صحيفة كورة سودانية الإلكترونية

دبابيس ودالشريف

2٬503

دبابيس

ودالشريف

** في زحمة الاحداث وبعد خيبة المريخ والهلال لفت نظري خبر جميل رائع هو تكريم الأخ الشاذلي عبدالمجيد رئيس اتحاد الخرطوم لعبقري الكرة السودانية ونجمها الكبير الشهير نصرالدين عباس جكسا وحقيقة تكريم صادف أهله لأن ماقدمه جكسا للهلال كبير وللسودان أكبر… جكسا قاد منتخب بلادنا لانتصارات داوية على كل الدول الأفريقية في فترة الستينات وكان الهداف الأول وتغنت أفريقيا باسمه وكان أحد أبطال بطولة الأمم الأفريقية عام ٧٠ واعجبنا به ونحن أطفال وتكريمه هذه المرة لم يكن بالدلاقين ولا الشهادات التقديرية إنما بعربة فارهة يستحقها…. التحية للجنرال الشاذلي عبد المجيد واتحاده على هذه اللفته البارعة والتحية للأسطورة جكسا في يوم تكريمه وتحيات الصحة والعافية..

** خطوات تكريم بروف كمال شداد أعظم رئيس للاتحاد السوداني تسير وفق التصور الموضوع وتبقى لنا اختيار الوقت المناسب

** الهلال يسعى للصعود إلى ربع النهائي في دوري أبطال أفريقيا بالباب الصعب… وربنا يسهل

** محمد وردي تغني… فرصة وضيعتيها تاني وين تلقيها…. الأغنية نهديها لنادي الهلال وجماهيره

** كم أهدر المريخ والهلال من المال في المحترفين الأجانب

** بادو الزاكي أخطأ كثيرا باختياره للاعب غير الجاد سيف تيري للمنتخب الوطني… اولا سيف تيري طول من المباريات…. ثانيا مشكلته مع المريخ ما زالت قائمة وأمس تم منعه من السفر برفقة المنتخب الوطني بسبب البلاغ المفتوح في مواجهته ويقال ان لجنة المنتخبات الوطنية نجحت في شطب البلاغ ويلحق ( العبقري) تيري بالمنتخب اليوم ان لم يكن قد سافر مساء أمس… وان شاء الله يقود المنتخب للفوز .

** نادي المريخ أصدر بيانا شديد اللهجة هاجم فيه اتحاد معتصم جعفر بعد ان اقحمه اتحاد معتصم في حكاية سيف تيري… بس البيان بدون توقيع

** المنتخب الوطني في مهمة ليست سهلة وكرة القدم تطورت كثيرا في الجابون وأظهرت مستوى مدهش في آخر مبارياتها…. منتخبنا لم يستعد جيدا وسافر بتدريب واحد ومديره الفني معتمد على لاعبي المريخ والهلال باعتبارهم جاهزين

** الهلال والاهلي تلعب في الأول من أبريل بدلا من ٣١ مارس وباستاد القاهرة وليس ملعب السلام والتحكيم إثيوبي

** الاهلي لعب كل مبارياته بملعب السلام
بمصر الجديدة وهو ملعبه اصلا… ليه حول مباراته أمام الهلال لاستاد القاهرة

** الاهلي يعمل لحشد أكبر عدد من الجماهير في مباراة الأول من أبريل.

** الزميلة الأستاذة فاطمة الصادق بقت ما ترد علينا ويبدو أن ما كتبته عن صلاح إدريس أعظم رئيس في تاريخ الهلال لم يرضيها وتناست الزمالة والخوة والايام الجميلة والعشرة النبيلة…. بيني وبينك والايام يا فاطمة

** هل يوافق مجلس المريخ على طلب المدرب ريكاردو بأداء حوالي ثلاثة مباريات في الدوري الممتاز بدون لاعبي المنتخب الوطني وهنالك مباراة اليوم أمام الأهلي مروي وإذا أقيمت سنشهد اول ظهور للبرازيليين الأربعة في ملاعب الخرطوم

** أخشى أن يضيع الدوري الممتاز من المريخ في وجود ريكاردو كما ضاعت البطولة الأفريقية

** متى يجتمع مجلس المريخ وشايف ابوجيبين بقى ابن بطوطة كل يوم في بلد وحسن إدريس في القاهرة والنائب الأول للرئيس لا حس ولا خبر واسامة عبدالجليل مباري ابوجيبين في أي حتة ومنير نبيل ما عارف وين…. القصة هايصة ولا أحد مهتم بمغادرة الفريق لدوري أبطال أفريقيا

** الحقيقة غايبة حول فريق السلة بنادي المريخ المتصدر للدوري ويا ليت كابتن الفريق يتصل بي عبر الهاتف لاقف على ما يدور…. وكان من الخطأ إسناد مسئولية المناشط خلاف كرة القدم للأخ خالد زروق لأنه كثير الأسفار ولا يتمتع بالخبرة الكافية في إدارة اي منشط

** واضح ان هشام السوباط رئيس الهلال لا يستطيع العودة للخرطوم في وجود أكثر من بلاغ مفتوح في مواجهته وعليه يفترض أن تتم الدعوة لجمعية عمومية للنادي لطرح الثقة فيه وانتخاب رئيس جديد يكون متواجد في الخرطوم ومتابع لنشاط النادي من قريب

** فترة طويلة جدا لم أقرأ للطبال احد كوارث المريخ

** خالد عزالدين الذي هاجر إلى أمريكا.. وقطر عجيب…. خالد عزالدين شابكنا الهلال نادي الحركة الوطنية ويخدع في السذج والبسطاء… والهلال تم تأسيسه في بيت حمدنا الله أحمد والمشرف عليه كان انجليزي يدعي كلارك…. ورجال الحركة الوطنية معروفين لدينا

** فيما يبدو أن ريكاردو ما عارف انو المريخ طار من البطولة الأفريقية وشايفو مهتم بمباراة الزمالك واظنه لا يعرف انها مباراة ودية…. كلموه يا اسامة قوليهو المريخ مرق

** جمهور المريخ لا يعرف ان كان ضياء الدين محجوب وطبنجة واسكندر وزرقة تم شطبهم ام لا

** بعد أن تسبب في وفاة مواطن… على كابتن أطهر الطاهر اعتزال الكرة ومغادرة الملاعب

** لا أعرف ان كان مدافع المريخ حمزة داؤد ضمن قائمة المنتخب الوطني ام خارج القائمة

** أمثال حمزة داؤد وأطهر الطاهر لو كانو في كولمبيا… كان شافو الويل وسهر الليل…. الشعب السوداني شعب عاطفي وطيب

** ما عارفين ان كانت شركة كابيتال مازالت راعية للدوري الممتاز ام ذهبت بقرار من أسامة عطا المنان

** نرجو أن تكلل مساعي لجنة الاستاذ محمد الشيخ مدني بالنجاح في ردم الهوة ورأب الصدع بين اتحاد معتصم جعفر واتحاد الخرطوم

** رمضان على الأبواب لتصفد أبواب الشياطين.. من أمثال هؤلاء

** السلطان حسن برقو يستعد لافتتاح برجه الضخم برج السلطان بالخرطوم بحري…. تهانينا مقدما ورمضان كريم

** اي نادي بالخرطوم يرفع راية التمرد يعاقب بالقانون…. في أندية
ماسك العصاية من النص وده ما بنفع… يا كدة يا كدة.

** اسأل عن الاخ الأمين الطيب بقادي أشهر رئيس لمنطقة الخرطوم الفرعية وعضو اتحاد الخرطوم سابقا… أين هو

** مبارك تكتيك لسة شغال ضد شداد

** الميرغني كسلا صعد للدور النهائي في الدوري التأهيلي ومجلس إدارته وكل لاعبيه إصرار على بلوغ الهدف وهو العودة للدرجة الممتازة ويعسكر الان بفندق هبتون على حساب اتحاد كسلا المحلي وينتظر دعما من حكومة الولاية الما جايبة خبر

** الأرباب صلاح إدريس أعظم رئيس في تاريخ الهلال يعود للخرطوم خلال شهر رمضان المبارك …. وعودا حميدا مستطاب

** الأخ جمال الوالي…… رمضان كريم وكل سنة وانت طيب

** بين عيني وخد الوردة بتبقى مودة

** آخر دبوس

** الهلال في امتحان صعب بالقاهرة.. ومحليا. لن يحتفظ ببطولة الدوري الممتاز

قد يعجبك أيضا
7 تعليقات
  1. ابوعمار يقول

    هههههه جدو قال عام 70 كنا اطفال دائما جدو بيحاول يفهم الناس انه صغير في السن يازول الكبر ما عيب عيب العيب ومحاولة التشبب للشياب يا جدو جكسا أصغر منك سنا يازول صلعه وشيب ديل براهم 70 سنه غير ايام العطلات الرسميه وزي ما قلت ليك لما سيد اسياد البلد يتاهل لدور الثمانيه ويفوز بالدوري الممتاز شوف ليك جحر ادخله بس خفف الكرشه عشان تقدر تدخل وبعدها شوف ليك مكتب استقبال يشغلك وبطل تطبيل للرجال مره برقو ومره صلاح إدريس ومره جمال الوالي ومره ابوجيبين يا زول اركز شويه

  2. ابو عبدالرحمن يقول

    خالد عز الدين قطر عجيب
    بالله شوفوا المستوى
    الله يسألك عن ما كتبت يداك

  3. أمين محمد يقول

    امورك الشخصية وعلاقات الشحدة بتاعتك خليها بعيد بالله .. وحاول اكتب بمهنية واسلوب رصين .. .. حقد وشحدة وتلميع وتطبيل .. كلو عشان تكبر كومك من الملمعين ..

  4. Khalid يقول

    عيب كلامك في حقك خالد عز الدين من حقه يمدح الهلال كما أنت تمدح المريخ ليل ونهار كلمة قطر عجيب ده تطلب اعتذار منك لو عندك الشجاعه لذلك
    بعدين حسم من مستوى كتاباتك رديئة جدا وليس محترفة

  5. صلاح يقول

    عمود تسعين في المية منه عن هلال الشعب هلال الوطنية الجننك جن، وعشان تعرف قيمة الهلال بالنسبة ليك، أها وإنت بتذكر البتاع الطوالي وتهنيه بشهر رمضان المبارك الما بيجي غير بالهلال…… رمضان كبس والحالة صعبة، وعملتها واضحة يا حاج. 😂😂😂
    جينات الحلب واضحة في الحلامبشة…..!!
    مالك مع بت الصادق، عاوز منها شنو كمان ؟
    يا هلالنا يا كايده….. 😁😁😁

  6. أسامه دنقلاوي يقول

    يا ( ود شريف ) احترم زملاء المهنة زميلك هاجر ومافي داعي للعبارة قطر عجيب اكتب بموضوعيه ومهنيه وبلاش شغل ( ألم ) وأحسن تكتب .. ولا اليخماو بقبل عليك تاني ويخليك ما تسوي بببببببب ومالك ومال فاطمه الصادق ده كاتبة هلالية بمليون دلقان الظاهر عليهو المصران قام عليك تاني عشان كده بتدور علي الأرباب وجمال الوالي

  7. عبدالله - دنقل يقول

    الدبابيس توجه لك لعلك تعي ما تقول
    قاعد تعمل فتنة – ( اطهر وحمزة داوؤد ) لعيبة عاديين وكم من لاعب كبير اطاح بضربة جزاء وكم من مدافع كبير اخطأ معنى كلامك تحريض عشان يقوم زول ماعندو عقل ويشرع في الإعتداء على اللاعبين –
    خليك في مع ناس حسن برقو وابراجهم واقعد طبل ليهم – شغل الكيزان بإمتياز – بعد دا كلو انشاء الله برقو يديك برج تربي فيهو حمامك.

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد