*ماحدث للمريخ افريقيا كان لخطأ طبي شنيع وفظيع
*والاخطاء الطبية شائعة ومعروفة
*لاتسلب الطبيب المخطئ وصف طبيب
*ولكنها تخصم من رصيده المهني وتحسب عليه
*وهي ايضا لا تعطي الحق العامة بوصف الطبيب المخطئ بالبليد
*فالراجل مهما كان طبيب تأهل لذلك الوصف جامعيا
*الامر الذي لايجعل للعامة والهامة الحق في التقليل من المقدرة الطبية للطبيب المخطئ
*ولكنها ايضا لاتشكل ساترا له من النقد والانتقاد
*لزم المريخ سرير المرض بعنبر التمهيدي لخطأ طبي
*كان المريخ يستعد للخروج من العنبر مستشفيا وصحيحا وقويا
*لملم حاجاتو ووزع اهله الحلوي
*منها وطالع الطبيب المعالج داير يتفولح رقدو جوار دقلها البتلولح في عنبر التمهيدي من جديد ولمدة عام حتي يشفي من اثر الوصفة الطبية الخاطئة التي تناولها بامر الطبيب المختص قبل خمسة دقائق من مغادرته للعنبر اللعين
*هذا بالطبع ماحدث للمريخ
*فالاختصاصي المشرف الصديق ابراهومة انفعل من الشفاء وانشغل بالحلوي والاحتفال وكتب آخر الروشتات مرتكبا فيها خطاءا طبيا شنيعا هدم به كل مجهودات العلاج المقدرة التي قام بها مشكورا
*معقولة ياديسكو زول غالب تلاته للدقيقة تسعين ومتأهل ومبسوط يقوم يدخل مهاجمين؟؟؟
*هل كنا في حاجة لاهداف؟؟
*مدرب الجزائر دفع بمهاجمين بعد خراب مالطته عسي بل لعل
*فدفع ديسكونا بتيري
*وكانت العسي وتبعتها اللعل
*ورجعنا للعنبر بعد خرجونا منو
*محاورك ياديسكو اضعف خطوطك كانو
*امير عمرو مانجح كمحور
*وانت اصريت عليه كمحور ضاربا بتجارب من سبقوك عرض الحائط
*وود الرشيد بعيد وماقصر لكنه قطع
*بعد الهدف التاني ست الشاي الجمبي علي المدرجات الشعبيه قالت لي بعد ده يدخل الصيني ويلعب بتلاته محاور واذا في طريقة زيادة يكثف الوسط بالتاج يعقوب لانو السماني مابرجع يساعد بيبو الضعيف دفاعيا
*ويخلي بكري براهو في الهجوم للمرتدات
*والتش مابطلع لو يرقد في نقالتو جوه الميدان طالما الناس ديل خايفين منو
*يجمد الكورة ويحصل علي مخالفات تكسر الزمن وتعلن تأهل المريخ
*دي ست الشاي
*لكنه الخطأ الطبي
*ابراهومة خبير وشاطر وابن المريخ وعمل في ظروف قاسية ماقلنا شئ
*لكن ان كنا نحب ابراهومة حقو نبصروا بأخطائه ليستفيد منها
*نفس الاندفاع والفريق متأهل ويخسر في اللحظات الاخيرة حصل للديسكو مع هلال الابيض
*ايها الناس
*في عهد كروجر تعادلنا مع خريبه بهدفين في بلدو
*في الاياب بامدرمان احتشد الشفوت داخل الاستاد زي علبة الساردين ممنين الانفس بتسعة اهداف مريخية
*الكورة انتهت صفر صفر
*الاعلام ماخلي لكروجر جمبة ينوم عليها
*والجماهير خرجت مستاءة
*ولكن كان لكروجر رأي آخر
*انا متأهل من المغرب
*احافظ علي تأهلي ذلك افضل من المخاطرة بالسعي لنصر لايزيد من وصف تأهلي شئ وقد تقودني تلك المخاطرة لفقدان التأهل
*فمثلما هم أخطأوا في بلدهم واحرزنا هدفين
*يمكن بالاندفاع ان نخطئ نحن ويحرزوا هم الهدفين علي ارضنا ويضيع تأهلنا الذي عدنا به من المغرب نتيجة الاندفاع والطمع
*قام بيخ ليهم الكورة جنس بياخة
*انها حسابات كرة القدم ياعزيزي الديسكو
*لذا كان الخطأ الطبي
*ايها الناس
*البعض ينادي بان نقرع الواقفات ونخلي الجفلن
*الواقفات مابنقرعن
*الواقفات الوداد المغربي الخطير
*واخطر مافيه الطرف الايمن
*القصاد بيبو
*ومحمود امبده قاعد بره
*الاسهل نرجع الجفلن يا اخوي
*الواقفات مابنقرعن
*ايها الناس
*اتابع جميع القروبات
*الذين كانوا ينتقدون زولفاني حتي وهو منتصر
*لم يفتح الله عليهم ببنت شفه عند لزومنا عنبر التمهيدي ٢٠١٩
*عارفين ليه؟
*لانو غالبيتنا تمارس عشق المريخ بالخيار والفقوس
*ان كنت منهم انت من الخيار والاشراف ومنزه
*وانت كنت غير ذلك فانت فقوس ساي
*لذا تضيع في غالب الأحيان كلمة الحق التي يحتاجها المريخ
*المهم
*روح الثورة وادبها كانا حضورا داخل الاستاد وسط صور الشهداء وعبارات الثناء والاعتراف لهم بالجميل
*وسلوك الثورة كان يشكل ادبنا الجديد علي صفحة شعب الهلال التي تمنت الفوز للمريخ وطالبت بالمساندة
*انه السودان الجديد
*المهم
*سوداكال اي كلمة عندو بتبدأ بي حا
*وحدو (الحا ) دي
*حا ادفع
*حا اجيب
*حا ابني
*حا استثمر
*ولايدري سوداكال ان (حا) دي ضيعت البشير
*بحاحي تلتين سنة لما الرغيفة وصلت الف جنيه والدولار وصل تمنين الف
*بعد داك (حا) ماشفعت ليهو
*بي طريقتك دي يا آدم مابقول ليك (حا) نشيلك
*لكن (حا) دي براها بتشيلك
*المهم
*روشا فرحان لخروجنا الافريقي
*طبعا الصفراب لا يفرحهم الا خروج المريخ
*لان صفرهم يلازمهم اينما حلو
*ولو كانت القرعة بترمينا مع دكان اسبورت الرواندي او الاتصالات الجيبوتي او زين التشادي او اريبا بتاع افريقيا الوسطي
*صدقني لو ماجينا الميدان مابنطير
*افرح بولد طايع الموريتاني
*ففي منتصف الطريق في ترجي خمسات والمغاربة ستات
*وستظهر البشتنة ورقاد الواطة من جديد
*ماشفت الثوار طالبوا حمدوك يشوف ليهم طريقة مع الجريف رقدات وانبراشات
*ايها الناس
*الثورة مستمرة
*وهاهم شباب المدنية
*بانت والعباسية
*يعيدون للشارع القه بالبناء والتعمير بعد ان بسطوا عليه بطولاتهم وتضحياتهم وقدموا له شهدائهم الذين كتبوا بدمائهم علي الشارع حرية سلام وعدالة
*وبالمناسبة دي
*لو كل شباب الثورة
*ردم البلاليع والحفر كل في حيه
*وعملوا علي تفريغ المياه الراكضة
*وحاولوا اعادة فتح الخيران والمجاري
*موش بتكون حرب مقدرة علي الضبان المالي السودان والباعوض العذب الانسان؟
*اذا كانت الثورة لسة مستمرة
*يبقي الحاجات دي تتعمل بسرعة ونحافظ علي الانجاز
*الحلة ماكبيرة علي شبابها
*المهم
*قالوا الفريق اللعب مع الهلال امس اسم ماعندو
*حظوظ غريبة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*ده شنو البحصل في بورتسودان بين اهالينا؟؟؟
*لاقبلية لاهمجية لاتبعية شعارات لينا
*يبقي الناس دي تفهم ياوالينا
*دايرين نبني وطن ومافي زمن لدينا
سلك كهربا
ننساك كيف والكلب قال الخطأ الطبي عادي جدا…بس نستفيد منو
والي لقاء
سلك
