بالعربي الكسيح
محمد الطيب الأمين
دكتور حسن علي عيسى شاهد على فض الاعتصام !!
* عندما تعرَّض موقع في بورتسودان للقذف بالطيران قبل سنوات تحدث عبد الرحيم محمد حسين عن ذلك الهجوم .
* تحدث مبرراً وليته لم يتحدث.
* عبد الرحيم محمد حسين قال في تصريحات عبيطة جداً إن الضربة كانت بالليل .
* قال : الجماعة ديل ضربوا الموقع (ليلاً وبدون إضاءة) .
* عبد الرحيم داير العدو يضرب بالنهار والشمس فوق والإضاءة فل الفل .
* المبرر عند عبد الرحيم هو (الضربة كانت ليلاً وبدون إضاءة) .
* يعني الطيارة طافية الأنوار .
* ما بتنشاف .
* وأضاف عبد الرحيم : الآن وجهنا بنشر القوات وتفعيل نظرية الدفاع بالنظر على امتداد الساحل .
* كيف دفاع بالنظر؟
* قال معناها الشرطة والأمن يراقبوا العدو بالنظر .
* والله صحي .
* ده كلامو كده .
* أنا لما أشوف الفيديو الفيهو تصريح عبد الرحيم ده بستغرب ليه نحن ما عملنا ثورة قبل (15) سنة.
* كنا عميانين والله .
* قال ليك: (ليلاً وبدون إضاءة) .
* مبرر عجيب.
* هو أنت قايل الطيارة دي جاية جايبة ليك (سد مال) ولا جايبة (فطور العريس) ؟
* شكلو كان داير الطيارة الضربتنا دي تجي ومعاها سيرة وكشافات وزغاريد .
* عبط غريب والله العظيم.
* الآن خرج علينا الدكتور حسن علي عيسى بتصريحات وتبريرات تشبه تلك التي قالها عبد الرحيم محمد حسين .
* دكتور حسن علي عيسى رجل مثقف ومحترم وصاحب أدب وخلق ممتاز .
* وقد عرفه شعب الهلال بهذه الصفات الطيبة فضلاً عن كونه رجل مسالم ومؤدب ولا يميل للتهاتر .
* وله إسهام وحضور في مجالس الهلال المتعاقبة .
* على الصعيد الشخصي أكن تقديراً كبيراً لدكتور حسن وهو يستحق هذا التقدير دون شك .
* ولكن على ما يبدو أن الدكتور استخف بعقولنا وعقول أهل الهلال عندما رد على سؤال يتعلق بصرف النظر عن الثنائي البرازيلي .
* دكتور حسن قال إن الثنائي رفض عرض الهلال بسبب أحداث فض الاعتصام .
* كيف؟
* قال إنو الثنائي دخل (قوقل) وعمل بحث وشاف صور وفيديوهات فض الاعتصام والثورة .
* طيب كويس .. أها شنو يعني؟
* قال الثنائي بعد ما شاف أحداث فض الاعتصام أعتذر لأن السودان غير آمن.
* أنت جادي يا دكتور ولَّا بتمزح؟
* الكلام ده بنقبلو لو قالو الكاردينال أو إعلامه ولكن لا يمكن أن نقبل هذا التبرير الفطير من دكتور حسن علي عيسى .
* الكلام ده ما بشبهك يا دكتور.
* أولاً الثنائي البرازيلي ده طالما عندهما موبايلات ذكية وبيعرفا قوقل يبقى قطع شك سمعا بالثورة السودانية العظيمة دي .
* أي زول في العالم عندو هاتف ذكي أو بيشاهد تلفاز شاف الثورة السودانية وعندو خلفية عنها .
* دي حاجة .
* الحاجة التانية لاعب الكرة في أي مكان في الدنيا بيعرف إنو أي مفاوضات تعني أن الأمن والأمان موجود في البلد الطالب لخدماته.
* بمعنى .. اللاعب البرازيلي ده عارف إنو لو السودان فيهو حرب وموت في شوارع العاصمة لو في حاجات زي دي قطع شك الهلال ما بفكر في الكورة ولا بفكر في استجلاب محترفين .
* اللاعب برضو عندو مخ.
* طالما أنت فاوضته معناها ما في موت في الشوارع .
* يعني الهلال يخسر دولارات عشان يجيب محترف يتفرج على الحرب ويرجع تاني يوم؟
* اللاعب عندو مخ وبيسأل نفسو الأسئلة دي يا دكتور .
* الحاجة التالتة .
* معقولة خش قوقل وطوالي لقى فض الاعتصام في وشو؟ لا لقى صورة الكابلي، لا سد مروي ولا جاهو خليل إسماعيل ولا قناة النيل الأزرق ولا كورال جامعة السودان؟
* بعدين يا دكتور ديل لعيبة كورة لما يجيهم عرض من الهلال بخشوا قوقل عشان يجمعوا معلومات عن الهلال مش معلومات عن الثورة والقيادة العامة ودسيس مان .
* بخشوا قوقل بكتبوا (الهلال السوداني) بتجيهم المعلومات نازلة ، لا فيها ثورة ولا كنداكة ولا ترس ، معلومات هلالية فقط .
* نفترض إنو الثنائي البرازيلي رفضا الحضور بسبب فض الاعتصام .. طيب أنت كمجلس ليه ما أقنعتهما وفهمتهما؟
* دورك شنو كان في الحتة دي؟
* هسه يا دكتور حسن اللاعب العراقي عماد محسن ده سجلو قبل ما يدخلو (قوقل).
* خليهو يوقع قبل ما يخش قوقل.
* نحن يحلنا الله .. من الرباط الصليبي لفض الاعتصام .
* يجيبوا اللاعب لما يلقوا سعروا غالي يقول ليك قاطع رباط .
* يخدِّروا فينا ويغشونا ولما يفشلوا يقول ليك اللاعب شاف فض الاعتصام في قوقل .
* تاني أي محترف تفاوضوه يا دكتور شيلو منو تلفونو .
* وأفضل تركزوا على اللاعبين الشايلين تلفون (ربيكا) .
* معقولة ياخ .
* التبريرات البتشبه الكاردينال دي ما تقولها يا دكتور .
* الكاردينال عرف إنو ما في زول بصدق خزعبلاتو دي عشان كده ح يخليك أنت في وش المدفع .
* عموماً .. كل التوفيق للهلال ونرجو أن نسمع أخبار سعيدة عن تسجيل الأجانب اليوم .
* ونركب صافنات ونجيبه (برازيلية) وأصلو الزول بيموت والذكرى تفضل حية.
* و..و..
* غايتو جنس (قوقل).
