خلاص مافي تاني كلام باقي لينا يومين لرفع التمام

تغريدة واتساب
بقلم : معاذ ابومؤيد
خلاص مافي تاني كلام
باقي لينا يومين لرفع التمام

حراك رهيب
وجو عجيب
تاني الباقي شنو
الباقي حضورك ياشفت انت والمعاك في الحلة في القروب في اي مكان ….
كلو شي جاهز حتى الموية الباردة والتلج جاهزين ..
المافي شنو كل شي موجود ومتوفر
ناقصانا حناجركم وحضوركم !!
غايتو لما قالوا الفقر يولد الابداع ماكضبوا!!
فلس لجنة التسيير اظهر لينا مبدعين واظهر لينا اقطاب ومشجعين …
كنوز مدفونة في الارض طلعت لينا ذي بات مان وسوبر مان وورونا الطفأ النور منو وورونا انو المال عندهم ما بساوي اي شي امام جمال الزعيم ….
شباب مكافح ظهر لينا في القروبات
شباب ذي الورد
تسلموا ياشفوت وما عدمناكم وما عدمنا مواهبكم ….
**************************
كل قروب يقول للقروب التاني نحن ابطال التضحية و الملحمة !!
شفوت اثبتوا للوجود انو حب الزعيم جاري في دمهم وفي عقلهم
ناس تجي من الصباح للاستاد يطمنوا علي العمل وبعد داك يمشوا لاعمالهم والواحد ممخمخ !!
يعني مظبط دماغوا بالوان الزعيم…
وفي ناس خارج السودان تقول ساكنة في عرضة امدرمان الاخبار عندهم والدعم منهم وما فضل ليهم الا تواجد اجسادهم فقط
روحهم معلقة في بوابة عبدالقيوم
ياخي ديل شفوت عجيبين الواحد فيهم ينوم ويقوم وبحب الزعيم مهموم!!
**************************
في عز معمعتنا دي ناس يطلعوك خارج النص وهم قلة قليلة لكن رسالتنا ليهم ارجوا الراجيكم من اقلامنا بعد نفرة شطيف سطيف عشان حنخصص كلماتنا ليكم والكلام دا موجه لبعض الإعلاميين والإداريين
الناس الشايتة شمال وعاملة فيها كتاب مقال !!!
لاعايزين تشاركونا في رفع الهمة ولاعايزين تحتجبوا وتريحونا !!
عاملينا فيها منظراتية
بالله دي ايام تنظير !!!
ماعندك شغلة غير محاربة الجمال
لاخليت جمال سالم لاجمال الوالي
الجمال شكلو عامل ليك عقدة
ونحن مريخنا كلو جمال…..
صبرا ايام قليلة ونفضى ليكم
انتظرونا في قادم الايام بالجديد ليكم!!
*************************
لو صحت الانباء عن السقطة الحصلت في تقرير مباراة المريخ والمقاصة ونشرت في قناة الهدف تبقى مجزرة في حق المريخ واتمنى التحقق من صحتها ومن المتسبب في تلك المجزرة والجريمة
**************************
ختاما
الدعوات والتوفيق للزعيم
ويوم السبت يوم الخبت ويوم الشطيف لسطيف
**************************
منتظرنكم ياشفوت علي المدرج المرة دي عشان نشجع ونحضر الإعادة في التلفزيون عشان نتفرج ونستمتع بروعة حضورنا واهازيجنا وروعة المباراة سمعتوني نحن علي المدرج عشان نشجع والفرجة شوفها فيدوهات واعادات فقط
منتظرنكم تعال ومعاك البتقدر عليه من الشفوت العندو ركشة يملاها والعندو امجاد يملاها والعندو حافلة دا بعز ما عزة جد وناس الدفارات ديل كمان هم بيت الكلاوي يعني شيالين التقيلة..
ناس العربات الخاصة لو لقيتو فرقة في الضهرية ماتبخلو بيها !!!

**************************
وواحد جميل مننا رحل امس قبل ايام من المعركة!!
ننعاه و ننعي فيه الخلق والمشاركة حتى اخر نفراتنا مشارك نشارك قروبات عشق الزعيم یجمعنا في وفاة أحد أعضائها
المميزين
كان الفقيد/ عمر محمد ابراهيم (الضباح) حسن السريرة دمث الاخلاق
سائلين الله عز وجل ان يتغمده برحمته وان يلهم آله وزويه الصبر والسلوان
سالين الله ان يتقبله قبولا حسن
وباذن الله الصفوة ماتقصر في الواحب تجاه اسرته كالعهد بنا باذن الله
*************************
خارج النص
الناس البتكره (جمال) المريخ تأكدوا اننا كلنا (جمال)
و(جمال) لي (جمال) يفرق
وكلو صابي في بحر (جمالنا)
والعايز ال( جمال) يجينا جاي والبشجع ال(جمال) يقرب والبعادي ال(جمال) دا يشوف درب غير (جمال ) المريخ
لانو بي بساطة
المريخ عالم (جميل )…
تعالوا يوم السبت عشان تشوفوا (جمال) التيفو و(جمال) المدرج وبي بساطة روعة المدرج من زمن ( جمال) معانا
موتوا بغيظكم يامحاربين ال(جمال)…
فهمتونا !!!