صحيفة كورة سودانية الإلكترونية

دبابيس ود الشريف

1٬861

دبابيس

ودالشريف

** والله المريخ النادي الكبير اصيح مثل هذا البلد السودان… خلافات وتشرزم وانقسامات وشلليات وحفر ويكفي ما يحدث في ملف التدريب وقد اجتمع القطاع الرياضي بكامل هيئته واتخذ قرارا بخصم ٥٠ ٪ من مرتب المدرب كلارك وصديقه اسلام جمال مدرب الأحمال مع اعفائهما على أن يتولى كابتن ابراهومة مهام التدريب ويشرف على الفريق في مبارتي صن داونز والاهلي…. وبالمقابل قال حازم مصطفى المتواجد في القاهرة أو دبي لا أدري قال… ان كلارك مستمر واسلام جمال مستمر مما يؤكد عمق الخلافات بين أعضاء المجلس.. والجمهور محتار وما عارف من ينتصر في المعركة حازم مصطفى ام ابوجريشة ورفاقه في القطاع الرياضي…. هل يستمر كلارك وإسلام بأمر حازم ام يغادران بقرار القطاع الرياضي

** المريخ هايص هيصة شديدة وقد عايشنا قبل أيام أيضا عمق الخلاف حول مكان مباراة المريخ والاهلي والجدل الذي أثير بين الجكومي وشلته وحازم وجماعته واخيرا انتصر حازم وستقام المباراة بالقاهرة وكان أيضا الخلاف الشهير بين أعضاء المجلس… عندما أصر حازم وجماعته على بقاء الفريق في القاهرة إلى ما قبل لقاء القمة ب ٤٨ ساعة ومجموعة أخرى كانت ترى ضرورة عودة الفريق للخرطوم مبكرا وهنالك خلافات بين حازم وابوجريشة وخلافات بين ابوجريشة وكلارك وإسلام جمال وخلافات على المستوى الفني بين ابراهومة وكلارك. وخلافات في دائرة الكرة وخلافات في القطاع الرياضي

** بعد كل هذا تنتظرون انتصار المريخ على الاهلي وصن داونز

** الخلافات واردة في أي عمل عام وفي أي مجتمع ولكن خلافات مجلس المريخ عنيفة وشرسة وجاءات في توقيت صعب وعلاجها ممكن بس في حاجة إلى وقت

** أمس قمت بعمل حصر لأعضاء القطاع الرياضي بالمريخ وتعبت من العد واظنهم تجاوزوا ٢٠ فردا…. بيعملو ايه ما عارف

** زمان تحدثت عن ضرورة وجود حازم في الخرطوم… لأن الاجتماعات بالتلفون وبالمراسلة ما تنفع ولو حازم كان في الخرطوم كان الخلافات قلت شوية..

** أعلم أن والدة كابتن ابراهومة مريضه شديده ربنا يشفيها و سفره للقاهرة غير مضمون واذا ذهب الثنائي الخطير كلارك وإسلام… مافي طريقة الا يشرف ابوجريشة وحاتم محمد أحمد على تدريب الفريق

** أكدت في مرة سابقة أن اسلام جمال يسيطر على المريخ ولا يستطيع كلارك أن يفعل شيئا دون استشارته وإسلام له اجندته ولا يطيق ابراهومة ابراهومة إطلاقا

** إصرار حازم على استمرار كلارك وإسلام جمال ربما أدى لاستقالة ابوجريشة وكل أعضاء القطاع الرياضي مع استمرار الخلافات
وابوجريشة يقول ليك ما عندي خلاف شخصي مع كلارك

** حقيقة ومن خلال تواجدي في معسكر المريخ بالقاهرة وصلت إلى قناعة ان الانجليزي كلارك صعب جدا ويميل للأنفراد برأيه في أي حاجة ويتخذ قرارات غريبة وعلى سبيل المثال رفض التدريبات الصباحية ومنح اللاعبين ثلاث ايام راحة بعد مباراة القمة في القاهرة وأصر أيضا على منح اللاعبين راحة ٢٤ ساعة عقب عودتهم للخرطوم لمواجهة الوصيف الدائم…… وإصراره على تواجد ٢٤ لاعبا في تدريب أمس الأول…. كلارك بعمل حاجات غريبة ومفتكر نفسو مورينهو

** رغم ذلك كله نحن مع استقرار التدريب في المريخ وعدم استقرار التدريب أضر بمسيرة الفريق كثيرا

** خلافات مجلس المريخ هزمت الأحمر أمام وصيفه الدائم وليس الحكم الجزائري

** المريخ زي فلسطين لا يهدأ ابدا

** من أخطاء القطاع الرياضي في المريخ أن ترك لكلارك وإسلام جواز سفرهما في يدهما… لذلك لم يجدا اي صعوبة في مغادرة الخرطوم أمس الأول دون الاستئذان من أحد وتركا الفريق خلفهما ويمكن أن يغادر كلارك لبلاده من القاهرة ويبقى اسلام مع أسرته في القاهرة

** نأمل في تلافي الخلافات العاصفة وان يلتقي حازم والجكومي وابوجريشة والبقية على قلب رجل واحد من أجل المريخ

** هل انتهت مشكلة فندق مونفييك وغادر ابوجريشة مقر الفندق ام ما زالت المشكلة قائمة… وابوجريشة تحدث أمس عبر إذاعة بلادي وقال كل ما قيل ونشر عن متأخرات الفندق غير صحيح وأنه لم يعود للخرطوم لظروف صحية

** الترهل في دائرة الكرة وفي القطاع الرياضي بالمريخ لا معنى له ودعونا نتسأل ما هو الفارق بين دائرة الكرة والقطاع الرياضي… . أحمد وحاج أحمد

** الاهلي سيلعب مباراة دورية قبل لقائه بالمريخ والمريخ لو كان فيهو نظام وانضباط كان أدى مباراته الدورية أمام الأهلي شندي

** مباراة الهلال وصن داونز كانت يوم الجمعة نفس يوم مباراة المريخ والاهلي وتحولت وبقدرة قادر إلى يوم السبت كدليل على تخبط الاتحاد الأفريقي الذي فشل في تطبيق الفار من خلال كبرى بطولاته وفالح بس في حرمان الجمهور السوداني من حضور المباريات

** هذا اللاعب اعترف من قبل انه كان شماسي وعضوا نشطا في عصابات النقرز وما زال مباري صعاليق الحلة وبرضو يسيئ لأكبر نادي في السودان

** صن داونز في حاجة إلى نقطة وحيدة ليتصدر المجموعة والنقطة حيشيلها من الحصالة الهلال

** ياسر مزمل…… كريم أدي غشيم….. اسف جدا أخطأت أمس في زحمة العمل و الكتابة في كلمة غشيم وكتبتها بالقاف

** السلطات الصحية وافقت للهلال بدخول ٢٥ الف مشجع لمؤازرته أمام صن داونز… والقرار في النهاية قرار الاتحاد الأفريقي

** مباراة المريخ والاهلي تنطلق عند السادسة مساء الجمعة المقبل بتوقيت السودان ومصر واخر خبر ان المريخ خاطب الاتحاد الأفريقي وطالب بعدم حضور الجماهير في مباراة الجمعة
والخبر نرجو الا يكون

** المريخ لم يسافر إلى القاهرة يوم الأحد وسافر أمس على دفعتين.. دفعة ببدر للطيران ودفعة بطيران تاركو

** الأسعار نار وثورة الجياع اقتربت وجبريل إبراهيم ما زال وزيرا للمالية بالرجالة

** عاجل الشفاء للزميل الصديق الأستاذ معاوية الجاك الذي أجرى عملية جراحية صباح أمس بالقاهرة

** في حضرة جلالك يطيب الجلوس

** آخر دبوس

** خلافات مجلس المريخ تذكرنا بالبرهان وحمدوك وقحت واتحاد المهنيين

قد يعجبك أيضا
9 تعليقات
  1. Hajjam يقول

    ههههه هاااااااا. دائما الدلاقين برمون الهلال بدائهم. ياخي استحوا الوصافة ماركة مسجلة لكم وبالرغم من كاسات المكاتب وهدايا اتحاد اللقيمات وكاس الزور كاس جنيه لازال الهلال يتفوق عليكم في عدد بطولات الممتاز فعن اي وصافة تتكلمون؟؟؟

  2. اسامه دنقلاوي يقول

    يا ود الشريف كتاباتك برضو حقت زول وليك حق لو مابتفرق بين الغين والقاف وشايفك مابترتاح الا تدخل( سيد البلد) في مقالاتك وبالمناسبة رأيك شنو في (سلك ) ملعب الهلال الجديد هههههههههه نلتقي مع الحصاله

  3. ابو يوسف يقول

    قلت لي الوصيف الدائم؟
    ههههههههههههه ههههههههههههه هذا زمانك يا مهازل فأمرحي، طيش أفريقيا الدائم ووصيف السودان المعتمد يقول لسيد البلد الوصيف الدائم ، نعم وبالفعل الاختشو ماتوا

  4. خليل عباس يقول

    الهلال حصالة والدلاقين حصالات ولا مكفولين ولا مغفلين
    ههههههه ود مزمل لا
    ود مزمل لا
    صن داونز دا ليك انت نحنا اتعادلنا معاه في جنوب أفريقيا لكن حكام أفريقيا معفنين زي الصحفيين الدلاقين زي العام
    انت ي صحفي تري الشوك في الورود وتعمي ان تري فوقها الندي إكليلا
    بالمناسبة استحواذ الهلال في القمة الاولي ٦٣ وفي الثانية ٦١ وبعد دا كلو انت فرحان لي دلاقينك هههههه
    صحفيين آخر زمن اللهم ارحم عبدالمجيد عبدالرازق الصحفي الحقيقي الذي يعرف قيمة الصحافة

  5. صلاح يقول

    طبعا سينتصر صاحب الجيب الكبير في المعركة يا حاج، ودي ما عاوزة ليها كلام !؟
    بعدين يعني لو مافي خلافات إنتوا حا تهزموا الأهلي وصنداونز؟ ياخي قطعت مصارينا بالضحك يا حاج 😆😆😆
    والنسألك سؤال، قلت حزومي لازم يكون في الخرطوم، هو المانعه شنو يكون في الخرطوم؟
    مباراة الهلال وصنداونز حصل فيها تلاعب بين الهلال والكاف والأهلي، عشان عاوزين يطيروا المرخرخ، خليك واضح وختها علي بلاطة 😝😝😝
    الجميع متفقون على أن يطير كيس الخواجة كلارك، وإذا عرف السبب بطل العجب !!
    البعام المستعار خبره شنو؟

  6. About يقول

    حال السودان أحسن من حال مريخك، عندنا جيش حامينا مش …..، حسن أمثالك يا ودالشريف، دا وطنا البى اسمه رطنا يا بتاع وردي

  7. خالد العمده يقول

    انت يا أيها الصحفي الرابع الجميل… لو تشرفت لنا بذكر اللاعب الصعلوك الذي يتبع للعصابه…

  8. احمد التجاني يقول

    حنشوف الحصالة حيكون منو يا دبابيسكو. في مقالك الفات قلت بالحرف انو مدرب صنداونز قال انه الهلال فاز على المريخ بالتحكيم وان المريخ سيصعد من صنداونز. اولا الجزء الاول من كلامك كذبة بلقاء ونتحداك تجيب الدليل. اما الجزء الثاني فدي احلام زلوط.

    قلتها ليك من اول يوم ابو الريش حيطلع الطيش. والسبب بسيط لانه متعود على كدة. ومهما ولولوت وجعجعت وتدبست المسمار ركب وانتهى الامر.

    ويا هجام مبروك المسمار في الدلاقين. مع الاسف كان عندي مشكلة في اللابتوب لما اتلعبت المباراة وفاتني اعلق على مقالات دبابيسكو ومزمز وعمك تنقو.

    ما كنت اتخيل مسمار مزمل بيعمل في رجال كبار كدة.

    1. Hajjam يقول

      غايتو ياود التجاني مسمار ياسر الكاسر عمل لهم ارتجاج في المخ وهضربة شديدة من صحافة الكورال وبالرغم من اوامر اليخماو بقي كل واحد شغال بطريقته ونسوا تعليمات الكاهن.

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد