا قاعدينا
*وجمل ميدان التحرير يبرطع فينا؟
سلك كهربا
ننساك كيف والكلب قال الجمل حيوان اليف لكن غتييييت
والي لقاء
سلك