حوادث أم درمان ترفض استقبال لاعب الهلال والمريخ!!

قزاز ورذاذ
محمد الطيب الأمين
حوادث أم درمان ترفض استقبال لاعب الهلال والمريخ!!

* لحظة الفرح عادة تنتج عنها تصرفات (مُضحكة) أحياناً و(مُبكية) في أحيان أخرى.
* الفرح الجنوني يجعل التعبير عنه أشبه بالجنون.
* وفي كرة القدم إحتفالات اللاعبين بعد تسجيل الهدف البعض منها طريف والبعض الآخر مُضحك.
* وهنالك إحتفالات تصل من خلالها رسائل كثيرة.
* طرق الإحتفال كثيرة ومتنوعة.
* رونالدو يحتفل عن طريق إبراز عضلاته من خلال تلك اللقطة الشهيرة.
* نجم الهلال والي محمد عبد الله (عليه الرحمة) زمان كان لما يسجل هدف تجده مبتهجاً (يحبو على الأرض ومن خلفه كل اللاعبين).
* ونذكر أيضا طريقة إحتفال بشة ومساوي.
* والغربال وأطهر.
* ولعل أكثر طريقة إحتفال اشتهرت بين اللاعبين هي (الجري والتزحلق على النجيلة).
* والحركة دي بالذات أنا اتخيلت يقوم يعملها لاعب في إستاد المريخ.
* اتخيل لاعب هلال الساحل بعد سجل هدف التعادل في شبكة المريخ لو أراد أن يحتفل عن طريق التزحلق؟
* اتخيل البيحصل شنو؟
* أول حاجة ما ح تكون في زحلقة اصلا.
* ح (تقع) بس.
* (تبرك على ركبتك وتقعد) .
* لكن ما بتتزحلق.
* هي وينا النجيلة البتزحلقو عليها؟
* ده دقداق.
* عالي واطي.
* ما بتقدر تتزحلق شبر.
* ولو اصريت إنك تعمل الحركة دي فإن (حوادث ام درمان) لن تستقبلك إلا بعد كتابة تعهد.
* أول حاجة ح تقطع رباط صليبي في (القدمين).
* وكسر في الساقين.
* وح تفقد حوالي (٩) من أصابعك العشرة.
* وبلالي الركبة ح تنتهي.
* واحتمال تكون داير (كونات) عديل.
* بلالي ركبة وكونات.
* تتزحلق في (كبرى توتي) لكن ما تتزحلق في استاد المريخ.
* وبالمناسبة دي.
* زمان شداد قال ناس توتي إلا يلعبوا في (الكبرى).
* هسه ناس المريخ يفترض يلعبوا في (الكبرى).
* الزلط أرحم من الحُفر.
* المهم.
* اليوم الهلال يواجه توتي.
* ومباريات الهلال أصبحت محط أنظار كل الرياضيين.
* المريخاب بقعدوا لكورة الهلال قبل الهلالاب.
* زمان كانوا بحضروها بالدس.
* هسه بقوا بحضروها (على عينك يا هلالابي).
* ما بخجلوا ذاتو.
* البلد دي حالياً ما فيها فريق بيلعب كورة خلاف الهلال.
* والله صحي.
* كورة بفهم الكورة ما بلعبها إلا الهلال.
* وهذا ما جعلنا نشتهي مباراة للهلال كل (24) ساعة.
* ما حاسين بضغط البرمجة.
* هو في زول عندو الغربال بحس بالضغط؟
* غربال لأي زول.
* الهلال عليه أن يظل في حالة (الجوع) هذه.
* الإحساس بالشبع سيكون ثمنه غاليا.
* ده الوقت الوحيد الذي يجب أن نطبق فيه : (كل ما تواجه وتنتصر لنصر تاني يجينا شوق).
* التراخي مكلف.
* نلعب بقوة وحماس.
* وأي فريق نلقى فيهو فرصة نسجل فيه على قدر ما نقدر.
* إن شاء الله ندخل فيهو ١٦ هدف.
* الفرق التي تبحث عن البطولات لابد أن تكون قاسية.
* تفرض شخصيتك وتخلي البقابلك يدخل مرعوب ومستسلم.
* والحمدلله حالياً الكل بيخاف من الهلال.
* ولا ما كده يا الفاتح باني؟
* وغايتو جنس غايتو.
* و.. و..
* والطين في الكرعين ما ببقى نعلين.