جيسي ..الشاف ناس المريخ رجعوا لـ (أي دمعة حزن لا لا) ما كضب!!

صابنها

محمد عبد الماجد

جيسي ..الشاف ناس المريخ رجعوا لـ (أي دمعة حزن لا لا) ما كضب!!

• زمان المدرب المصري مصطفى يونس قال للاعلام : السنة دي المريخ ح يعيط كتير.
• وفعلا عيط المريخ.
• والسنة دي من هسع بنقول ليكم المريخ السنة دي والسنوات القادمة ح يعيط كتير.
• الموضوع ما ح يقيف عند ابوعشرين ورمضان عجب ومحمد الرشيد.
• وموضوع (العياط) دا ح يمشي اكتر من كدا.
• عندنا صاحبنا …كل جمعة بعمل لينا رحلة وبيضبح لينا (خروف).
• عودنا على الحكاية دي من زمن نحن في الثانوي.
• رحلة بي خروفها.
• صاحبنا دا ذاتو …بقى كل جمعة يعمل لينا الرحلة …ويشغل لينا شريط لي (جيسي).
• شال الخروف برة من برنامج الرحلة.
• اول جمعة قلنا نحن (جيسي) ما عندنا فيه كلام – لكن (اللحمة) ما عندنا بديل ليها.
• عصرنا على اللحمة.
• الجمعة التانية (جيسي) وقع لينا…بقينا اول ما ننزل من العربية نقول ليه شغل لينا (جيسي).
• ما في زول فينا بقى يسأل من (شية الجمر).
• انتوا لو شفتوا (جيسي) بتنسوا (اللحمة) نهائي.
• اللحمة ما بناباها ..لكن مع جيسي ما بتنافس.
• زول كورتو زي الفاصل الاول في الحفلة.
• ما بتلقى زول قاعد ليه في كرسي.
• أنا اول مرة اشوف لي لاعب كرة بخلي لاعب الخصم يمشي على جهة ..ومدربه على جهة وزميلو على جهة والحكم على جهة والجمهور على جهة والمخرج على جهة وحكم الفيديو على جهة…وبلعب الكرة في جهة اخرى لزميل اخر.
• الزول دا ح يلخبط ليكم ناس تنقية الفيديو.
• والله لو ما حافظ نظرية فيثاغورس ما بتفهم حاجة من كورة جيسي.
• كورتو كلها نظريات.
• قانون نظرية فيثاغورس ( الرياضيات ) – (ينص قانون نظرية فيثاغورس على أنَّ مجموع مربعي طول ضلعي الزاوية القائمة يُساوي مربع طول الوتر، بالإضافة إلى أنِّ مجموع مساحة المربعين القائمين على طول ضلعي الزاوية القائمة في المثلث القائمة يُساوي مساحة المربع القائم على الوتر في المثلث القائم، ورياضياً يُمكن التعبير عن قانون نظرية فيثاغورس باستخدام الرموز، أي إذا كان لدينا مثلث قائم الزاوية يُسمى أ ب ج، وقائم في الزاوية ب فإنَّ: ( أب ) 2 + (ب ج) 2 = ( أج) 2، حيث أب و ب ج هما ضلعي المثلث القائم، وأج هو الوتر).
• اها الكلام دا وقت كانوا بقولوا لينا في المدرسة قدر ما شرحوه لينا ما فهنا فيه شيء.
• هسع يا دوب نظرية فيثاغورس وقعت لينا.
• النظرية دي ما وقعت لينا إلّا مع جيسي.
• لا حصة صباحية.
• ولا درس عصر.
• ولا دروس خصوصية …وقعّت لينا هذه النظرية.
• جيسي وحده الذي جعلنا نفهم هذه النظرية.
• أنا لمن الكورة تصل لي (جيسي) رأسي بيلف …ما عارف الناس التانية بحصل ليهم شنو؟
• وبشم لي ريحة (شية جمر).
• شية الجمر بتجي من وين ما عارفها؟
• زي كأنك شربت ليك قهوة من غير ما تشربها.
• الكيف تحس بيه في رأسك.
• اكلت ليك لحمة من غير ما تاكلها.
• او كأنك شغلت (المكيّف) من غير ما تشغلو.
• تشعر بي (طراوة) فجأة كدا.
• جيسي امس عمل في ثلاثي الامل بتاع الوسط عملية …حتى كتابة هذا العمود قالوا لاعبو الامل الدرب رايح ليهم.
• الفقد اسنانه.
• والفقد ذاكرتو.
• والفقد تاريخه.
• والفقد مستقبله.
• كلهم راحوا فيها.
• عندنا واحد صاحبنا وقت يفقد سوائل بنركب ليه (درب).
• جلكوز يعني.
• الدرب لمن يصل العروق صاحبنا بجيب لينا (ام درمان).
• بي نشرت تلاتة.
• وقت الدرب يمشي في العصب ويصل للرأس – صاحبنا بجيب لينا (ام بي سي) عديل كدا.
• هسع جيسي دا ما غير مبالغة بجيب (بي ان سبورت) بي عصام الشوالي وطارق زياد.
• بتشوف الدوري الاسباني في الجوهرة الزرقاء.
• لو ما بخاف الكضب (سامر العمرابي) ذاتو شايفو خارج الاستديو.
• امس شاهدنا مباراة الهلال والامل.
• مدرب الهلال الصربي كتب لينا (جيسي) شوط واحد.
• صرف لينا جيسي فرد شوط.
• الصربي ما بكتب ليك روشتة اكتر من كدا.
• ما بديك اكتر من شوط.
• جيسي شوط.
• بوغبا شوط.
• عبدالرؤوف شوط.
• ارنق شوط.
• وضاح شوط.
• المدرب ما عاوز يخرب لينا طبعنا.
• امس (الغربال) ما صرفوه لينا.
• لا الغربال ولا نزار حامد ولا سمؤال ولا استفين زوي ولا وليد الشعلة ولا ابوعشرين.
• عشان طبعنا ما يبقى كعب.
• الشوط الاول وسط الهلال كان فيه جيسي وصلاح عادل ومجاهد فاروق وبشه الصغير.
• البيلعب مهاجم من لاعب وسط ما بتعرفو.
• لغاية ما الشوط الاول انتهى نحن ما عرفنا مجاهد فاورق لاعب شنو؟
• ما شاء الله في أي حتة تلقاه.
• وكان لادم الدالي …بعمل في حاجات …ذكرتني الزول وقت يجيبوا ليه الحاجة العاوزة ونفسو فيها بقوم يسأل من الشطة والليمون.
• فجأة كدا بقول وين الشطة والليمون.
• شفتوا الزول من يجيبوا ليه الاكل ويسأل من الشطة والليمون …معني ذلك نفسو مفتوحة.
• وهذا يعني ان الاكل وقع ليه في جرح.
• الدالي دا زي الشطة والليمون مع الاكل.
• بفتح النفس.
• يشيلها بالشمال.
• يرجعها يمين.
• يلعبها بالكعب.
• يعكسها بالمقاس.
• قوون.
• جيسي يستخلصها ليك من العدم.
• يلمها.
• يفكها.
• يجيبها تاني.
• يلعبها في القون.
• اول مرة اشوف لي لاعب التسجيل عندو اسهل من عدم التسجيل.
• القون اسهل من عدم القون.
• دي قابلتكم في الحتة قبل كدا.
• بالطريقة دي – وبما شهدناه من جيسي في الشوط الاول فقط امام الامل من هسع بقول ليكم الشاف ناس المريخ رجعوا تاني لـ (مالك الحزين) ما كضب.
• ما عارف المناسبة هسع شنو؟
• بكون من غير شك ح ترجعوا لي (مالك الحزين).
• الزول دا ح يرجعكم لي كتاب المطالعة.
• وجدول 4.
• وجدول 2.
• الشاف (أي دمعة حزن لا لا) في المريخ في هذا الموسم ما كضب.
• غايتو لو ما الكورونا ..كان جمهور الهلال مع ناس جيسي والدالي وبوغبا ،حولوا مدرجات استاد الهلال الى الصين الشعبية.
• كنتوا ح تشوفوا العجب.
• المدرجات كانت ح تقوم وتقعد.
• والصفوف امام استاد الهلال كان حدها ح يكون للضعين.
• لهذا نقول من الآن ناس المريخ احسن ليهم يرجعوا لكتاب المطالعة.
• يبدأوا من (مالك الحزين).
• الحاجات البعمل فيها جيسي دي (ترزي) ما بعملها.
• نجار ما بسويها.
• حلاق ما بقدر عليها.
• يمين جيسي ذكرنا (حلاقة العيد).
• حلاقة جديد كدا.
• حلاقة العيد بتكون بتختلف عن الحلاقة العادية.
• قدر ما تتحرفن في الحلاقة العادية …ما بتلحق حلاقة العيد.
• يمكن عشان حلاقة العيد معاها (هدوم جديدة).
• ومعاها كعك وحلاوة.
• كورة جيسي زي (حلاقة العيد).
• كورة ساهلة وممتعة وجميلة.
• فضل الله الصحاف قال لي هو جيسي دا ناس الاهلي المصري جهجهم ما عاوزنو يجهجه ناس الامل.
• ناس الاهلي المصري عملوا معاه (ضربة جزاء).
• فهمهم كمل معاه.
• فهمهم قطع.
• وناس الامل امس سجل في مرمامهم وفي حارس مرمى كبير هو اكرم الهادي سليم (هدف) جميل.
• طبعا لو ما اكرم كورة امس ممكن تكون خمسة.
• انا هسع ما عاوز اجهجه ليكم (ورقكم) ساكت.
• عاوز اتحدث ليكم فقط عن (جيسي).
• لاحقا بتكلم ليكم عن (بوغبا).
• وبتكلم ليكم عن (الدالي)…هذا اللاعب الذي جعل صناعة اللعب في الهلال تبدأ من الطرف الشمال.
• وح اتكلم ليكم ان شاءالله عن مدافع عالمي في الهلال اسمه محمد احمد ارنق.
• دا جبتوه من وين؟
• الله يحفظ الهلال.
• الله يغطي عليهم ويحميهم.
• ………….
متاريس
• بوجبا عاوز عمود براهو.
• وكذلك الدالي.
• وارنق.
• عشان كدا قلنا ما نلخبط ليكم الحكاية.
• أي زول عاوز ليه عمود براه.
• اصبروا انتوا بس.
• ما تستعجلوا.
• لا بد من الاشادة بمدرب الهلال الصربي زوران.
• الهلال كورته بقت سريعة.
• وما في كورة عالية.
• كورة منظمة وجميلة.
• بقينا نشوف اطراف الهلال فعالة وقوية وهجومية.
• الكورة بقت بالاطراف.
• الصربي زوران شغال صاح.
• بعد أي مباراة هناك تمرين للمستبعدين.
• عندنا 30 لاعبا او 31 لاعبا أي حداشر منهم ..بقوموا بالواجب وزيادة.
• كلهم جاهزين.
• كذلك لا بد من الاشادة بجمال سالم وابوجا.
• ابوعشرين رفع سقف الحراس في الهلال.
• مدرب الاحمال مهدي مرزوق بقوم بعمل كبير.
• وكذلك مدرب الحراس كريم السباعي.
• اما الدكتور احمد العابد فهو الذي جعل جسد الهلال معافيا وصحيا وسليما.
• ……….
• ترس اخير : ما الدالي براه ..ياسر مزمل والرشيد وعجب ايضا برة كشف الهلال