حاسدنكم في صلاح نمر وابراهيم جعفر وعلي جعفر والتاج ابراهيم!!

وان طال السفر

محمد عبد الماجد

• في هذه المساحة طالبنا كثيراً بتسجيل عدد من اللاعبين، وتحسرنا كثيراً على عدم تسجيل حمزة داوود وسيف تيري ومؤيد عابدين في الهلال، لكن الآن ونحن ننظر لكشف الهلال وجدنا ان هناك (معاناة) كبيرة لتحديد لاعب واحد لمغادرة كشف الهلال ولو كان ذلك بالاعارة.
• الموضوع أصعب مما كنا نتخيل.
• كيف كان سوف يكون الوضع لو ان الهلال سجل سيف تيري وحمزة داوود ومؤيد عابدين.
• ديل إلّا نشطب ليهم (طابق) من الجوهرة الزرقاء.
• ما في أي لاعب يمكن ان يشطب من الهلال او يمكن ترشيحه للمغادرة لأنهم كلهم أصحاب موهبة وصغار في السن وينتظر منهم الكثير.
• تخيلوا ان خانة اللاعب المحترف في الهلال الآن فيها صعوبة كبرى، لدرجة انك قد تتمنى عدم التعاقد مع لاعب محترف ثالث حتى لا نفقد لاعباً من كشف الهلال.
• الكلام دخل اللحم الحي.
• دخل الجوهرة في عضمه.
• هذا يؤكد ان كل اللاعبين الموجودين في كشوفات الهلال ما فيهم كلمة، وهم الافضل في الساحة حتى مقارنة بنجوم التسجيلات واللاعبين المتصارع حول كسبهم.
• الهلال ضحى بأربعة لاعبين من شبابه أصحاب موهبة كبرى وقدمهم للأهلي الخرطوم في طبق من فضة بسبب عدم وجود الخانات الخالية لهم في كشف الهلال.
• وفقدنا اكرا وتم انهاء عقده مع كل مواهب اللاعب.
• وشطب ابوستة وهو كـ (ارتكاز) ما في متلو.
• وقد يفقد الهلال وليد نيمار او ابراهومة بسبب الحاجة الكبيرة لخاناتهم الخالية من أجل اعادة قيد بشة وبويا.
• في الهلال ما في أي طريقة.
• كشف الهلال متل كلية الطب جامعة الخرطوم.
• لو ما كنت مكرب الأحياء والفيزياء والكيمياء ما بتقدر تدخل كشوفات الهلال.
• ولو ما عندك انجليزي بتطلع من الهلال.
• الهلال (كلية طب) الأندية.
• الهلال كلية الطب …وباقي الأندية الأخرى كليات تانية.
• وفي السودان أي طالب عاوز يقرأ طب.
• واي لاعب عندو موهبة …عاوز يلعب في الهلال.
• الخانة الخالية في الهلال، أغلى من اللاعب الجديد في المريخ.
• ممكن تلقى ليك بيت في لندن وحديقة في باريس وما تلقى ليك خانة فاضية في الهلال.
• في الهلال البحث جار عن خانة فاضية، والمريخ مشكلته في اخلاء خانة علاءالدين يوسف 400 الف جنيه.
• مشكلتهم 400 الف جنيه فقط.
• هل هناك نعمة أكبر من ذلك.
• انتوا في نعمة.
• اشطبوا من طرف ، ما في زول بيسألكم.
• ما في زول بقول ليكم شيء.
• الكاردينال لو قالوا ليه بتلقى ليك خانة بي 2 مليار ..ما عندو مشكلة.
• الكاردينال بيدفع.
• عشان كدا عدم تسجيل حمزة داوود وسيف تيري كان بسبب (الخانات) ، ليس إلّا.
• وأظن ان تسجيل عدد محدود من اللاعبين في الهلال شيء يحسب لمجلس الادارة.
• النظرية الصحيحة تتمثل في تسجيل عدد محدود في ظل وجود تلك الاسماء الموهوبة والجيدة في كشوفات الهلال.
• معاناة الهلال في الخانة الفاضية، وهذا هو ما يشغل بال المجلس وما يعكر صفو جماهير الهلال.
• التخلي من لاعب في قيمة وليد علاءالدين شيء محزن للهلال وابعاد ابراهومة من كشوفات الهلال أمر يسبب كل الحسرة.
• اما الاستغناء عن (شيبوب) ولو مؤقتا فهي (الكارثة) نفسها.
• اذا كان المريخاب الآن بيحسدوننا في محترفيننا وتسجيلاتنا ناس محمد موسى وحسين افول ودراج ومتوكل كولا والمعتصم فان الهلالاب بيحسدوا المريخاب في مشاطيبهم.
• والله فريق المريخ فيه كترة مشاطيب.
• قاعدين هبطرش.
• ناس صلاح نمر ديل فيهم حلاة شطبة.
• اشطبوا ساي.
• اشطبوا من طرف.
• ديل لو كانوا بيلعبوا في الهلال كان ناس الكاردينال شطبوهم قبل التسجيلات.
• بدون ما نسجل ديل بنشطبهم.
• في المريخ ابراهيم جعفر.
• هسع ابراهيم جعفر دا في نادي للمشاهدة بخليه يقعد …خليه نادي المريخ.
• وفي المريخ علاءالدين يوسف.
• فييرا طلع الكاس.
• وفييرا تسبب في ضياع الممتاز.
• فييرا قاعد بسبب 400 الف جنيه.
• شوفوا الخانات القاعدة ساي دي.
• وفي المريخ تتخيلوا هناك اللاعب التاج ابراهيم.
• الجماعة ديل نحن شطبناهم قبل 7 سنوات.
• الطريف ان إحدى قروبات جماهير المريخ كرمت التاج ابراهيم بسبب الانتماء والحماس للنادي.
• حماس شنو؟.
• وانتماء ايه.
• والتاج ابراهيم قبل المريخ كان بيلعب في 7 اندية.
• يعني عاوزين تقنعوني بانتماء التاج ابراهيم وحماسه للمريخ.
• والله لو الانتماء والحماس بخلي اللاعب يقعد في النادي ..صالح سنار كان لغاية وقتنا دا بيلعب في الهلال.
• صلاح دوشكا ما كان في زول شطبو من الهلال.
• عليكم الله هسع ديل في (تريعة البجا) بخليهم.
• الأزمة في الهلال أزمة خانات.
• وفي المريخ أزمة قروش.
• في المريخ كونلي بي أصابته قاعد في المريخ.
• وما قادرين يتخلصو منو.
• وعلاءالدين يوسف 400 الف جنيه بتلعبو تاني 4 مواسم في المريخ.
• ونحن في الهلال بنفتش لينا في خانة.
• فرق كبير.
• في المريخ محمد الرشيد ..زول لينا 6 شهور ..ما سمعنا عنو حاجة.
• في المريخ عصام عبدالرحيم ..مصاب ..وقاعد ..وما في زول بيسألو.
• في المريخ خالد النعسان.
• وفي المريخ رجع حقار.
• ورجع ديدي.
• وسجلوا ضياء الدين والتاج يعقوب.
• وسجلوا صدام سنجة.
• وزول اسمو كيتا.
• والخانات فاضية وراقدة.
• وواقعة هبطرش.
• ونحن في الهلال خانة لي محترف ما لاقينها.
• بشة بكل تاريخه وكل مكانته قاعدين نفتش ليه في خانة.
• في الهلال الأوضاع تختلف.
• أي لاعب في المريخ ممكن تشطبو.
• عدا التش والصاوي والتكت واحمد آدم ورمضان عجب ومحمد عبدالرحمن وبكري المدينة.
• بعد ديل أشطب ساكت.
• تاني في منو؟.
• ما تقولوا لي أمير كمال.
• ما تقولوا لي علي جعفر.
• هسع لو جينا للجد …علي جعفر دا في (بقالة) بخليه.
• يمين نوع ديل الكاردينال من (مدرجات) الجوهرة الزرقاء يشطبهم.
• يا ريت لو عندنا في الهلال واحد زي علي جعفر.
• يا ريت لو كان علي جعفر بيلعب في الهلال.
• دا كان يوم المنى.
• يوم الخلاص.
• لو كان علي جعفر بيلعب في الهلال كان لقينا لينا خانة فاضية.
• كان شطبناه بي قلب قوي.
• ناس المريخ من خاناتهم الفاضية بفكروا يعيدوا قيد راجي عبدالعاطي.
• بفكروا يرجعوا ضفر.
• في (هملة) اكتر من دي.
• في بذار أكتر من كدا.
• والله يا ناس المريخ انتوا مفروض تشكروا جمال الوالي.
• جمال الوالي ترك ليكم خيارات الشطب مفتوحة.
• أي لاعب في المريخ ممكن يتشطب.
• ولا في زول بيزعل.
• ولا في زول بقول حاجة.
• ديل قالوا ليك لغاية الآن عاطف غزالة في كشوفاتهم.
• غزالة لغاية الآن (معار).
• ……………
• ملحوظة : الخانات الفاضية في المريخ في مزرعة ما في.
هوامش
• نحذر مجلس الهلال من التفريط في (شيبوب).
• شيبوب لاعب صغير السن وموهوب وامكانياته لا تتوفر في لاعب آخر.
• الابقاء على شيبوب ومعالجته حتى يعود متوهجاً وهو في كشف الهلال.
• سيندم مجلس الهلال كثيراً اذا تم الاستغناء عن شيبوب.
• هناك اكثر من لاعب يمكن ان يستغنى عنهم الهلال او يعيرهم.
• شيبوب يمكن الاستفادة منه في صناعة اللعب.
• ويمكن الاستفادة منه كارتكاز.
• والخانتين فيهم أزمة في الهلال.
• الهلال يعاني في الارتكاز ويعاني في صناعة اللعب، فكيف يتم الاستغناء عن شيبوب.
• شطب اللاعب من أجل الاصابة أمر غير جميل وغير مقبول.
• ما سمعنا لينا بي نادي عالمي شطب ليه لاعب عشان مصاب.
• في أندية بتبقى على اللاعبين في كشوفاتها موسم كامل وهم مصابين.
• يمكن اعارة وليد نيمار.
• ويمكن اعارة يونس الطيب في وجود الحارس الفلتة محمد النور ابوجا.
• ويمكن اعارة الطاهر سادومبا.
• لا اعتقد ان سادومبا يمكن ان يلعب في الوسط في وجود ابوعاقلة والشغيل ودراج وبشه ونزار حامد وصهيب الثعلب.
• ولا يمكن ان يلعب في الطرف اليمين في وجود سموأل وحسين افول.
• هناك أكثر من حل غير الاستغناء من شيبوب.
• ما تفسدوا التسجيلات بقرارات الشطب العشوائية.
• شكراً لحلويات الشامية التي احتفت بقوون في شخص احمد الحاج وشخصي الضعيف.
• كل طاقم المحل هلالاب …تفاجأنا بهلاليتهم العالية والراقية.
• في كل مرة نتفاجأ بهلالاب بكاتلو في الهلال وما بيقبلو فيه حاجة.
• هؤلاء الناس ..يستحق الهلال ان يفرحهم.
• يستحقوا ان يأتي لهم الهلال بالاميرة السمراء.
• هناك عشق خرافي للهلال.
• عشق لا تحتمله الكلمات ، عشق فوق التصور.
• وان شاءالله في انتظار موسم جديد للهلال كله أفراح.
• موسم البطولات، الخارجية والداخلية.
• نذكر ونكرر ان الهلال في التسجيلات الاخيرة فقد عدداً كبيراً من لاعبي الوسط.
• فقد سالمون جابسون وفقد أبوستة.
• وفقد اكرا.
• وسوف يفقد ابراهومة.
• ويمكن ان يفقد وليد نيمار.
• ولم يسجل الهلال غير دراج وعاد الشغيل.
• فهل من المنطق ان يفقد الهلال بعد هذه الاسماء (شيبوب) لاعب الوسط المكتمل.
• هناك زحمة في الخطوط الأخرى ابحثوا عن حلول في مكان غير الوسط.
• هجوم الهلال لم يفقد أي لاعب سجل محمد موسى وينتظر محترف مهاجم.
• وهذا يعني ان هجوم الهلال سوف يصبح فيه عدد كبير من اللاعبين كاريكا ومحمد موسى ومحمد موسى وشلش وولاءالدين ووليد الشعلة وهناك محترف قادم للهجوم.
• 7 لاعبين في الهجوم لا يلعب منهم في المباراة أكثر من اثنين.
• في الوقت الذي يلعب الهلال في الوسط باربعة او خمسة لاعبين.
• أطراف الهلال أيضاً فيها زحمة.
• ودفاع الهلال كذلك.
• فلماذا يتم شطب لاعب من الوسط.
• شيبوب لا.
• الزول اللعاب ظاهر ..ومعروف وهو الذي تحميه موهبته وامكانياته الفنية.
• والتسجيلات باقى ليها 9 ايام.
• والحجز.
• والطيران.
• واعياد الميلاد.
• عووووك.
• وابقوا على سفر.
• …………
• عاجل : والله لو لقينا علي جعفر نشطبو في 4 دقائق.