حقيرتي في بقيرتي !!
لهيب الشوق
هاشم الطيب
حقيرتي في بقيرتي !!
# في بلادنا السودان أمثال نأخذها من بئتنا ودايما ما تصدق مثل هذا المثل الذي روست بيهو العمود ( حقيرتي في بقيرتي) ..
# وعشان تبقوا معاي للآخر بقي تي تصغير وتعجين ودلع لبقرتنا الصفرا ..
# وقع ليكم ولأني ما بقدر على ولاد الحله وبخاف منهم لما يدقوني الليله يوم سوادك يابقيرتي أقع فيها دق دق زي الدق !!
# بعد الكلام الكتير والشرح عاوز تصل لشنو ؟
# في كورتنا مجالس الإدارات بتخاف من الجماهير عشان كدا أول ما الفريق ينهزم طوالي الحيطه القصيره والبقيه المسكينه !!
# تعالوا أحكي ليكم قصة حبيبتي ال (الكوره) # الدوري الممتاز لعب ثلاثه أسابيع يعني بالبلدي عديل كل فريق من الستاشر لعب ثلاثه مباريات فيها من فاز واخر تعادل وغيرهم خسران وهذا المستديرة يوم ليك ويوم عليك ومرات بين بين لا هنا ولا هناك .!!
# الفرق التي فقدت المباريات طوالي مجالس الإدارات شالت وختت شوفها على المدرب وقالوا ما نافع لازم يترفت و فدوه !!
# ناس توتي جروا وراء كوتش الفاتح النقر وبعد جهد جهيد تنازل النقر وقبل بالتكليف بالرغم من عدم قناعاته ويرى الخبير النقر بأن الميركاتو تم بعيدا عن الرؤيا الفنيه لكن الرجل قبل التكليف !!
# وخسر الفريق الجديد على الممتاز المباريات الثلاث وعينك يالنقر ماتشوف النور !!
# مدرب فاشل وآخر هو شاف ولعب الكوره وين !؟
# كيسو فاضي وكمان شايلو الهوا هو الكيس الفاضي قطع البحر كيييف !؟
# ارفتوه طيروه لحقوه كيسو الفاضي ده !!
# ولحق كيسو و… القصه ما في الأكياس القاضيه القصة الرؤوس الخاويه !!
# انتوا قبيل ما شايفين الكيس الفاضي ده الخبير قدام عيونكم درب كم فريق وكل موسم لازم يدرب تلاته أربعة فرق وأخيرا يا من ترستو البحر وصبتوه خرصان غلبكم تجيبوا كوتش كيسه مليان !؟
# تعالوا شوفوا البوبار والطياره ترحال !! # هلال البلدي المشارك في بطولة الكاف الكونفدرالية ذهاب وإياب ولجت مرماه خمسه أهداف ولم يفتح الله عليه بسوي ثلاثة أقوان وطار من المنافسه !!
# و… على طول نظروا للبقيه المسكينه ضبحوه وسلخوها و بغوا جلد وصنعوا منه مركوب فاشري !!
# الحصل بي كله سببه إنتي يا بقيرتي وتستاهلوا الضبح والسلخ ويفرقوا دمكم في بوادي وحضر وفرقان كردفان بعد الفضيحه وسط الأهل والعربان !!
# و… سرعة البرق بات الفريق بلا جهاز فني !!
# المشكلة ليست في إدارات الأندية المشكله في لجان التدريب المحلية والوطنيه لإطلاقها شأن مربيها لعبة في أيادي أدارات الأندية والتعامل مع المدرب معاملة سوق الله أكبر !! # نرجع لتحكيمنا والمك الآمر والنهي في الشأن التحكيمي لو تنازلت من علاك الفوق ووضحت لينا ما هو الأمل المرتجي من كورس التحكيم الذي عقدته بأدارة الرياضه العسكرية والمدارسون أعمارهم قاربت الخمسين !! # غايتو يامك حيرتنا ألمك الأصلي لم يفعل مثلما تفعل يا مك القرن العشرين !!
بعيدا عن الواتساب. ::
______________
أشيع عبر وسائل التواصل الاجتماعي نبأ من وحي خيال مطلق الإشاعه عن وفاة ملك الجاز الفنان الاستاذ شرحبيل أحمد الموت ليس بالبدعة ولكن مثل هذه الأخبار الكاذبة تقلق الأسر وحتى الأصدقاء والمحبين يصيبهم بكثير من الإزعاج ونسأل الله بطول العمر ونعزي الاهل في غرب القاش كسلا وكل أصدقاء وعشاق فن الراحل المقيم كمال كيلا ولا نقول إلا مايرضي الرب إنا لله وأنا إليه راجعون …