قزاز ورذاذ
محمد الطيب الأمين.
حكمة الله .. العطس والدوري الممتاز ينقلان كورونا وكأس السودان لأ !!
* الإحساس العام عندنا في السودان فيما يتعلق بكورونا هو أن قريبك (ما بعاديك).
* الناس عندها إحساس زي ده.
* صاحبك ما بعاديك.
* وقد بلغت بنا الثقة أن يتبادل (نفرين أصحاب) كمامة واحدة.
* هذا الإحساس هو ليس عند (عامة الناس) بل هو عند (صفوة الناس كذلك).
* ونقصد الإخوة في الإتحاد العام .
* الإتحاد العام عندو إحساس إنو (عدوى كورونا ما بتنتقل عبر منافسة كأس السودان).
* والله صحي.
* قايلين (البيعادي) هو الدوري الممتاز فقط.
* يعني فايروس كورونا قبل ما يدخل في جسمك بيشوف المناسبة الجابتك الإستاد شنو؟
* بيشوف المنافسة شنو؟
* لو لقاها الدوري الممتاز طوالي بيصيبك وبعمل ليك جفاف في الحلق وصداع وحمى وضيق في النفس.
* نفس الفايروس لو قابلك في الإستاد والمناسبة كانت كأس السودان ما بشتغل بيك بيمشي طوالي.
* فايروس محترم والله.
* فايروس يدعم المنافسة القومية.
* يدعم كأس السودان ولكنه لا يدعم الممتاز.
* ده غير إنو الفايروس لا ينتقل في المساجد ولا الصالات ولا الأسواق ولا مجمعات خدمات الجمهور.
* شكلو الفايروس بتاع كورونا ده عندو مشكلة مع الدوري الممتاز فقط .
* يكون الفايروس ده يا شداد تابع لناس معتصم جعفر وأسامة عطا المنان.
* ما هذا العبط يا إتحاد يا عام؟
* لا أحد يتذكر كورونا إلا عندما يذهب إلى الإستاد ويجد الدخول ممنوع .
* دي اللحظة الوحيدة البنعرف فيها إنو البلد دي فيها كورونا.
* الإتحاد العام وعبر لجانه المتعددة نقل الدوري الممتاز إلى الخرطوم ومنع دخول الجمهور بأمر من وزارة الصحة في وقت سابق.
* الآن الإتحاد العام برمج مباريات كأس السودان بالولايات وبحضور الجمهور.
* سافر الهلال إلى أبو حمد في زيارة تاريخية وجد فيها الفريق استقبال رهيب من مواطن المنطقة المحب للكيان.
* كما سافر المريخ إلى حلفا الجديدة ووجد أيضا استقبالا جيدا.
* وفي المباراتين امتلأ الإستاد بالجمهور.
* الآن سيغادر الهلال إلى مدينة النهود لمواجهة حيدوب رابع أيام العيد وأيضا ستخرج غرب كردفان كلها لاستقبال الهلال ومتابعة المباراة.
* الحقيقة أن الإتحاد عليه أن يعلن عودة الجمهور إلى الاستادات وفي جميع المنافسات.
* لا نقول ما في كورونا ولكن نقول زمن الخوف من كورونا ولى.
* تتعايش بس.
* ونحن في السودان نحمدلله أن كورونا في رسالته الأولى لم تكن قاسية علينا.
* الحمدلله.
* مراجعة وزارة الصحة وإصدار قرار عودة الجمهور يجب أن يتم اليوم قبل الغد.
* صالات الأعراس شغالة.
* الإختلاط على قفا من يشيل.
* أندية المشاهدة.
* الأسواق.
* الحدائق.
* كل شيء عادي ما عدا ملاعب الكرة.
* واصلا كده كده في اعداد من الجماهير قاعدة تدخل إما بالواسطة أو السوق الأسود.
* قالوا الإتحاد العام بيطلع ٢٠ تذكرة بخلاف بطاقات الإعلاميين.
* لما تجي الإستاد بتلقاهم ٤٠٠ بخلاف الإعلاميين.
* الكلام ده كلو ما في داعي ليهو.
* افتحوا الاستادات.
* أكثر من ٦٥ ألف متفرج تابعوا نهائي اليورو من داخل الملعب في بلد تعتبر بؤرة لكورونا.
* ما في سبب بيخلي الدوري الممتاز يتلعب بدون جمهور.
* وبعدين هو وينو الجمهور البيملا الإستاد؟
* زمن الجمهور بيدخل الإستاد من الساعة ٢ ظهر ده زمن الله يرحمو.
* مع الظرف الاقتصادي والصفوف ورهق المعيشة سيكون الحضور مناسب ولا يدعو للخوف.
* ما في كورونا في السودان لدرجة أنها تمنع دخول الجمهور.
* لو خايفين يجب أن يكون هنالك استثناء لجماهير الهلال.
* نحن ما بنخاف.
* والهلال هذه الأيام هو ذات نفسه علاج لكورونا.
* الهلال بيقدم في كرة قدم تشبه فايتمين (سي).
* ماشاء الله تبارك الله.
* عموما علينا أن نرفع شعار عودة الجمهور للمدرجات.
* والحافظ الله.
* و.. و..
* وما اتوقعتها وبالجد منصدم اصلا ما براك سامعلك ……….. (باااااع).