* جابت ليها خريف
* وجابت ليها خروف كمان
* يا نلحق الحيطة
* يانضبح للزيطة وتقع الحيطة
* وكالعادة
* فاجأني النهار
* الخريف فاجأ الولاية
* كان طافي النور اظنو
* وكالعادة فاجأنا العيد
* لاننا شعب اجبرته ظروفه علي رمي ثقافة الادخار
* هو دخل الشهر مابكفي يوم
* ندخر كيف بس
* ايها الناس
* مأسات طلاب المركب حرقت قلب كل ام وكل اب
* بل حرقت قلب كل الشعب
* وعظمة هذا الشعب المابستاهل الحياة العايشه دي
* تتجلي في مثل هيك ظروف
* وهاهي الاذاعة الرياضية تتبرع من حر مالها بيخت حديث يرحل ما تبقي من طلاب وطالبات تلك المنطقة المعنية و المنسية
* ومن مفارقات هذا البلد
* انو فيهو كافوري ومنشية
* وفيهو دار سلامات ومناطق منسيه
* فيهو ناس تحت الشمس مكملين اسية
* وفيهو ناس تحت البطانية شايلين شمسيه
* الاسبليت ياعمك
* لكن الله في
* كعب العدم
* والاكعب من العدم الجديع بي حق الناس
* فرب الخير المنتقم الجبار في الحديث القدسي اقسم حين قال
* وعزتي وجلالي لا اظلمن عبدا لعبد
* اللهم اجعلنا مظلومين كده ولا تحولنا لظالمين
* اللهم وتركنا حقنا ليك وانت الحكم العدل المنتقم الجبار
* المهم في الموضوع
* عظمة هذا الشعب واليخت
* يخت الاذاعة الرياضية
* اليخت الاساسي
* ما اليخن العجب
* ايها الناس
* اليوم هلال السودان يلتقي بالاشقاء المغاربة
* اكتب والمطرة بدت تنقط
* نقطة نقطة زي الهلال
* المطرة دي اذا زادت
* الكورة يا تتلغي لدواع خريفيه
* يا تتلعب كورة موية
* فكردنه بني استاد ونسي الصرف
* اصلو قالوا كردنه مابحب الصرف
* جنو وجن الصرف
* لكن مهما هطلت الامطار
* فان المباراة قائمة
* لاني اثق في اخوتي ناس روشا
* حايشربوها جووووووت
* ويدفقوها بعيد شوووووو
* وبعد داك المغاربه يوروهم المطرة صابة وين
* واتمطري
* ايها الناس
* ناس روشا هينين
* نحنا
* الموية بين الاستاد وحوض السباحه اكتر من الموية الجوه حوض السباحه
* والموية البين السور الخارجي والاستاد بالشرق سمكها عااااايم
* والموية الجوه الملعب خلف المرمي الشمالي دخلت النفق المظلم
* اذا سألنا هل يوجد مدير لهذا الاستاد
* او هل يوجد مجلس ادارة لهذا النادي
* حايقولوا علينا اصحاب اجندة
* واذا سكتنا مدني تغرق
* واذا تحدثنا عن العضوية وعودة التجديد للقوائم
* نجد اننا نلجأ للعضوية بالراس ولا نهتم بالعضوية ام راس
* والله لما اسمع عضوية فلان وعضوية فلتكان
* كأني اسمع قطيع فلان وبهائم فلتكان
* لسه بدري علينا شديد
* ولكن هل يريد فلان وفلتكان اجازة النظام الاساسي فعلا ?
* ام جددوا عضوية قطعانهم لعكس ذلك ?
* اتمني ان لا تتم اجازة النظام الاساسي عشان نشوف المريخ بمثل افريقيا كيف بدون نظام اساسي
* ايها الناس
* كل سنة طيبين كل الناس
* والبلد الطيب طيب
* وبلد الطيب الطيب يبقي طيب لانو طيب
* ايها الناس
* ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* شعبك كلو بغني
* اني اتنفس تحت المااااااااء
سلك كهربا
ننساك كيف والكلب قال اني اغرق… اغرق…. اغرق
والي لقاء
سلك